ശമ്പള ചൂഷണവും വിദേശത്ത് തുടരുന്ന പ്രവണതയും: വിദേശ ട്രെയിനിംഗ് നിർത്തിയതിന് പിന്നിൽ പുതിയ വെളിപ്പെടുത്തൽ

ലണ്ടൻ: വിദേശത്ത് നിന്നുള്ള ഡോക്ടർമാർക്ക് ബ്രിട്ടനിലെ ആശുപത്രികളിൽ ഉയർന്ന പരിശീലനം നൽകുന്നതിനായി വർഷങ്ങളായി നടപ്പിലാക്കി വന്ന ‘മെഡിക്കൽ ട്രെയിനിംഗ് ഇനിഷ്യേറ്റീവ്’ (MTI) പദ്ധതി എൻ.എച്ച്.എസ് (NHS England) നിർത്തിവെച്ചു. കുറഞ്ഞ വരുമാനമുള്ള രാജ്യങ്ങളിൽ നിന്നുള്ള ഡോക്ടർമാർക്ക് യുകെയിൽ വന്ന് പരിശീലനം നേടാൻ അവസരമൊരുക്കിയിരുന്ന ഈ പദ്ധതി നിർത്തിയത് യുകെയുടെ നയതന്ത്ര സ്വാധീനത്തിന് ലഭിച്ച തിരിച്ചടിയാണെന്ന് മുതിർന്ന ഡോക്ടർമാർ കുറ്റപ്പെടുത്തി. ഇന്ത്യ, പാകിസ്ഥാൻ, ശ്രീലങ്ക, നേപ്പാൾ തുടങ്ങിയ രാജ്യങ്ങളിൽ നിന്നുള്ള അഞ്ഞൂറോളം ഡോക്ടർമാർക്ക് പ്രതിവർഷം ഈ പദ്ധതി പ്രയോജനപ്പെട്ടിരുന്നു.

രണ്ട് വർഷത്തെ പരിശീലനത്തിന് ശേഷം ഡോക്ടർമാർ സ്വന്തം രാജ്യങ്ങളിലേക്ക് മടങ്ങി മികച്ച സേവനം നൽകുക എന്ന ലക്ഷ്യത്തോടെയാണ് 2011-ൽ ഈ പദ്ധതി ആരംഭിച്ചത്. എന്നാൽ, ഈ തീരുമാനത്തെക്കുറിച്ച് മുൻകൂട്ടി അറിയിപ്പൊന്നും ലഭിച്ചില്ലെന്ന് മെഡിക്കൽ റോയൽ കോളേജുകൾ വ്യക്തമാക്കി. വിദേശത്ത് നിന്നുള്ള പഠിതാക്കളെ ആശ്രയിക്കുന്ന യുകെയിലെ ആരോഗ്യ മേഖലയിലെ രൂക്ഷമായ ജീവനക്കാരുടെ ക്ഷാമം പരിഹരിക്കാൻ ഈ പദ്ധതി ഏറെ സഹായകരമായിരുന്നുവെന്നും അവർ ചൂണ്ടിക്കാട്ടി.

പരിശീലനത്തിന് ശേഷം പല വിദേശ ഡോക്ടർമാരും സ്വന്തം രാജ്യങ്ങളിലേക്ക് മടങ്ങുന്നില്ലെന്നും സമാന ജോലി ചെയ്യുന്ന യുകെയിലെ ഡോക്ടർമാരേക്കാൾ കുറഞ്ഞ ശമ്പളം നൽകി ഇവർ ചൂഷണം ചെയ്യപ്പെടുന്നുണ്ടെന്നും ആഭ്യന്തര അവലോകനത്തിൽ കണ്ടെത്തിയതിനെ തുടർന്നാണ് പദ്ധതി നിർത്തിയതെന്നാണ് എൻ.എച്ച്.എസ് അധികൃതരുടെ വിശദീകരണം. കൂടാതെ ബ്രിട്ടനിൽ തദ്ദേശീയമായി പഠിച്ചിറങ്ങുന്ന മെഡിക്കൽ ബിരുദധാരികൾക്ക് ട്രെയിനിംഗ് പോസ്റ്റുകളിൽ മുൻഗണന നൽകണമെന്ന യുകെ ഡോക്ടർമാരുടെ ആവശ്യവും ഈ തീരുമാനത്തിന് പിന്നിലുണ്ടെന്ന് കരുതപ്പെടുന്നു.

നിലവിൽ എം.ടി.ഐ വഴി യുകെയിൽ ഉള്ളവർക്ക് അവരുടെ കാലാവധി പൂർത്തിയാക്കാൻ സാധിക്കും. എന്നാൽ, വിദേശ ഡോക്ടർമാരെ പെട്ടെന്ന് ഒഴിവാക്കുന്നത് ആശുപത്രികളുടെ പ്രവർത്തനങ്ങളെ ബാധിക്കുമെന്ന ആശങ്കയും ഉയരുന്നുണ്ട്. അന്താരാഷ്ട്ര തലത്തിൽ ബ്രിട്ടൻ പങ്കുവെച്ചിരുന്ന മെഡിക്കൽ മികവിനാണ് ഈ തീരുമാനത്തോടെ മങ്ങലേറ്റതെന്നും, പുതിയ നിർദ്ദേശങ്ങൾക്ക് രൂപം നൽകുമെന്നും അധികൃതർ അറിയിച്ചു.