270 ദിവസത്തെ കടൽദൗത്യത്തിന് ശേഷം യുഎസ് സൈനികർ തായ്‌ലൻഡിൽ; പത്തായയിൽ കടുത്ത സുരക്ഷ!
പത്തായ: തുടർച്ചയായി 270-ലധികം ദിവസങ്ങൾ കടലിൽ ചെലവഴിച്ച അമേരിക്കൻ വിമാനവാഹിനിക്കപ്പലായ ‘യുഎസ്എസ് അബ്രഹാം ലിങ്കണിലെ’ (USS Abraham Lincoln) ആയിരക്കണക്കിന് സൈനികരെ സ്വീകരിക്കാൻ തായ് നഗരമായ പത്തായയിൽ സുരക്ഷ ശക്തമാക്കി. വിശ്രമത്തിനും വിനോദത്തിനുമായി എത്തുന്ന സൈനികർക്കായി 600-ഓളം സുരക്ഷാ ഉദ്യോഗസ്ഥരെയാണ് പ്രദേശത്ത് വിന്യസിച്ചിരിക്കുന്നത്. മിഡിൽ ഈസ്റ്റിൽ ഇറാനെതിരെയുള്ള യുഎസ് തന്ത്രപ്രധാന ദൗത്യങ്ങൾക്ക് ശേഷമാണ് ആണവോർജ്ജത്തിൽ പ്രവർത്തിക്കുന്ന ഈ കൂറ്റൻ യുദ്ധക്കപ്പൽ തായ്‌ലൻഡിൽ നങ്കൂരമിട്ടത്.
ലാം ചബാംഗ് തുറമുഖത്ത് എത്തിയ കപ്പലിൽ നിന്നും സൈനികരെ പത്തായ നഗരത്തിലേക്ക് എത്തിക്കാൻ പ്രത്യേക ബസ് സർവീസുകൾ ഏർപ്പെടുത്തിയിട്ടുണ്ട്. തായ്‌ലൻഡിൽ കഴിയുന്ന ദിവസങ്ങളിൽ സൈനികർക്ക് കഞ്ചാവ് ഉപയോഗത്തിനും പാരാസെയിലിംഗ് പോലുള്ള അപകടകരമായ വിനോദങ്ങൾക്കും യുഎസ് അധികൃതർ വിലക്കേർപ്പെടുത്തി. കൂടാതെ പ്രാദേശിക ബിസിനസ്സുകൾ വിദേശ സൈനികരിൽ നിന്ന് അമിത നിരക്ക് ഈടാക്കരുതെന്ന് തായ് ഭരണകൂടം മുന്നറിയിപ്പ് നൽകിയിട്ടുണ്ട്.
കപ്പലിലെ നീണ്ട നാളത്തെ കഠിനമായ ജീവിത സാഹചര്യങ്ങളും മാനസിക സംഘർഷങ്ങളും മൂലം ചില സൈനികർ ആത്മഹത്യയ്ക്ക് ശ്രമിച്ച വാർത്തകൾ മുൻപ് യുഎസ് മാധ്യമങ്ങളിൽ വലിയ ചർച്ചയായിരുന്നു. ഇതിനെത്തുടർന്ന് ഡൊണാൾഡ് ട്രംപ് സർക്കാരിന്റെ യുദ്ധ നയങ്ങൾക്കെതിരെ കടുത്ത വിമർശനവും ഉയർന്നിരുന്നു. പത്തായയിലെ നൈറ്റ്‌ലൈഫ് കേന്ദ്രങ്ങളിലും ബീച്ചുകളിലും കടുത്ത സുരക്ഷാ പരിശോധനകളാണ് പോലീസ് ഏർപ്പെടുത്തിയിട്ടുള്ളത്.
ഇറാൻ യുദ്ധത്തെത്തുടർന്ന് വിനോദസഞ്ചാര മേഖലയിലുണ്ടായ മന്ദഗതി മറികടക്കാൻ യുഎസ് സൈനികരുടെ വരവ് സഹായിക്കുമെന്ന പ്രതീക്ഷയിലാണ് പ്രാദേശിക കച്ചവടക്കാർ. ഞായറാഴ്ച വരെ പത്തായയിൽ ചെലവഴിച്ച ശേഷം യുഎസ്എസ് അബ്രഹാം ലിങ്കൺ അമേരിക്കയിലേക്ക് മടങ്ങും. ഏഷ്യൻ മേഖലയിൽ ചുമതലയുള്ള ‘യുഎസ്എസ് ജോർജ്ജ് വാഷിംഗ്ടൺ’ ആണ് നിലവിൽ മിഡിൽ ഈസ്റ്റിൽ ലിങ്കണ് പകരം ദൗത്യം ഏറ്റെടുത്തിരിക്കുന്നത്.
