ദരിദ്ര കുടുംബങ്ങൾക്ക് കൈത്താങ്ങായി ‘ഹെൽത്തി ബേബീസ്’ പദ്ധതി; എല്ലാ പ്രാദേശിക ഭരണകൂടങ്ങളിലേക്കും വ്യാപിപ്പിക്കുന്നു!

ലിവർപൂൾ: സാമ്പത്തികമായി പിന്നോക്കം നിൽക്കുന്ന കുടുംബങ്ങളിലെ കുട്ടികൾക്ക് മികച്ച പിന്തുണ നൽകുന്നതിന്റെ ഭാഗമായി ഇംഗ്ലണ്ടിലെ എല്ലാ പ്രാദേശിക ഭരണകൂടങ്ങളിലേക്കും ‘ഹെൽത്തി ബേബീസ്’ (Healthy Babies) പദ്ധതി വ്യാപിപ്പിക്കുന്നു. ലേബർ പാർട്ടി കോൺഫറൻസിൽ ആരോഗ്യ-സാമൂഹിക കാര്യ സെക്രട്ടറി വെറ്റ് കൂപ്പർ ആണ് ഈ സുപ്രധാന പ്രഖ്യാപനം നടത്തിയത്. മാതാപിതാക്കൾക്ക് കുഞ്ഞുങ്ങളുടെ കാര്യത്തിലുള്ള മാനസിക പിന്തുണയും ആരോഗ്യ പരിചരണവും ഉറപ്പാക്കുകയാണ് പദ്ധതിയുടെ ലക്ഷ്യം.

1998-ൽ ലേബർ സർക്കാർ ആവിഷ്കരിച്ച ‘ഷുവർ സ്റ്റാർ’ (Sure Start) മാതൃക പിന്തുടർന്നാണ് പുതിയ പദ്ധതി നടപ്പിലാക്കുന്നത്. എന്നാൽ കൺസർവേറ്റീവ് സർക്കാരിന്റെ കാലത്തെ വലിയ ചെലവ് ചുരുക്കലുകൾ കാരണം ഈ പദ്ധതിയുടെ ഭൂരിഭാഗവും തകർക്കപ്പെട്ടിരുന്നു. പുതിയ നയത്തിന്റെ ഭാഗമായി 500 ദശലക്ഷം പൗണ്ട് മുതൽമുടക്കിൽ 2027 ഏപ്രിലോടെ 1,000 ഫാമിലി ഹബ്ബുകൾ തുറക്കാനാണ് സർക്കാർ ലക്ഷ്യമിടുന്നത്.

വരുന്ന രണ്ട് വർഷത്തിനുള്ളിൽ ഈ പദ്ധതി ആയിരത്തോളം ഫാമിലി ഹബ്ബുകളിലേക്ക് വ്യാപിപ്പിക്കുമെന്ന് വെറ്റ് കൂപ്പർ വ്യക്തമാക്കി. രാജ്യത്തെ പകുതിയോളം പ്രദേശങ്ങളിലും ഇത്തരം സേവനങ്ങൾ ഇല്ലാത്ത അവസ്ഥയുണ്ട്. അമ്മമാർക്കും അച്ഛന്മാർക്കുമുള്ള മാനസികാരോഗ്യ പിന്തുണയും മുലയൂട്ടൽ സഹായങ്ങളും ഇനി എല്ലാ കുടുംബ കേന്ദ്രങ്ങളിലും ലഭ്യമാക്കുമെന്ന് അവർ കൂട്ടിച്ചേർത്തു.

സമൂഹത്തിലെ ഏറ്റവും ദരിദ്രരായ കുടുംബങ്ങളിലെ കുട്ടികൾ സ്കൂളിൽ എത്തുന്നതിന് മുമ്പ് തന്നെ പിന്നോക്കാവസ്ഥയിലാകുന്ന സാഹചര്യം ഒഴിവാക്കാൻ ഈ പദ്ധതി സഹായിക്കുമെന്ന് സർക്കാർ വിലയിരുത്തുന്നു. ഇതിന്റെ ഭാഗമായി ഏറ്റവും പിന്നോക്കം നിൽക്കുന്ന പ്രദേശങ്ങളിൽ യോഗ്യതയുള്ള ഏർലി ഇയേഴ്സ് അധ്യാപകരെ നിയമിക്കാനും വിദ്യാഭ്യാസ വകുപ്പ് തീരുമാനിച്ചിട്ടുണ്ട്.