വെയ്ൽസിൽ കാണാതായ 14-കാരി കൊല്ലപ്പെട്ട നിലയിൽ; സമപ്രായക്കാരനായ ആൺകുട്ടി അറസ്റ്റിൽ.
വെയ്ൽസ്: കാണാതായ 14 വയസ്സുകാരിയുടെ മൃതദേഹം കണ്ടെത്തിയതിനെത്തുടർന്ന് സമപ്രായക്കാരനായ 14 വയസ്സുകാരനെതിരെ കൊലക്കുറ്റം ചുമത്തിയതായി ഗ്വെന്റ് പോലീസ് അറിയിച്ചു. വെയ്ൽസിലെ ബ്ലൈനയിലുള്ള ഡഫ്രിൻ പാർക്ക് പ്രദേശത്തുനിന്നാണ് ജൂൺ 22-ന് പെൺകുട്ടിയുടെ മൃതദേഹം കണ്ടെടുത്തത്. ഇതിന് പിന്നാലെ ബ്ലൈനാ ഗ്വെന്റ് സ്വദേശിയായ കൗമാരക്കാരനെ പോലീസ് അറസ്റ്റ് ചെയ്യുകയായിരുന്നു. മൃതദേഹം ഔദ്യോഗികമായി തിരിച്ചറിയാനുള്ള നടപടികൾ പുരോഗമിക്കുകയാണെങ്കിലും, ഇത് കാണാതായ ലില്ലി എന്ന 14-കാരിയുടേതാണെന്നാണ് പോലീസ് വിശ്വസിക്കുന്നത്.
നിയമപരമായ കാരണങ്ങളാൽ പേര് വെളിപ്പെടുത്താൻ സാധിക്കാത്ത പ്രതിയായ ആൺകുട്ടി നിലവിൽ പോലീസ് കസ്റ്റഡിയിലാണ്. ഇവനെ വെള്ളിയാഴ്ച ന്യൂപോർട്ട് മജിസ്ട്രേറ്റ് കോടതിയിൽ ഹാജരാക്കുമെന്ന് അധികൃതർ വ്യക്തമാക്കി. കോടതി നടപടികളുടെ ഭാഗമായതിനാലാണ് ലില്ലിയുടെ കുടുംബത്തിന്റെ അനുമതിയോടെ അവളുടെ പേര് വിവരങ്ങൾ പുറത്തുവിടുന്നതെന്ന് പോലീസ് പറഞ്ഞു. കഴിഞ്ഞ ജൂൺ 20 ശനിയാഴ്ച വൈകുന്നേരം ബ്ലൈനയിലെ ഹൈസ്ട്രീറ്റിൽ വെച്ചാണ് ലില്ലിയെ അവസാനമായി കാണാതായത്.
പെൺകുട്ടിയുടെ മൃതദേഹം കണ്ടെത്തിയതിനെത്തുടർന്ന് ബ്ലൈനയിലെ എ467 റോഡിനോട് ചേർന്നുള്ള പിൽഗ്രിംസ് പാർക്കിന്റെ ചില ഭാഗങ്ങൾ പോലീസ് പൂർണ്ണമായി വളഞ്ഞു. ദുരന്തത്തിൽ അനുശോചനം രേഖപ്പെടുത്തിക്കൊണ്ട് നിരവധി ജനങ്ങളാണ് പ്രദേശത്ത് പുഷ്പാർച്ചന നടത്തിയത്. ലില്ലിയുടെ കുടുംബത്തിന്റെയും സുഹൃത്തുക്കളുടെയും ദുഃഖത്തിൽ പങ്കുചേരുന്നതായി വ്യക്തമാക്കിയ ഡിറ്റക്ടീവ് ചീഫ് ഇൻസ്പെക്ടർ സ്റ്റീവൻ തോമസ്, കേസിന്റെ അന്വേഷണം ഊർജ്ജിതമായി തുടരുകയാണെന്ന് അറിയിച്ചു.
ഈ കേസിനെക്കുറിച്ച് സോഷ്യൽ മീഡിയ ഉൾപ്പെടെയുള്ള ഓൺലൈൻ പ്ലാറ്റ്ഫോമുകളിൽ പൊതുജനങ്ങൾ നടത്തുന്ന പ്രതികരണങ്ങളും ഭാഷയും കുറ്റവാളികൾക്ക് ശിക്ഷ ഉറപ്പാക്കുന്നതിനുള്ള നിയമനടപടികളെ ബാധിക്കരുതെന്ന് പോലീസ് മുന്നറിയിപ്പ് നൽകി. വരും ദിവസങ്ങളിലും ഡഫ്രിൻ പാർക്ക് ഉൾപ്പെടെയുള്ള പ്രദേശങ്ങളിൽ വിശദമായ ശാസ്ത്രീയ പരിശോധനകൾ തുടരുമെന്നും അതുവരെ പോലീസ് സാന്നിധ്യം ഉണ്ടാകുമെന്നും അധികൃതർ വ്യക്തമാക്കി. അന്വേഷണവുമായി സഹകരിക്കുന്ന പ്രാദേശിക നിവാസികൾക്കും താൽക്കാലിക നിയന്ത്രണങ്ങളോട് ക്ഷമയോടെ പ്രതികരിച്ചവർക്കും പോലീസ് നന്ദി രേഖപ്പെടുത്തി.
