സൈൻ ബോർഡ് തകർന്നുവീണ് വൻ ദുരന്തം; പ്രശസ്ത സംഗീത മേളയിൽ ഒരാൾ മരിച്ചു, ചടങ്ങ് റദ്ദാക്കി!

വെസ്റ്റ് സസെക്സ്: ഇംഗ്ലണ്ടിലെ വെസ്റ്റ് സസെക്സിലെ സ്റ്റെയ്‌നിംഗിന് സമീപം നടന്ന ‘ബിഗ് ചർച്ച് ഫെസ്റ്റിവൽ 2026’ എന്ന പ്രശസ്തമായ ക്രൈസ്തവ സംഗീത മേളയിൽ വലിയ സൈൻ ബോർഡ് തകർന്നുവീണ് ഒരാൾ കൊല്ലപ്പെടുകയും ആറുപേർക്ക് പരിക്കേൽക്കുകയും ചെയ്തു. ഈസ്റ്റ്ബേൺ സ്വദേശിയായ 41 വയസ്സുകാരനാണ് സംഭവസ്ഥലത്തുതന്നെ മരിച്ചത്. പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ച് അടിയന്തര ചികിത്സ നൽകിവരികയാണ്.

വെള്ളിയാഴ്ച ഉച്ചകഴിഞ്ഞ് നടന്ന ഈ ദാരുണ സംഭവത്തെ തുടർന്ന് ഞായറാഴ്ച വരെ നടക്കേണ്ടിയിരുന്ന സംഗീത മേള സംഘാടകർ പൂർണ്ണമായി റദ്ദാക്കി. സ്ഥലത്തുണ്ടായിരുന്ന പതിനായിരക്കണക്കിന് സന്ദർശകരോട് ഉടനടി സ്ഥലം വിടാൻ അധികൃതർ നിർദ്ദേശിച്ചു. തങ്ങളുടെ ചിന്തകളും പ്രാർത്ഥനകളും ദുരന്തത്തിന് ഇരയായവർക്കൊപ്പമാണെന്നും ഏറെ ദുഃഖത്തോടെയാണ് പരിപാടി ഉപേക്ഷിക്കുന്നതെന്നും സംഘാടകർ സമൂഹമാധ്യമങ്ങളിലൂടെ അറിയിച്ചു.

സംഭവത്തെക്കുറിച്ച് സസെക്സ് പോലീസ് സമഗ്രമായ അന്വേഷണം ആരംഭിച്ചിട്ടുണ്ട്. അപകടത്തെക്കുറിച്ചുള്ള കൂടുതൽ വിവരങ്ങളോ വീഡിയോ ദൃശ്യങ്ങളോ കൈവശമുള്ളവർ പോലീസുമായി ബന്ധപ്പെടണമെന്ന് പോലീസ് ചീഫ് ഡിസിഎസ് റിച്ചാർഡ് മക്ഡൊണാ അഭ്യർത്ഥിച്ചു. യുകെ ഹെൽത്ത് ആൻഡ് സേഫ്റ്റി എക്സിക്യൂട്ടീവിനും ലോക്കൽ അതോറിറ്റിക്കും കേസ് സംബന്ധിച്ച റിപ്പോർട്ട് നൽകിയിട്ടുണ്ട്.

വൻജനപങ്കാളിത്തമുള്ള സംഗീതമേളയിൽ നടന്ന ഈ അപകടം വൻ ഞെട്ടലാണ് ഉണ്ടാക്കിയിട്ടുള്ളത്. സുരക്ഷാ മാനദണ്ഡങ്ങളിൽ വീഴ്ച പറ്റിയിട്ടുണ്ടോ എന്ന് അന്വേഷിച്ചു വരികയാണെന്നും ദുരന്തബാധിത കുടുംബങ്ങൾക്ക് ആവശ്യമായ എല്ലാ സഹായങ്ങളും നൽകുമെന്നും അധികൃതർ അറിയിച്ചു.