സുഡാനിൽ വൈദ്യുതി നിലയങ്ങൾക്ക് നേരെ ഡ്രോൺ ആക്രമണം; ജനജീവിതം ദുസ്സഹമാക്കി പരക്കെ വൈദ്യുതി മുടക്കം.

സുഡാൻ : ആഭ്യന്തരയുദ്ധം രൂക്ഷമായ സുഡാനിൽ, സൈന്യത്തിന്റെ നിയന്ത്രണത്തിലുള്ള അഞ്ച് വൈദ്യുതി നിലയങ്ങൾക്ക് നേരെ അർദ്ധസൈനിക വിഭാഗമായ റാപ്പിഡ് സപ്പോർട്ട് ഫോഴ്സസ് (RSF) ഏകോപിപ്പിച്ച ഡ്രോൺ ആക്രമണം നടത്തി. സുഡാൻ സർക്കാരിലെ ഉന്നത ഉദ്യോഗസ്ഥൻ നൽകിയ വിവരമനുസരിച്ച്, അൽ-ജസീറ, ഗെഡാരെഫ് എന്നീ സംസ്ഥാനങ്ങളിലെ രണ്ട് വൈദ്യുതി നിലയങ്ങളും വൈറ്റ് നൈൽ സംസ്ഥാനത്തെ ഒരു നിലയവുമാണ് ആക്രമിക്കപ്പെട്ടത്.

പവർ സ്റ്റേഷനുകൾക്ക് നേരെ തുടർച്ചയായി നടക്കുന്ന ആക്രമണങ്ങൾ ദശലക്ഷക്കണക്കിന് ജനങ്ങളുടെ ആരോഗ്യ സുരക്ഷയെയും അടിസ്ഥാന സേവനങ്ങളെയും തകർക്കുമെന്ന് ഐക്യരാഷ്ട്രസഭ നേരത്തെ മുന്നറിയിപ്പ് നൽകിയിരുന്നു. ലോകത്തിലെ ഏറ്റവും വലിയ പട്ടിണി പ്രതിസന്ധി നേരിടുന്ന രാജ്യത്ത് വൈദ്യുതി മുടങ്ങുന്നത് സ്ഥിതിഗതികൾ കൂടുതൽ സങ്കീർണ്ണമാക്കുന്നു. ഗെഡാരെഫിലെ അൽ-ഫാവോ സ്വദേശിയായ ബാബിക്കർ യൂസഫ് തന്റെ പ്രമേഹരോഗിയായ മകന്റെ ഇൻസുലിൻ ഫ്രിഡ്ജിൽ സൂക്ഷിക്കാൻ കഴിയാത്തതിലുള്ള ആശങ്ക പങ്കുവെച്ചു. 

ദിവസവും ഡസൻ കണക്കിന് സാധാരണക്കാർ കൊല്ലപ്പെടുന്ന ഡ്രോൺ യുദ്ധത്തിലേക്കാണ് സുഡാൻ നീങ്ങുന്നത്. ഒക്ടോബറിലെ ആദ്യ മൂന്ന് ആഴ്ചകളിൽ മാത്രം ഡ്രോൺ ആക്രമണങ്ങളിൽ 300-ലധികം പേർ കൊല്ലപ്പെടുകയും നൂറുകണക്കിന് പേർക്ക് പരിക്കേൽക്കുകയും ചെയ്തതായി ഐക്യരാഷ്ട്രസഭയുടെ കണക്കുകൾ വ്യക്തമാക്കുന്നു. ആഫ്രിക്കയിലെ മൂന്നാമത്തെ വലിയ രാജ്യമായ സുഡാനിലെ 50 ദശലക്ഷം ജനങ്ങളെ ഈ യുദ്ധം സാരമായി ബാധിച്ചിട്ടുണ്ട്. 

വൈദ്യുതി പ്രതിസന്ധി കാർഷിക മേഖലയെയും മറ്റ് ചെറുകിട ബിസിനസുകളെയും കനത്ത പ്രത്യാഘാതങ്ങൾ സൃഷ്ടിക്കുന്നു. അൽ-ജസീറയിലെ അൽ-ജുനൈദ് പട്ടണത്തിൽ നിന്നുള്ള കർഷകനായ അബ്ദുൽഹഫെസ് ദാഫല്ല, മൂന്ന് മാസം മുമ്പ് അറ്റകുറ്റപ്പണികൾ പൂർത്തിയാക്കി പ്രവർത്തനം തുടങ്ങിയ വൈദ്യുതി നിലയം വീണ്ടും ആക്രമിക്കപ്പെട്ടതിലുള്ള നിരാശ രേഖപ്പെടുത്തി. ജലസേചന പമ്പുകൾ പ്രവർത്തിക്കാനും നാല് വർഷത്തിന് ശേഷം കൃഷി പുനരാരംഭിക്കാനുമുള്ള അവരുടെ പ്രതീക്ഷകൾക്കാണ് ഇതോടെ തിരിച്ചടിയേറ്റത്.