വെള്ളപ്പൊക്ക ഭീഷണി: യുകെയിലെ പുതിയ വീടുകൾക്ക് ഇൻഷുറൻസ് ലഭിക്കാത്ത അവസ്ഥയെന്ന് അവിവ മേധാവി.

ലണ്ടൻ (യുകെ): ഇംഗ്ലണ്ടിൽ ഇപ്പോൾ നിർമ്മിച്ചുകൊണ്ടിരിക്കുന്ന പതിനായിരക്കണക്കിന് വീടുകൾ ഭാവിയിൽ ഇൻഷുറൻസ് പരിരക്ഷ ലഭിക്കാത്ത അവസ്ഥയിലേക്ക് മാറിയേക്കുമെന്ന് യുകെയിലെ പ്രമുഖ ഇൻഷുറൻസ് കമ്പനിയായ അവിവയുടെ (Aviva) ചീഫ് എക്സിക്യൂട്ടീവ് അമാൻഡ ബ്ലാങ്ക്. വെള്ളപ്പൊക്ക സാധ്യതയുള്ള മേഖലകളിലാണ് ഇത്തരം വീടുകളിൽ ഭൂരിഭാഗവും നിർമ്മിക്കപ്പെടുന്നത്. വരണ്ട കാലാവസ്ഥയ്ക്ക് ശേഷം പെട്ടെന്നുണ്ടാകുന്ന ശക്തമായ മഴ ഉപരിതല വെള്ളപ്പൊക്കത്തിന് (Surface water flooding) കാരണമാകുന്നുണ്ടെന്നും കാലാവസ്ഥാ വ്യതിയാനം കാരണം ഈ ഭീഷണി വർദ്ധിച്ചുവരികയാണെന്നും ബി.ബി.സിക്കു നൽകിയ അഭിമുഖത്തിൽ അവർ വ്യക്തമാക്കി.

കഴിഞ്ഞ 10 വർഷത്തിനിടെ 1,10,000 വീടുകളാണ് വെള്ളപ്പൊക്ക ഭീഷണിയുള്ള പ്രദേശങ്ങളിൽ നിർമ്മിക്കപ്പെട്ടത്. വരും പതിറ്റാണ്ടിൽ 1,15,000 വീടുകൾ കൂടി ഇത്തരത്തിൽ നിർമ്മിക്കപ്പെടാൻ സാധ്യതയുണ്ടെന്ന് അവർ ചൂണ്ടിക്കാട്ടി. ഒരു ദുരന്തം ഉറപ്പായും സംഭവിക്കുമെന്ന് അറിയാവുന്ന സ്ഥലങ്ങളിൽ ഇൻഷുറൻസ് പരിരക്ഷ നൽകുന്നത് അസാധ്യമാണ്. നിലവിൽ ഇംഗ്ലണ്ടിലെ 6.3 ദശലക്ഷം വീടുകളും സ്ഥാപനങ്ങളും വെള്ളപ്പൊക്ക ഭീഷണിയിലാണ്.

വെള്ളപ്പൊക്കത്തിൽ വീടുകൾക്കുണ്ടാകുന്ന നാശനഷ്ടങ്ങൾ കുറയ്ക്കാൻ ആവശ്യമായ മുൻകരുതലുകൾ കെട്ടിട നിർമ്മാണത്തിൽ സ്വീകരിക്കണമെന്ന് അമാൻഡ നിർദ്ദേശിച്ചു. ഉയർന്ന തലത്തിൽ പ്ലഗ് പോയിന്റുകൾ സ്ഥാപിക്കുക, സ്റ്റീൽ അടുക്കളകൾ നിർമ്മിക്കുക തുടങ്ങിയ മാറ്റങ്ങളിലൂടെ അപകടസാധ്യത കുറയ്ക്കാനാകും. ഇൻഷുറൻസ് ലഭിക്കാത്ത സാഹചര്യമുണ്ടായാൽ വീടുകൾ വിൽക്കാനും മോർട്ട്ഗേജ് ലഭിക്കാനും ഉടമകൾ കടുത്ത ബുദ്ധിമുട്ട് നേരിടേണ്ടിവരും. കാലാവസ്ഥാ വ്യതിയാനം മൂലം ചില നഗരങ്ങൾ തന്നെ ആളുകൾക്ക് ഉപേക്ഷിക്കേണ്ടി വന്നേക്കാമെന്ന് പഠനങ്ങൾ സൂചിപ്പിക്കുന്നു.

ഒക്ടോബർ 28-ന് അവതരിപ്പിക്കുന്ന പുതിയ ബജറ്റിന് മുന്നോടിയായി പെൻഷൻ നയങ്ങളിൽ അനാവശ്യ ഊഹാപോഹങ്ങൾ പ്രചരിപ്പിക്കരുതെന്ന് അമാൻഡ ഗവൺമെന്റിനോട് അഭ്യർത്ഥിച്ചു. പെൻഷൻ നിയമങ്ങൾ മാറിയേക്കുമെന്ന ഭയം കാരണം കഴിഞ്ഞ വർഷങ്ങളിൽ സാധാരണയേക്കാൾ 30 ഇരട്ടി ആളുകളാണ് തുക പിൻവലിച്ചത്. നികുതിരഹിത തുക മുൻകൂട്ടി പിൻവലിക്കുന്നത് ഉപഭോക്താക്കൾക്ക് പിന്നീട് വലിയ നഷ്ടമുണ്ടാക്കുമെന്നും അവർ വ്യക്തമാക്കി. കൂടാതെ, ബി.പി (BP) ബോർഡിലെ തൻ്റെ ചുമതലകളിൽ നിന്ന് അടുത്ത വർഷം പടിയിറങ്ങുമെന്നും അവർ അറിയിച്ചു.