ഭർത്താവ് മരുന്ന് നൽകി അബോധാവസ്ഥയിലാക്കിയ സ്ത്രീയെ പീഡിപ്പിച്ച സംഭവത്തിൽ 74-കാരൻ കുറ്റം സമ്മതിച്ചു.

മാഞ്ചസ്റ്റർ: ഭർത്താവ് അബോധാവസ്ഥയിലാക്കിയ സ്ത്രീയെ ക്രൂരമായി പീഡിപ്പിച്ച കേസിൽ 74-കാരനായ വയോധികൻ കുറ്റം സമ്മതിച്ചു. യുകെയിലെ ചെഷയർ സ്വദേശിയായ ഗ്രഹാം ബ്രൂഹാമാണ് മാഞ്ചസ്റ്റർ മിൻഷുൾ സ്ട്രീറ്റ് ക്രൗൺ കോടതിയിൽ വെച്ച് പീഡനക്കുറ്റം സമ്മതിച്ചത്. ഇരയായ സ്ത്രീയെ മരുന്ന് നൽകി അബോധാവസ്ഥയിലാക്കിയ ശേഷം ഭർത്താവ് തന്നെയാണ് മറ്റ് പുരുഷന്മാരെ പീഡനത്തിനായി ക്ഷണിച്ചുവരുത്തിയത്.

ഇരയുടെ പേരുവിവരങ്ങൾ രഹസ്യമായി സൂക്ഷിക്കുന്നതിന്റെ ഭാഗമായി ഭർത്താവിന്റെ പേര് പുറത്തുവിട്ടിട്ടില്ല. 60-ലധികം കുറ്റകൃത്യങ്ങളിൽ പങ്കുണ്ടെന്ന് ഇയാൾ നേരത്തെ തന്നെ സമ്മതിച്ചിട്ടുണ്ട്. പ്രതി സ്ഥാനത്തുള്ള ഏറ്റവും പ്രായം കൂടിയ വ്യക്തിയായ ബ്രൂഹാമിന് കോടതി താൽക്കാലിക ജാമ്യം അനുവദിച്ചെങ്കിലും, ദീർഘകാല തടവുശിക്ഷ തന്നെയാണ് കാത്തിരിക്കുന്നതെന്ന് ജഡ്ജി മുന്നറിയിപ്പ് നൽകി.

സംഭവവുമായി ബന്ധപ്പെട്ട് മറ്റ് രണ്ട് പേർ നേരത്തെ കുറ്റം സമ്മതിച്ചിരുന്നു. 2018-നും 2025 നവംബറിനും ഇടയിൽ നടന്ന സമാനമായ കുറ്റകൃത്യങ്ങളിൽ പങ്കുണ്ടെന്ന് ആരോപിക്കപ്പെടുന്ന മറ്റ് 10 പുരുഷന്മാർ വിചാരണ നേരിടാൻ ഒരുങ്ങുകയാണ്. നിയമപരമായ ചില കാരണങ്ങളാൽ നിലവിൽ വിചാരണ വൈകിയിട്ടുണ്ടെങ്കിലും നവംബർ ആദ്യവാരത്തോടെ വിചാരണ നടപടികൾ ആരംഭിക്കും.