റഷ്യൻ ഭീഷണി ജീവന് പോലും അപകടം; യാഥാർത്ഥ്യം ജനങ്ങളോട് തുറന്നുപറയണമെന്ന് യുകെ സർക്കാറിനോട് വിദഗ്ദ്ധർ!
ലണ്ടൻ : റഷ്യ ഉയർത്തുന്ന പ്രത്യക്ഷവും പരോക്ഷവുമായ വലിയ സുരക്ഷാ ഭീഷണികളെക്കുറിച്ച് ബ്രിട്ടീഷ് ജനതയോട് തുറന്നുപറയാൻ യുകെ മന്ത്രിമാർ തയ്യാറാകണമെന്ന് മുൻ ദേശീയ സുരക്ഷാ ഉപദേഷ്ടാവ് പീറ്റർ റിെക്കറ്റ്സ് (Peter Ricketts). വ്ലാഡിമിർ പുടിന്റെ സേന നടത്തുന്ന ‘ഹൈബ്രിഡ് ആക്രമണങ്ങൾ’ (Hybrid attacks) മൂലം വൈകാതെ തന്നെ ആളപായം വരെ സംഭവിച്ചേക്കാമെന്ന് മുൻ പ്രധാനമന്ത്രി ഡേവിഡ് കാമറൂണിന്റെ സുരക്ഷാ ഉപദേഷ്ടാവായിരുന്ന അദ്ദേഹം മുന്നറിയിപ്പ് നൽകി.
ബാങ്കിംഗ് സംവിധാനങ്ങൾ, ഊർജ്ജ-കുടിവെള്ള വിതരണ ശൃംഖലകൾ എന്നിവ ലക്ഷ്യമിട്ട് ക്രെംലിൻ വൻതോതിൽ സൈബർ ആക്രമണങ്ങൾക്ക് മുതിർന്നേക്കാം. അതിനാൽ ബ്രിട്ടനിലെ പ്രധാന മേഖലകളുടെ സുരക്ഷയും പ്രതിരോധ ശേഷിയും വർദ്ധിപ്പിക്കുന്നതിന് കൂടുതൽ സാമ്പത്തിക നിക്ഷേപം ആവശ്യമാണെന്ന് അദ്ദേഹം വ്യക്തമാക്കി. അമേരിക്കയ്ക്കും ഉക്രെയ്നും ഇടയിൽ ഒരു പാലമായി പ്രവർത്തിക്കാമെന്ന യുകെ പ്രധാനമന്ത്രി ആൻഡി ബർണാമിന്റെ അവകാശവാദത്തെയും റിെക്കറ്റ്സ് തള്ളിക്കളഞ്ഞു.
അമേരിക്കൻ പ്രസിഡന്റ് ഡൊണാൾഡ് ട്രംപ് റഷ്യയ്ക്കുമേലുള്ള ചില സാമ്പത്തിക ഉപരോധങ്ങൾ പിൻവലിക്കുകയും, ഉക്രെയ്നിൽ പുതിയ നേതൃത്വം വേണമെന്ന് ആവശ്യപ്പെടുകയും ചെയ്തതോടെ വാഷിംഗ്ടണും കെയ്‌വും തമ്മിലുള്ള ബന്ധം കൂടുതൽ വഷളായിട്ടുണ്ട്. ഈ സാഹചര്യത്തിൽ ഹ്രസ്വകാലത്തേക്ക് ട്രംപിന്റെ നിലപാടുകളിൽ മാറ്റം വരുത്താൻ ബ്രിട്ടന് യാതൊരു സ്വാധീനവും ചെലുത്താനാകില്ലെന്ന് റിെക്കറ്റ്സ് കൂട്ടിച്ചേർത്തു.
എം.ഐ.5 (MI5) മേധാവി സർ കെൻ മക്കല്ലം, ബ്രിട്ടീഷ് ആർമി ചീഫ് ജനറൽ സർ റോളി വാക്കർ എന്നിവരും റഷ്യൻ ഭീഷണിയെക്കുറിച്ച് കഴിഞ്ഞ ദിവസങ്ങളിൽ സമാനമായ ആശങ്ക പങ്കുവെച്ചിരുന്നു. ശീതയുദ്ധ കാലത്തേക്കാൾ കൂടുതൽ വിഭവങ്ങളാണ് നിലവിൽ റഷ്യൻ ഭീഷണികളെ ചെറുക്കാൻ എം.ഐ.5 ചെലവഴിക്കുന്നതെന്നും, റഷ്യയാണ് ഏറ്റവും വലിയ ആക്രമണകാരിയെന്നും മക്കല്ലം വ്യക്തമാക്കി. രാജ്യത്തിന്റെ പ്രതിരോധ ആവശ്യങ്ങൾക്കായി ബ്രിട്ടീഷ് ജനത വലിയ ത്യാഗങ്ങൾ സഹിക്കേണ്ടി വരുമെന്ന് വാക്കറും മുന്നറിയിപ്പ് നൽകി.
