വൈദ്യുതി ശൃംഖല ആധുനികീകരിക്കാൻ ബ്രിട്ടൻ: 15,000 കോടി പൗണ്ടിന്റെ കൂറ്റൻ പദ്ധതി.
ലണ്ടൻ: ഭാവിയിലെ ഊർജ്ജ പ്രതിസന്ധികൾ ഒഴിവാക്കുന്നതിനും വിദേശത്ത് നിന്നുള്ള ഫോസിൽ ഇന്ധനങ്ങളുടെ ഇറക്കുമതി കുറയ്ക്കുന്നതിനുമായി ബ്രിട്ടൻ 15,000 കോടി പൗണ്ടിന്റെ (150 ബില്യൺ പൗണ്ട്) വമ്പൻ വൈദ്യുത ശൃംഖലാ നവീകരണത്തിനൊരുങ്ങുന്നു. ഇതിനായി ആയിരക്കണക്കിന് മൈൽ ദൈർഘ്യമുള്ള പുതിയ ലൈനുകൾ, കടലിനടിയിലൂടെയും ഭൂമിക്കടിയിലൂടെയുമുള്ള കേബിളുകൾ തുടങ്ങിയ അടിസ്ഥാന സൗകര്യങ്ങൾ നിർമ്മിക്കും. കാറ്റ്, സൂര്യപ്രകാശം എന്നിവയിൽ നിന്നുള്ള പുനരുപയോഗ ഊർജ്ജം രാജ്യത്തുടനീളം കാര്യക്ഷമമായി എത്തിക്കുകയാണ് ഇതിന്റെ പ്രധാന ലക്ഷ്യം.
പുനരുപയോഗ ഊർജ്ജ വികസനത്തിന്റെ വേഗതയ്ക്കൊത്ത് നിലവിലെ വൈദ്യുതി ഗ്രിഡ് വളരാത്തതാണ് ഈ പുതിയ പദ്ധതിക്ക് കാരണം. നിലവിൽ കാറ്റാടിപ്പാടങ്ങളിൽ ഉത്പാദിപ്പിക്കുന്ന അധിക വൈദ്യുതി ആവശ്യക്കാരായ ജനങ്ങളിലേക്ക് എത്തിക്കാൻ പഴയ ശൃംഖലയ്ക്ക് കഴിയുന്നില്ല. ഇത് കാരണം വിതരണം പരിമിതപ്പെടുത്തി ഗ്യാസ് പ്ലാന്റുകളെ ആശ്രയിക്കേണ്ടി വരുന്നത് ഭീമമായ സാമ്പത്തിക നഷ്ടത്തിന് കാരണമാകുന്നുണ്ട്.
ഈ ബൃഹത്തായ പദ്ധതിയുടെ ചിലവ് ആദ്യഘട്ടത്തിൽ ജനങ്ങളുടെ കറന്റ് ബില്ലിൽ പ്രതിഫലിച്ചേക്കാമെങ്കിലും, ദീർഘകാലാടിസ്ഥാനത്തിൽ അന്താരാഷ്ട്ര ഇന്ധന വിലക്കയറ്റത്തിൽ നിന്ന് ഉപഭോക്താക്കൾക്ക് രക്ഷയാകും. എങ്കിലും നിർമ്മാണത്തിലുണ്ടാകുന്ന താമസം, ഗ്രാമീണ മേഖലകളിൽ പുതിയ ടവറുകൾ നിർമ്മിക്കുന്നതിനെതിരെയുള്ള പ്രാദേശിക എതിർപ്പുകൾ എന്നിവ പദ്ധതിക്ക് വെല്ലുവിളിയാണ്. തടസ്സമില്ലാത്ത ഊർജ്ജ സുരക്ഷയ്ക്ക് വിതരണ ശൃംഖലയുടെ വികസനത്തിനൊപ്പം മികച്ച സംഭരണ ശേഷിയും സാങ്കേതിക മുന്നേറ്റങ്ങളും ആവശ്യമാണെന്ന് വിദഗ്ദ്ധർ ചൂണ്ടിക്കാണിക്കുന്നു.
