സാലഡുകൾ വേണ്ട, ചൂടേറിയ കട്ടികാടിയും വൈനും മതി: ഉഷ്ണതരംഗത്തിനിടെ യുകെയിൽ വൻ മാറ്റം!
ലണ്ടൻ: കനത്ത ഉഷ്ണതരംഗത്തിൽ തണുത്ത സാലഡുകളും വൈനുകളും കഴിക്കുന്നതിന് പകരം ചൂടുള്ളതും കട്ടിയുള്ളതുമായ പരമ്പരാഗത വിഭവങ്ങൾ തേടി ബ്രിട്ടീഷ് ജനത. വേനൽച്ചൂടിൽ വിന്റർ കാലത്ത് കഴിക്കാറുള്ള കോട്ടേജ് പൈ (Cottage pie), ചിക്കൻ കുർമ തുടങ്ങിയ വിഭവങ്ങളുടെ വിൽപന കുത്തനെ ഉയർന്നതോടെ “റിവേഴ്സ് കംഫർട്ട് ഈറ്റിംഗ്” (Reverse comfort eating) എന്ന പുതിയ ട്രെൻഡ് രാജ്യത്ത് ശ്രദ്ധനേടുകയാണ്. പ്രമുഖ സൂപ്പർമാർക്കറ്റ് ശൃംഖലയായ ‘വെയിട്രോസ്’ (Waitrose) പുറത്തുവിട്ട കണക്കുകൾ പ്രകാരം കഴിഞ്ഞ മാസങ്ങളിൽ കോട്ടേജ് പൈ വിൽപനയിൽ 110 ശതമാനവും സൌത്ത് ആഫ്രിക്കൻ റെഡ് വൈൻ വിൽപനയിൽ 68 ശതമാനവും വർദ്ധനവുണ്ടായി.
ഇതിനു പുറമെ ചിക്കൻ കൊർമ (67%), ചിക്കൻ ആൻഡ് ഹാം ഗ്രാറ്റിൻ (68%), സ്പാഗെറ്റി ബോലോഗ്നീസ് (91%) തുടങ്ങിയ വിഭവങ്ങൾക്കായുള്ള റെസിപ്പി തിരച്ചിലുകളും ഇന്റർനെറ്റിൽ വലിയ തോതിൽ വർദ്ധിച്ചിട്ടുണ്ട്. കഠിനമായ ചൂടിൽ വീടുകളിൽ സമയം ചെലവഴിക്കുന്ന ആളുകൾ തണുത്ത വിഭവങ്ങളേക്കാൾ കൂടുതൽ ഊർജ്ജവും തൃപ്തിയും നൽകുന്ന ഭക്ഷണങ്ങൾ തെരഞ്ഞെടുക്കുന്നതാണ് ഇതിന് കാരണം. വാർഷിക സംഗീത മേളകളിലും ജനങ്ങൾ തണുത്ത ഭക്ഷണങ്ങൾക്ക് പകരം പാരമ്പര്യമായി തയാറാക്കുന്ന ചൂടുള്ള ഭക്ഷണങ്ങൾ ആഗ്രഹിച്ചതായി ഭക്ഷ്യ ചരിത്രകാരന്മാർ വെളിപ്പെടുത്തുന്നു.
രാജ്യത്തെ നിലവിലെ സാമ്പത്തിക മാന്ദ്യം, ആഗോളതലത്തിലെ യുദ്ധങ്ങൾ, രാഷ്ട്രീയ അസ്ഥിരതകൾ, ഒപ്പം മാറിമറിയുന്ന കാലാവസ്ഥ എന്നിവ ജനങ്ങളിൽ വലിയ തോതിൽ ആശങ്കയും മാനസിക സമ്മർദ്ദവും ഉണ്ടാക്കുന്നുണ്ടെന്ന് വിദഗ്ദ്ധർ ചൂണ്ടിക്കാണിക്കുന്നു. ഇത്തരം സങ്കീർണ്ണമായ സാഹചര്യങ്ങളിൽ ആളുകൾ തങ്ങൾക്ക് മാനസിക ആശ്വാസം നൽകുന്ന, ബാല്യകാല ഓർമ്മകൾ ഉണർത്തുന്ന ‘കംഫർട്ട് ഫുഡ്’ (Comfort food) കഴിക്കാൻ ആഗ്രഹിക്കുന്നു.
ചൂടുകാലത്ത് കഠിനാധ്വാനം ചെയ്ത് തളരുന്ന ശരീരത്തിന് പെട്ടെന്ന് ഊർജ്ജം വീണ്ടെടുക്കാൻ കട്ടിയുള്ള ഭക്ഷണങ്ങൾ സഹായിക്കുമെന്നാണ് വെയിട്രോസിന്റെ ഷെഫ് സ്റ്റീഫൻ പാർക്കിൻസ് വിശ്വസിക്കുന്നത്. പരമ്പരാഗത ബ്രിട്ടീഷ് വിഭവങ്ങൾക്ക് ഒപ്പം ചിക്കൻ കുർമ പോലുള്ള വിദേശ വിഭവങ്ങളും ജനപ്രിയ പട്ടികയിൽ ഇടംപിടിച്ചത് യുകെയുടെ ബഹുസംസ്കാരത്തെയും തുറന്ന മനോഭാവത്തെയുമാണ് കാണിക്കുന്നത്.
