സമൂഹമാധ്യമ പോസ്റ്റിന്റെ പേരിൽ 23 കാരിക്ക് വധശിക്ഷ; ഇറാനെതിരെ ശക്തമായ പ്രതിഷേധവുമായി മനുഷ്യാവകാശ സംഘടനകൾ.
ടെെറാൻ, ഇറാൻ: സമൂഹമാധ്യമങ്ങളിലെ പോസ്റ്റുകളുടെ പേരിൽ 23 കാരിയായ അക്കൗണ്ടിങ് വിദ്യാർത്ഥിനിക്ക് വധശിക്ഷ വിധിച്ച ഇറാൻ കോടതി നടപടിക്കെതിരെ അന്താരാഷ്ട്ര തലത്തിൽ വ്യാപക പ്രതിഷേധം. മഷാദ് നഗരത്തിലെ വാകിലാബാദ് ജയിലിൽ കഴിയുന്ന നജ്മെ അമിനി (Najmeh Amini) എന്ന യുവതിക്കാണ് ‘ദൂഷണം’ (blasphemy) ആരോപിച്ചുകൊണ്ട് ക്രിമിനൽ കോടതി വധശിക്ഷ വിധിച്ചത്. പ്രവാചകനെ അപകീർത്തിപ്പെടുത്തിയെന്ന കുറ്റത്തിന് പുറമെ, രാജ്യസുരക്ഷയ്‌ക്കെതിരെ പ്രവർത്തിച്ചുവെന്ന കേസിൽ 12 വർഷത്തിലധികം തടവും മറ്റൊരു കോടതി വിധിച്ചിട്ടുണ്ട്.
കഴിഞ്ഞ ജനുവരിയിൽ ഇറാനിലുടനീളം നടന്ന ഭരണകൂട വിരുദ്ധ പ്രക്ഷോഭങ്ങളുടെ ഭാഗമായതിനാണ് അമിനിയെ സെക്യൂരിറ്റി ഫോഴ്സ് അറസ്റ്റ് ചെയ്തത്. ലഹരി പദാർത്ഥങ്ങളുടെ സ്വാധീനത്തിൽ അബോധാവസ്ഥയിലായിരുന്നപ്പോൾ നാക്കുപിഴച്ചുണ്ടായ പരാമർശങ്ങളാണെന്ന യുവതിയുടെയും അഭിഭാഷകരുടെയും വാദം കോടതി തള്ളിക്കളഞ്ഞു. സമാധാനപരമായ അഭിപ്രായ സ്വാതന്ത്ര്യത്തെ വധശിക്ഷ നൽകി അമർച്ച ചെയ്യാനാണ് ഇറാൻ ഭരണകൂടം ശ്രമിക്കുന്നതെന്ന് മനുഷ്യാവകാശ സംഘടനകൾ ചൂണ്ടിക്കാണിക്കുന്നു.
ഈ വർഷം മാത്രം ഇറാനിൽ 600-ലധികം വധശിക്ഷകൾ നടപ്പിലാക്കിക്കഴിഞ്ഞതായി ഒസ്‌ലോ കേന്ദ്രമായി പ്രവർത്തിക്കുന്ന ‘ഇറാൻ ഹ്യൂമൻ റൈറ്റ്സ്’ (IHRNGO) വ്യക്തമാക്കി. അമിനിയുടെ വധശിക്ഷാ വിധി സുപ്രീം കോടതിയുടെ അന്തിമ അനുമതിക്കായി കാത്തിരിക്കുകയാണ്. അന്താരാഷ്ട്ര സമൂഹം മൗനം വെടിയണമെന്നും അല്ലെങ്കിൽ ഇത്തരം സംഭവങ്ങൾ ആവർത്തിക്കപ്പെടുമെന്നും മനുഷ്യാവകാശ പ്രവർത്തകർ മുന്നറിയിപ്പ് നൽകുന്നു.
രാജ്യത്ത് ഓൺലൈൻ നിരീക്ഷണങ്ങൾ ശക്തമാക്കിയ ഭരണകൂടം, വിദേശ മാധ്യമങ്ങളുമായി ബന്ധപ്പെടുന്നവരെയും സമൂഹമാധ്യമങ്ങളിൽ സർക്കാരിനെ വിമർശിക്കുന്നവരെയും ലക്ഷ്യമിട്ട് പുതിയ നിയമങ്ങൾ കൊണ്ടുവരാനും ശ്രമിക്കുന്നുണ്ട്. സാധാരണക്കാരുടെ മൗലികാവകാശങ്ങളും ആവിഷ്കാര സ്വാതന്ത്ര്യവും കവർന്നെടുക്കുന്ന ഇത്തരം നടപടികൾക്കെതിരെ ശക്തമായ പ്രതിഷേധമാണ് ലോകമെമ്പാടുമുള്ള മനുഷ്യാവകാശ സംഘടനകളിൽ നിന്ന് ഉയരുന്നത്.
