സ്ത്രീവിരുദ്ധതയെ വിമർശിക്കാൻ ശ്രമിച്ച പരസ്യം വിനയായി; ചൈനയിൽ പരസ്യത്തിനെതിരെ വൻ പ്രതിഷേധം ഉയർന്നതോടെ മാപ്പപേക്ഷിച്ച് ഡെറ്റോൾ.

ബീജിംഗ്: ചൈനയിൽ പുറത്തിറക്കിയ പരസ്യം വലിയ വിവാദമായതിനെ തുടർന്ന് പ്രമുഖ ബ്രിട്ടീഷ് ശുചിത്വ ബ്രാൻഡായ ഡെറ്റോൾ (Dettol) പരസ്യമായി മാപ്പ് പറഞ്ഞു. പുരുഷന്മാരിലെ സ്ത്രീവിരുദ്ധ മനോഭാവത്തെ വിമർശിക്കാൻ ഉദ്ദേശിച്ചാണ് അഞ്ച് മിനിറ്റ് ദൈർഘ്യമുള്ള ഈ പരസ്യം നിർമ്മിച്ചതെന്നാണ് കമ്പനി അവകാശപ്പെടുന്നത്. എന്നാൽ പരസ്യം സ്ത്രീകളെ അധിക്ഷേപിക്കുന്നതാണെന്ന് ചൂണ്ടിക്കാട്ടി സോഷ്യൽ മീഡിയയിൽ വ്യാപകമായ പ്രതിഷേധം ഉയർന്നതോടെയാണ് കമ്പനി മാപ്പപേക്ഷയുമായി രംഗത്തെത്തിയത്.

മേയ് മാസാവസാനം വിവിധ ഓൺലൈൻ പ്ലാറ്റ്‌ഫോമുകളിലൂടെ പുറത്തിറക്കിയ ഒരു ഡിസിൻഫെക്റ്റന്റിന്റെ പരസ്യമാണ് വിവാദങ്ങൾക്ക് കാരണമായത്. പരസ്യത്തിലെ പുരുഷ കഥാപാത്രം തന്റെ നിലവിലെ കാമുകിയെ മുൻ കാമുകിയുമായി താരതമ്യം ചെയ്യുകയും, മുൻ കാമുകി മറ്റൊരാൾക്കൊപ്പം ജീവിച്ചിരുന്നു എന്ന് അറിയുമ്പോൾ ആ ബന്ധത്തെ ‘സെക്കൻഡ് ഹാൻഡ് സർവീസ്’ എന്ന് അധിക്ഷേപിക്കുകയും ചെയ്യുന്നുണ്ട്. താൻ ഒരു വിർജിൻ (കന്യകൻ) ആയിരിക്കില്ലെന്നും എന്നാൽ തന്റെ ഭാവി വധു മറ്റാരും സ്പർശിക്കാത്തവളും ശുദ്ധിയുള്ളവളുമായിരിക്കണമെന്നും ഇയാൾ സുഹൃത്തുക്കളോട് പറയുന്നതാണ് പരസ്യത്തിലുള്ളത്.

തുടർന്ന് ഈ വിവരങ്ങൾ അറിയുന്ന പുതിയ കാമുകി അയാളുടെ സ്ത്രീവിരുദ്ധതയെ ചോദ്യം ചെയ്യുകയും ബന്ധം വേർപെടുത്തുകയും ചെയ്യുന്നു. ഇയാളുടെ സോക്സുകൾ വാഷിംഗ് മെഷീനിലേക്ക് ഇട്ടുകൊണ്ട്, “ഇത്തരം മലിനമായ മനോഭാവമുള്ള പുരുഷന്മാർ അണുക്കളെപ്പോലെയാണ് – മനസ്സിന് സമാധാനം ലഭിക്കാൻ അവരെ ഡെറ്റോൾ ഉപയോഗിച്ച് പൂർണ്ണമായി ഇല്ലാതാക്കണം” എന്ന വോയ്‌സ് ഓവറോടെയാണ് പരസ്യം അവസാനിക്കുന്നത്സ്ത്രീകളെ അപമാനിക്കുന്ന പരസ്യം നിർമ്മിച്ച ഡെറ്റോൾ ഉൽപ്പന്നങ്ങൾ ബഹിഷ്കരിക്കാൻ വലിയ രീതിയിൽ ആഹ്വാനമുയർന്നു.

ബ്രിട്ടീഷ് ബഹുരാഷ്ട്ര കമ്പനിയായ റെക്കിറ്റിന്റെ (Reckitt) ഉടമസ്ഥതയിലുള്ള ഡെറ്റോൾ, പ്രതിഷേധം ശക്തമായതിനെ തുടർന്ന് ഞായറാഴ്ച പരസ്യം പിൻവലിച്ചു. ലിംഗസമത്വമില്ലായ്മയെ ചോദ്യം ചെയ്യാനും ആരോഗ്യകരമായ ബന്ധങ്ങളെ പ്രോത്സാഹിപ്പിക്കാനുമാണ് പരസ്യത്തിലൂടെ ശ്രമിച്ചതെന്നും എന്നാൽ ഓൺലൈനിൽ പ്രചരിച്ച എഡിറ്റ് ചെയ്ത ക്ലിപ്പുകൾ യഥാർത്ഥ സന്ദേശത്തെ തെറ്റായി ചിത്രീകരിക്കുകയാണുണ്ടായതെന്നും കമ്പനി വിശദീകരിച്ചു. പരസ്യം ഒരു തേർഡ് പാർട്ടി ഏജൻസിയാണ് നിർമ്മിച്ചതെങ്കിലും അതിന്റെ ഉള്ളടക്കം പരിശോധിക്കുന്നതിലുണ്ടായ വീഴ്ചയുടെ ഉത്തരവാദിത്തം ഏറ്റെടുക്കുന്നുവെന്നും ഓരോ വ്യക്തിയുടെയും അന്തസ്സ് സംരക്ഷിക്കാൻ തങ്ങൾക്ക് ബാധ്യതയുണ്ടെന്നും ഡെറ്റോൾ മാപ്പപേക്ഷയിൽ വ്യക്തമാക്കി.