സ്വിറ്റ്‌സർലൻഡ് പ്ലസ്’ മാതൃകയിൽ യുകെയ്ക്ക് ഇയുവിൽ തിരികെയെത്താം; വ്യക്തത വരുത്തി യൂറോപ്യൻ പാർലമെന്റ്!
ബ്രസൽസ്: യുകെ യൂറോപ്യൻ യൂണിയനുമായുള്ള ബന്ധം ശക്തിപ്പെടുത്താൻ തീരുമാനിക്കുകയാണെങ്കിൽ, ഏതാനും മാസങ്ങൾക്കുള്ളിൽ ‘സ്വിറ്റ്‌സർലൻഡ് പ്ലസ്’ (Switzerland plus) മാതൃകയിൽ കരാർ സാധ്യമാക്കാമെന്ന് യൂറോപ്യൻ പാർലമെന്റ് ട്രേഡ് കമ്മിറ്റി അധ്യക്ഷൻ ബെൻഡ് ലാങ് (Bernd Lange) വ്യക്തമാക്കി. ബ്രിട്ടൻ യൂറോപ്യൻ യൂണിയനിലേക്ക് തിരികെ വരണമെന്ന് ആഗ്രഹിക്കുന്നതായി അറിയിച്ച ലാങ്, തുറന്ന വിപണികളെയും ജനാധിപത്യത്തെയും പ്രോത്സാഹിപ്പിച്ചിരുന്ന യുകെയുടെ അഭാവം തീരുമാനങ്ങളിൽ പ്രതിഫലിക്കുന്നുണ്ടെന്നും കൂട്ടിച്ചേർത്തു.
യൂറോപ്യൻ യൂണിയൻ അംഗമല്ലെങ്കിലും, കഴിഞ്ഞ വർഷം ഒപ്പുവെച്ച നൂറിലധികം കരാറുകളിലൂടെ യൂറോപ്പിന്റെ ഏകീകൃത വിപണിയിൽ (single market) തടസ്സമില്ലാത്ത പ്രവേശനം സ്വിറ്റ്‌സർലൻഡ് ഉറപ്പാക്കിയിട്ടുണ്ട്. വൈദ്യുതി വിപണി, ബഹിരാകാശ പദ്ധതികൾ, എറാസ്മസ്, ഡിജിറ്റൽ ഗവേഷണ പദ്ധതികൾ എന്നിവയിൽ സ്വിറ്റ്‌സർലൻഡിന് പങ്കാളിത്തമുണ്ട്. ഇതിന് പകരമായി സ്വതന്ത്ര ജനസഞ്ചാരവും യൂറോപ്യൻ യൂണിയന്റെ സാമ്പത്തിക ഫണ്ടിലേക്ക് വാർഷിക വിഹിതവും നൽകാൻ അവർ സമ്മതിക്കുകയായിരുന്നു. ഈ മാതൃക യുകെയ്ക്കും നടപ്പിലാക്കാവുന്നതാണെന്നാണ് ലാങ് നിർദ്ദേശിക്കുന്നത്.
ലണ്ടൻ സന്ദർശനവേളയിൽ സംസാരിച്ച ലാങ്, യുകെ വ്യാപാര മന്ത്രി അനസ് സർവാറുമായും (Anas Sarwar) കൂടിക്കാഴ്ച നടത്തുന്നുണ്ട്. യൂറോപ്യൻ യൂണിയന്റെ വരാനിരിക്കുന്ന ‘മേഡ് ഇൻ യൂറോപ്പ്’ (Made in Europe) നിയമനിർമ്മാണത്തിൽ നിന്ന് യുകെയെ ഒഴിവാക്കരുതെന്ന ബ്രിട്ടീഷ് പ്രധാനമന്ത്രി ആൻഡി ബർണാമിന്റെ ആവശ്യത്തെയും അദ്ദേഹം പിന്തുണച്ചു. ലണ്ടനുമായുള്ള വ്യവസായ ബന്ധങ്ങൾ നിലനിർത്തുന്നത് ഇരുവിഭാഗത്തിനും നേട്ടമാകുമെന്നാണ് വിലയിരുത്തൽ.
യൂറോപ്യൻ യൂണിയനുമായി കൂടുതൽ അടുക്കുന്ന കാര്യത്തിൽ അന്തിമ തീരുമാനം എടുക്കേണ്ടത് ബ്രിട്ടൻ തന്നെയാണ്. നിർദ്ദിഷ്ട നയങ്ങളിൽ മാറ്റം വരുത്താൻ തയ്യാറായാൽ രാഷ്ട്രീയ തടസ്സങ്ങളില്ലാതെ ദ്രുതഗതിയിൽ ധാരണയിലെത്താൻ സാധിക്കും. എന്നാൽ ഫ്രാൻസ് ഉൾപ്പെടെയുള്ള രാജ്യങ്ങളുടെ നിലപാടുകളും ഫ്രഞ്ച് പ്രസിഡന്റ് തിരഞ്ഞെടുപ്പും ഈ വിഷയത്തിൽ സുപ്രധാന ഘടകങ്ങളായി മാറും.
