യൂറോപ്യൻ യൂണിയനിൽ തിരികെ ചേരുന്നതിനെ പിന്തുണച്ച് പകുതിയോളം വോട്ടർമാർ; ജാഗ്രതയോടെ ലേബർ പാർട്ടി.

ലണ്ടൻ : അടുത്ത തിരഞ്ഞെടുപ്പിന് ശേഷം യുകെ യൂറോപ്യൻ യൂണിയനിലേക്ക് (EU) തിരികെ പ്രവേശിക്കണമെന്ന അഭിപ്രായത്തെ പിന്തുണച്ച് ഏകദേശം പകുതിയോളം വോട്ടർമാർ രംഗത്ത്. പുതിയൊരു സർവേ പ്രകാരമാണ് ഈ വിവരങ്ങൾ പുറത്തുവന്നിരിക്കുന്നത്. അതേസമയം, ബ്രെക്സിറ്റ് സംബന്ധിച്ച പഴയ ഭിന്നതകൾ വീണ്ടും ഉടലെടുക്കുമോ എന്ന ആശങ്കയിൽ ചില കാബിനറ്റ് മന്ത്രിമാർ ജാഗ്രത പാലിക്കണമെന്ന് ആവശ്യപ്പെടുന്നുണ്ട്.

യൂറോപ്യൻ യൂണിയനുമായുള്ള ബന്ധം പുനഃപരിശോധിക്കുകയും പുതിയ ഹിതപരിശോധന നടത്തുകയും ചെയ്താൽ ലേബർ പാർട്ടിയുടെ വോട്ട് വിഹിതം ഏഴ് ശതമാനം വരെ വർദ്ധിപ്പിക്കാൻ കഴിയുമെന്ന് മെസ്സീന ഗ്രൂപ്പിന്റെ (TMG) സർവേ വ്യക്തമാക്കുന്നു. തന്റെ ജീവിതകാലത്ത് യുകെ യൂണിയനിൽ തിരികെ ചേരുന്നത് കാണാൻ ആഗ്രഹിക്കുന്നുവെന്ന് പ്രധാനമന്ത്രി ആൻഡി ബർണ്ണം വ്യക്തമാക്കിയിരുന്നു. എങ്കിലും ബ്രെക്സിറ്റിനെ അനുകൂലിച്ചിരുന്ന മണ്ഡലങ്ങളിലെ എംഎൻമാർക്കിടയിൽ ഈ വിഷയത്തിൽ ആശങ്ക നിലനിൽക്കുന്നുണ്ട്.

യൂറോപ്യൻ യൂണിയനുമായി കൂടുതൽ അടുക്കുന്നതിനെ അനുകൂലിച്ച് 49 ശതമാനം ആളുകൾ അഭിപ്രായപ്പെട്ടപ്പോൾ, 28.5 ശതമാനം പേർ മാത്രമാണ് ഇതിനെ എതിർത്തത്. വ്യാപാര തടസ്സങ്ങൾ പരമാവധി കുറയ്ക്കുന്നതിനെയും ഒട്ടുമിക്ക ആളുകളും അനുകൂലിക്കുന്നുണ്ട്. എന്നാൽ കുടിയേറ്റ നിയന്ത്രണവും പരമാധികാരവും സംബന്ധിച്ച ബ്രെക്സിറ്റ് ചർച്ചകൾ ഇപ്പോഴും ജനങ്ങളെ സ്വാധീനിക്കുന്നുണ്ടെന്നും സർവേ ചൂണ്ടിക്കാണിക്കുന്നു.

യൂറോപ്യൻ യൂണിയനുമായുള്ള ബന്ധം പുനഃസ്ഥാപിക്കുന്നത് രാജ്യത്തിന്റെ സാമ്പത്തിക വളർച്ചയ്ക്കും സുരക്ഷയ്ക്കും അത്യന്താപേക്ഷിതമാണെന്ന് വിദഗ്ധർ വിലയിരുത്തുന്നു. എങ്കിലും രാഷ്ട്രീയമായി വലിയ വെല്ലുവിളികൾ നിറഞ്ഞ ഈ വിഷയത്തിൽ കരുതലോടെ നീങ്ങാനാണ് സർക്കാർ തലത്തിലുള്ള ആലോചനകൾ. വരാനിരിക്കുന്ന തിരഞ്ഞെടുപ്പുകളിൽ ഈ വിഷയം നിർണ്ണായക ചർച്ചാവിഷയമായി മാറുമെന്നാണ് കരുതുന്നത്.