10,000 അടി ഉയരത്തിൽ 6 ഇഞ്ച് പാറക്കെട്ടിൽ കുടുങ്ങി; അർദ്ധരാത്രിയിൽ അത്ഭുതകരമായി ജീവൻ രക്ഷിച്ച് മൗണ്ടൻ റെസ്ക്യൂ ടീം!

കാലിഫോർണിയ: കാലിഫോർണിയയിലെ സിയറ നെവാഡ പർവ്വതനിരകളിൽ 10,000 അടിയോളം ഉയരത്തിൽ 6 ഇഞ്ച് മാത്രം വീതിയുള്ള ഇടുങ്ങിയ പാറക്കെട്ടിൽ മണിക്കൂറുകളോളം കുടുങ്ങിയ മലകയറ്റക്കാരനെ സന്നദ്ധ രക്ഷാപ്രവർത്തകർ സാഹസികമായി രക്ഷപ്പെടുത്തി. ലോറൽ മൗണ്ടനിലെ മൻഡൻഹാൾ കൂളോയർ പാതയിലൂടെ കൂട്ടുകാരനുമൊത്ത് കയറുന്നതിനിടെ അബദ്ധത്തിൽ വഴിതെറ്റിയതാണ് അപകടത്തിന് കാരണമായത്. ഈ മേഖലയിലെ വഴിതെറ്റൽ അതീവ മാരകമായ വീഴ്ചകളിലേക്ക് നയിക്കാറുണ്ടെന്ന് മോണോ കൗണ്ടി സെർച്ച് ആൻഡ് റെസ്ക്യൂ ടീം വ്യക്തമാക്കി.

പർവ്വതാരോഹകന് അപകടം സംഭവിച്ച വിവരം ഷെരീഫിന്റെ ഓഫീസിൽ നിന്ന് ലഭിച്ചതിനെ തുടർന്ന് മണിക്കൂറുകളോളം നടത്തിയ തിരച്ചിലിനൊടുവിലാണ് ദൂരെയൊരു ശബ്ദം കേട്ട് റെസ്ക്യൂ ടീം ആളെയ കണ്ടെത്തിയത്. ശക്തമായ കാറ്റ് വീശിയടിച്ചതിനാൽ ഹെലികോപ്റ്റർ മാർഗ്ഗം എയർലിഫ്റ്റ് ചെയ്യുക അസാധ്യമായിരുന്നു. കൂടാതെ തണുപ്പിൽ രാത്രി മുഴുവൻ അവിടെ കഴിഞ്ഞാൽ താഴേക്ക് പതിക്കാൻ സാധ്യതയേറെയാണെന്ന് മനസ്സിലാക്കിയ സന്നദ്ധപ്രവർത്തകർ രാത്രിതന്നെ കാൽനടയായി കുന്നുകയറി ദൗത്യം ആരംഭിക്കുകയായിരുന്നു.

തലയിലെ ടോർച്ചിന്റെ വെളിച്ചത്തിൽ അതിസാഹസികമായാണ് രക്ഷാപ്രവർത്തകർ അർദ്ധരാത്രിയിൽ പർവ്വതം കയറിയത്. പർവ്വതാരോഹകന് മുകളിൽ നിന്ന് എത്തിച്ചേർന്ന ഒരു രക്ഷാപ്രവർത്തകൻ അദ്ദേഹത്തെ റോപ്പ് സിസ്റ്റത്തിൽ സുരക്ഷിതമായി ബന്ധിപ്പിച്ച് താഴേക്ക് ഇറക്കുകയായിരുന്നു. ഞായറാഴ്ച പുലർച്ചെയോടെയാണ് അതിസാഹസികമായ ഈ ദൗത്യം വിജയകരമായി അവസാനിച്ചത്.

അതീവ ഗുരുതരമായ സാഹചര്യത്തിലും പ്രതീക്ഷ കൈവിടാതെ ഉറച്ചുനിന്ന മലകയറ്റക്കാരന്റെ മനോധൈര്യമാണ് അദ്ദേഹത്തിന്റെ ജീവൻ രക്ഷിച്ചതെന്ന് ദൗത്യത്തിൽ പങ്കെടുത്ത രക്ഷാപ്രവർത്തകർ പറഞ്ഞു. നിമിഷങ്ങൾ വൈകിയിരുന്നെങ്കിൽ ദുരന്തമായി മാറുമായിരുന്ന ഈ സംഭവത്തിൽ പർവ്വതാരോഹകന്റെ അത്ഭുതകരമായ തിരിച്ചുവരവിനെ വലിയ ആദരവോടെയാണ് സന്നദ്ധസംഘം കാണുന്നത്.