നിങ്ങളുടെ കാർ സുരക്ഷിതമാണോ? യുകെയിൽ വാഹന മോഷണങ്ങൾ റെക്കോർഡ് വേഗത്തിൽ.
യുകെയിൽ വാഹന മോഷണം പെരുകുന്നു: ഓരോ 10 മിനിറ്റിലും ഒരു കാർ മോഷ്ടിക്കപ്പെടുന്നു!
ലണ്ടൻ: യുകെയിലെ കാറുടമകൾക്ക് ഭീഷണിയായി വാഹന മോഷണങ്ങൾ തുടരുന്നു. ആധുനിക സാങ്കേതികവിദ്യയുടെ സഹായത്തോടെ ലേറ്റസ്റ്റ് മോഡൽ കാറുകൾ പോലും നിഷ്പ്രയാസം കവർന്നെടുക്കുന്ന മോഷ്ടാക്കൾ രാജ്യത്ത് വിലസുകയാണ്. വാഹനമോഷണ കേസുകളിൽ പോലീസിന്റെ ഭാഗത്തുനിന്നുണ്ടാകുന്ന അലംഭാവം മോഷ്ടാക്കൾക്ക് കൂടുതൽ കരുത്തുപകരുന്നതായാണ് ആക്ഷേപം.
കണക്കുകൾ പറയുന്നത്:
-
മോഷണ നിരക്ക്: ലഭ്യമായ കണക്കുകൾ പ്രകാരം യുകെയിൽ ഓരോ പത്ത് മിനിറ്റിലും ഒരു കാർ വീതം മോഷ്ടിക്കപ്പെടുന്നു. കഴിഞ്ഞ ഒരു വർഷത്തിനിടെ പ്രതിദിനം ശരാശരി 150 കാറുകളാണ് മോഷ്ടാക്കൾ കൊണ്ടുപോയത്.
-
DVLA ഡാറ്റ: 2025-ൽ 54,830 വാഹനങ്ങൾ മോഷ്ടിക്കപ്പെട്ടതായി റിപ്പോർട്ട് ചെയ്തു. മുൻവർഷത്തെ 61,343 മോഷണങ്ങളെ അപേക്ഷിച്ച് 11 ശതമാനം കുറവ് രേഖപ്പെടുത്തിയെങ്കിലും, കഴിഞ്ഞ ഒരു ദശകത്തിനിടെ വാഹനങ്ങളുമായി ബന്ധപ്പെട്ട കുറ്റകൃത്യങ്ങൾ ഇരട്ടിയായി വർദ്ധിച്ചു.
മോഷ്ടാക്കളുടെ ‘ഇഷ്ട’ വാഹനങ്ങൾ:
ഏറ്റവും കൂടുതൽ വിൽക്കപ്പെടുന്ന മോഡലുകളെയാണ് മോഷ്ടാക്കൾ പ്രധാനമായും ലക്ഷ്യം വെക്കുന്നത്.
-
ഫോർഡ് ഫിയസ്റ്റ (Ford Fiesta): മോഷണപ്പട്ടികയിൽ ഒന്നാം സ്ഥാനത്തുള്ളത് യുകെയിലെ കുടുംബങ്ങളുടെ പ്രിയ വാഹനമായ ഫിയസ്റ്റയാണ്.
-
ഫോക്സ്വാഗൺ ഗോൾഫ് (VW Golf): പട്ടികയിൽ രണ്ടാം സ്ഥാനത്ത്.
-
ഫോർഡ് ഫോക്കസ് (Ford Focus): മൂന്നാം സ്ഥാനത്ത്.
മെഴ്സിഡസ് സി-ക്ലാസ് ആറാം സ്ഥാനത്താണ്. റേഞ്ച് റോവർ സ്പോർട്ട് മോഡലുകളുടെ മോഷണത്തിൽ 20 ശതമാനം കുറവുണ്ടായപ്പോൾ ടൊയോട്ട, ലെക്സസ് ഉടമകളാണ് ഇപ്പോൾ കൂടുതൽ ആശങ്കയിലുള്ളത്. കഴിഞ്ഞ വർഷം മാത്രം 4,518 ടൊയോട്ട വാഹനങ്ങൾ മോഷ്ടിക്കപ്പെട്ടു.
മലയാളി സമൂഹത്തിലും ആശങ്ക
യുകെയിലെ പ്രവാസി മലയാളികൾക്കിടയിലും വാഹനമോഷണം വലിയ തലവേദനയായി മാറിയിരിക്കുകയാണ്. വീടിന് മുന്നിൽ പാർക്ക് ചെയ്യുന്ന കാറുകൾ പോലും അത്യാധുനിക ഗാഡ്ജെറ്റുകൾ ഉപയോഗിച്ച് മോഷ്ടാക്കൾ തട്ടിയെടുക്കുന്ന സംഭവങ്ങൾ വർദ്ധിച്ചതോടെ പലരും വലിയ ആശങ്കയിലാണ്.
