വായുമലിനീകരണത്തിലെ സാമൂഹിക അസമത്വത്തിനെതിരെ അന്വേഷണം വേണം; പ്രധാനമന്ത്രി ആൻഡി ബർണാമിന് നിവേദനം.

ലണ്ടൻ: കുറഞ്ഞ വരുമാനക്കാരായ കുടുംബങ്ങളിലും ന്യൂനപക്ഷ വിഭാഗങ്ങളിലുമുള്ള ആളുകളെ വായുമലിനീകരണം കൂടുതൽ ഗുരുതരമായി ബാധിക്കുന്നതിനെക്കുറിച്ച് ദേശീയ തലത്തിൽ അന്വേഷണം നടത്തണമെന്ന് ബ്രിട്ടീഷ് പ്രധാനമന്ത്രി ആൻഡി ബർണാമിനോട് (Andy Burnham) ആവശ്യപ്പെട്ട് പ്രമുഖ ശാസ്ത്രജ്ഞരും എംപിമാരും പ്രവർത്തകരും. പരിസ്ഥിതി പ്രവർത്തക ഗ്രെറ്റ തുൻബർഗ് ഉൾപ്പെടെ 150-ഓളം പ്രമുഖർ ഒപ്പുവെച്ച കത്താണ് പ്രധാനമന്ത്രിക്ക് കൈമാറിയത്. സാമ്പത്തികമായും സാമൂഹികമായും പിന്നാക്കം നിൽക്കുന്ന വിഭാഗങ്ങൾ താമസിക്കുന്ന ഇടങ്ങളിൽ വായുമലിനീകരണം ഉയർന്ന തോതിലാണെന്നും ഇതിനെ പ്രതിരോധിക്കാൻ രാജ്യത്ത് പ്രത്യേക സംവിധാനമില്ലെന്നും കത്തിൽ ചൂണ്ടിക്കാട്ടുന്നു.

ഇൻസ്റ്റിറ്റ്യൂട്ട് ഫോർ ഫിസ്കൽ സ്റ്റഡീസ് (IFS) നടത്തിയ പഠനമനുസരിച്ച്, ബ്രിട്ടനിലെ ഉയർന്ന വരുമാനമുള്ള പ്രദേശങ്ങളെ അപേക്ഷിച്ച് പാവപ്പെട്ടവർ ജീവിക്കുന്ന ഇടങ്ങളിൽ വായുമലിനീകരണം വളരെ കൂടുതലാണ്. കൂടാതെ, വെള്ളക്കാരായ ജനവിഭാഗങ്ങളേക്കാൾ 6 ശതമാനം അധിക മലിനീകരണമാണ് ന്യൂനപക്ഷ വംശജർ നേരിടുന്നത്. ഹൃദ്രോഗം, സ്ട്രോക്ക്, ക്യാൻസർ, ആസ്ത്മ, കുട്ടികളിലെ ശ്വാസകോശ വളർച്ചാ വൈകല്യങ്ങൾ എന്നിവയ്ക്ക് വായുമലിനീകരണം കാരണമാകുന്നു. വാഹനങ്ങളിൽ നിന്നുള്ള പുകയും വ്യാവസായിക മാലിന്യങ്ങളുമാണ് വായുവിന്റെ ഗുണനിലവാരം തകരാൻ പ്രധാന കാരണം.

മുംസ് ഫോർ ലങ്സ് (Mums for Lungs) എന്ന ക്യാമ്പയിൻ ഗ്രൂപ്പ് പുറത്തുവിട്ട വിവരങ്ങൾ പ്രകാരം 2025-ൽ ലണ്ടൻ, ഗ്രേറ്റർ മാഞ്ചസ്റ്റർ, ബർമിംഗ്ഹാം തുടങ്ങിയ 11 നഗരങ്ങളിലായി രണ്ട് ലക്ഷത്തിലധികം കുട്ടികളെ ശ്വാസതടസ്സത്തെ തുടർന്ന് ആശുപത്രികളിൽ പ്രവേശിപ്പിച്ചിട്ടുണ്ട്. ഇതിൽ 1,20,000-ത്തിലധികം പേർ അഞ്ചുവയസ്സിൽ താഴെയുള്ള പിഞ്ചുകുഞ്ഞുങ്ങളാണ്. മാഞ്ചസ്റ്ററിൽ മാത്രം പിഞ്ചുകുഞ്ഞുങ്ങളുടെ പ്രവേശനം 2023-ലെ 653-ൽ നിന്ന് 2025-ൽ 1,072 ആയി ഉയർന്നു. ഗതാഗത നിയന്ത്രണ പദ്ധതിയായ ക്ലീൻ എയർ സോൺ (Clean Air Zone) ഉപേക്ഷിച്ച പ്രാദേശിക സർക്കാറുകളുടെ നടപടിയും വിമർശിക്കപ്പെടുന്നുണ്ട്.

സാഹചര്യം അതീവ ഗുരുതരമാണെന്നും വൃത്തിഹീനമായ വായു അംഗീകരിക്കാൻ കഴിയില്ലെന്നും പരിസ്ഥിതി പ്രവർത്തകർ വ്യക്തമാക്കി. വായു മലിനീകരണം കുറയ്ക്കുന്നതിന് കർശന നടപടികൾ സ്വീകരിക്കുന്നുണ്ടെന്നും, 2030-ഓടെ ദോഷകരമായ കണികകളുടെ സാന്നിധ്യം മൂന്നിലൊന്നായി കുറയ്ക്കുകയാണ് സർക്കാരിന്റെ ലക്ഷ്യമെന്നും പരിസ്ഥിതി, ഭക്ഷ്യ, ഗ്രാമവികസന മന്ത്രാലയ വക്താവ് വ്യക്തമാക്കി.