വീണ്ടും ചരക്കുകപ്പലുകളെ ലക്ഷ്യം വച്ച് ഹൂതികൾ; കടൽപ്പാതകൾ അടഞ്ഞാൽ ഇന്ധനവില കുതിച്ചുയരും.
ഇറാൻ : യെമനിലെ ഹൂതി വിമതർ ചെങ്കടലിലെ ചരക്കുനീക്കം തടസ്സപ്പെടുത്തുന്നത് ആഗോള സമ്പദ്വ്യവസ്ഥയ്ക്ക് വൻ ഭീഷണിയാകുമെന്ന് റിപ്പോർട്ട്. ഇറാൻ പിന്തുണയുള്ള ഹൂതികൾ ഇസ്രായേലിന് നേരെ മിസൈൽ ആക്രമണം നടത്തിയതോടെയാണ് മേഖലയിൽ വീണ്ടും യുദ്ധഭീതി ശക്തമായത്. ഇസ്രായേലിലെ തന്ത്രപ്രധാനമായ സൈനിക കേന്ദ്രങ്ങളെയാണ് തങ്ങൾ ലക്ഷ്യം വെക്കുന്നതെന്ന് ഹൂതികൾ അവകാശപ്പെടുന്നുണ്ടെങ്കിലും, യെമൻ തീരത്തെ കടൽപ്പാതകളിലൂടെയുള്ള കപ്പൽ ഗതാഗതത്തിനാണ് ഇവർ വലിയ വെല്ലുവിളി ഉയർത്തുന്നത്.
ചെങ്കടലിനെയും ഏഷ്യൻ രാജ്യങ്ങളെയും ബന്ധിപ്പിക്കുന്ന ബാബ് അൽ-മന്ദബ് ഇടുക്കിലൂടെയുള്ള കപ്പൽ ഗതാഗതം ഹൂതികൾ തടസ്സപ്പെടുത്തിയാൽ അത് ആഗോള വ്യാപാരത്തെ സാരമായി ബാധിക്കും. നേരത്തെ ഗാസ യുദ്ധസമയത്ത് ഹമാസിന് പിന്തുണ പ്രഖ്യാപിച്ച് ഹൂതികൾ സമാനമായ രീതിയിൽ കപ്പലുകളെ ആക്രമിച്ചിരുന്നു. ഇറാന്റെ ഇടപെടലിലൂടെ ഹോർമുസ് കടലിടുക്ക് കൂടി അടയ്ക്കപ്പെട്ട സാഹചര്യത്തിൽ, ലോകത്തെ രണ്ട് പ്രധാന വ്യാപാര പാതകളും നിശ്ചലമാകുന്നത് ഇന്ധനവില കുതിച്ചുയരാനും ആഗോള സാമ്പത്തിക മാന്ദ്യത്തിനും കാരണമാകും.
സൗദി അറേബ്യ, യുഎഇ തുടങ്ങിയ അയൽരാജ്യങ്ങളിലെ ഊർജ്ജ-സൈനിക കേന്ദ്രങ്ങളെയും ഹൂതികൾ ലക്ഷ്യം വെച്ചേക്കാം. മുൻപ് ഇത്തരം നീക്കങ്ങൾ നടത്തിയപ്പോൾ അമേരിക്കയും ഇസ്രായേലും ശക്തമായ വ്യോമാക്രമണങ്ങളിലൂടെ തിരിച്ചടിച്ചെങ്കിലും ഹൂതികളുടെ സൈനിക ശേഷിയെ പൂർണ്ണമായും തകർക്കാൻ കഴിഞ്ഞിട്ടില്ല. ഇറാനുമായുള്ള യുദ്ധത്തിൽ ഹൂതികൾ കൂടുതൽ സജീവമായാൽ, വർഷങ്ങളായി നിലനിൽക്കുന്ന യെമനിലെ ആഭ്യന്തര സമാധാനം തകരാനും പുതിയൊരു യുദ്ധമുഖം തുറക്കാനും ഇത് ഇടയാക്കും.
