വായ തുറക്കരുത്, തലയാട്ടുകയുമരുത്! മെറ്റക്കെതിരെ പുസ്തകമെഴുതിയ വിസിൽബ്ലോവർക്കും അഭിഭാഷകനും വിലക്ക്.

ന്യൂസീലൻഡ്: ഫേസ്ബുക്കിന്റെ മാതൃകമ്പനിയായ മെറ്റയുടെ (Meta) മുൻ ജീവനക്കാരിയും വിസിൽബ്ലോവറുമായ സാറാ വിൻ-വില്യംസിനും അവരുടെ അഭിഭാഷകനും പുസ്തക പ്രചാരണത്തിൽ നിന്നും വിലക്ക്. മെറ്റയുമായുള്ള നിയമപോരാട്ടത്തെ തുടർന്നുണ്ടായ ഒരു ആർബിട്രേഷൻ വിധിയാണ് സാറയ്ക്കും അവരുടെ അഭിഭാഷകൻ രവി നായിക്കിനും കടുത്ത നിയന്ത്രണങ്ങൾ ഏർപ്പെടുത്തിയിരിക്കുന്നത്. ഇതേത്തുടർന്ന് കഴിഞ്ഞ ദിവസം പ്രശസ്തമായ ഹേ ഫെസ്റ്റിവലിൽ (Hay Festival) പുസ്തക ചർച്ചയ്ക്കായി വേദിയിലെത്തിയ സാറയ്ക്ക് ഒരു വാക്ക് പോലും മിണ്ടാതെ നിശബ്ദയായി ഇരിക്കേണ്ടി വന്നു.

കമ്പനിയുടെ സംസ്കാരത്തെയും വിപരീത പെരുമാറ്റങ്ങളെയും കുറിച്ച് സാറ എഴുതിയ ‘കെയർലെസ് പീപ്പിൾ’ (Careless People) എന്ന ബെസ്റ്റ് സെല്ലർ പുസ്തകം പ്രചരിപ്പിക്കാനോ കമ്പനിയെക്കുറിച്ച് മോശമായി സംസാരിക്കാനോ സാറയ്ക്കോ അവരുടെ പ്രതിനിധികൾക്കോ അവകാശമില്ലെന്നാണ് കോടതി വിധി. വിലക്ക് ലംഘിച്ചാൽ വൻ തുക പിഴയായി നൽകേണ്ടി വരുമെന്ന് അഭിഭാഷകൻ രവി നായിക് വ്യക്തമാക്കി. തന്റെ കരിയറിൽ ഇതാദ്യമായാണ് ഒരു ക്ലയന്റിനും അഭിഭാഷകനും സ്വന്തം സത്യം വിളിച്ചുപറയാൻ കഴിയാത്ത സാഹചര്യം ഉണ്ടാകുന്നതെന്ന് അദ്ദേഹം ബിബിസിയോട് പറഞ്ഞു.

വേദിയിൽ ഇരിക്കുമ്പോൾ ചോദ്യങ്ങൾക്ക് മറുപടിയായി തലയാട്ടാനോ തല കുലുക്കാനോ പോലും സാറയ്ക്ക് അനുവാദമുണ്ടായിരുന്നില്ല. എന്നാൽ സാറയുടെ പുസ്തകത്തിലെ ആരോപണങ്ങൾ വ്യാജവും അപകീർത്തികരവുമാണെന്നാണ് മെറ്റയുടെ നിലപാട്. മോശം പ്രകടനത്തെത്തുടർന്നാണ് സാറയെ ജോലിയിൽ നിന്ന് പിരിച്ചുവിട്ടതെന്നും, മുൻപ് ഒപ്പുവെച്ച കരാറിന്റെ ലംഘനമാണ് ഇപ്പോൾ നടക്കുന്നതെന്നും മെറ്റാ അധികൃതർ ആരോപിക്കുന്നു.