വംശീയ വിദ്വേഷ ആരോപണങ്ങളിൽ വീണ്ടും റീഫോം യുകെ; നൈജൽ ഫരാജിനെ ന്യായീകരിച്ച് റോബർട്ട് ജെൻറിക്!
ലണ്ടൻ: റീഫോം യുകെ (Reform UK) പാർട്ടിയിൽ തീവ്രവാദ-വംശീയ ആശയങ്ങൾ പുലർത്തുന്നവർ സജീവമാണെന്ന പുതിയ വെളിപ്പെടുത്തലുകൾക്ക് പിന്നാലെ, പാർട്ടി നേതാവ് നൈജൽ ഫരാജിനെ (Nigel Farage) പ്രതിരോധിച്ച് എം.പി റോബർട്ട് ജെൻറിക്. വംശീയതയ്ക്കും തീവ്രവലതുപക്ഷ രാഷ്ട്രീയത്തിനുമെതിരെ മറ്റാരേക്കാളും ശക്തമായി നിലകൊണ്ട വ്യക്തിയാണ് ഫരാജെന്ന് ജെൻറിക് അവകാശപ്പെട്ടു. പാർട്ടിയിൽ ഉയർന്നുവന്ന വംശീയ അധിക്ഷേപ ആരോപണങ്ങൾക്ക് പിന്നാലെയാണ് പ്രതിരോധവുമായി മുൻ കൺസർവേറ്റീവ് നേതാവു കൂടിയായ ജെൻറിക് രംഗത്തെത്തിയത്.
ഐ.ടി.വി (ITV Exposure) നടത്തിയ രഹസ്യ അന്വേഷണത്തിലാണ് റീഫോം യുകെയിലെ പ്രാദേശിക കൗൺസിലർമാരും സ്ഥാനാർത്ഥികളും വംശീയവും സ്ത്രീവിരുദ്ധവും ഇസ്ലാമോഫോബിക് ആയ നിലപാടുകൾ തുറന്നുപറയുന്ന ദൃശ്യങ്ങൾ പുറത്തുവന്നത്. പാർട്ടിയിലെ ഒരു ഉയർന്ന ഉദ്യോഗസ്ഥൻ, മുൻ ലേബർ ഡെപ്യൂട്ടി പ്രധാനമന്ത്രി ഡേവിഡ് ലാമിക്കെതിരെ (David Lammy) വംശീയ പരാമർശം നടത്തിയ സ്ഥാനാർത്ഥിയെ ഫരാജ് ബോധപൂർവ്വം സംരക്ഷിക്കുകയാണെന്ന് ആരോപിക്കുന്ന ശബ്ദരേഖയും പുറത്തുവന്നിട്ടുണ്ട്.
ഐ.ടി.വിയുടെ വെളിപ്പെടുത്തലുകൾ നൈജൽ ഫരാജിന്റെ വ്യക്തിത്വത്തെ കളങ്കപ്പെടുത്താൻ ഉദ്ദേശിച്ചുള്ളതാണെന്ന് ബിബിസി റേഡിയോ 4-ൽ സംസാരിക്കവെ ജെൻറിക് ആരോപിച്ചു. റീഫോം യുകെ സ്ഥാനാർത്ഥികളെ കർശനമായ പരിശോധനകൾക്ക് (vetting) ശേഷമാണ് തെരഞ്ഞെടുക്കുന്നതെന്നും, ഇത്തരം അപവാദങ്ങൾ എല്ലാ രാഷ്ട്രീയ പാർട്ടികളിലും ഉണ്ടാകാറുണ്ടെന്നും അദ്ദേഹം ന്യായീകരിച്ചു. ഫരാജ് മുമ്പ് നൽകിയ ഉറപ്പുകൾ ലംഘിക്കപ്പെട്ടുവെന്ന വിമർശനങ്ങളെ ജെൻറിക് തള്ളിക്കളഞ്ഞു.
എന്നാൽ, സൊളിഹുള്ളിലെ റീഫോം കൗൺസിലർ ഏഷ്യൻ വംശജരെ അധിക്ഷേപിച്ചതും, മറ്റ് ന്യൂനപക്ഷ നേതാക്കൾക്കെതിരെ പരാമർശം നടത്തിയ സ്ഥാനാർത്ഥിയെ പാർട്ടി സംരക്ഷിച്ചതും വലിയ രാഷ്ട്രീയ വിവാദമായി മാറിയിട്ടുണ്ട്. റീഫോം യുകെയ്ക്കുള്ളിൽ വംശീയതയും വിദ്വേഷ പ്രചാരണവും പ്രോത്സാഹിപ്പിക്കപ്പെടുന്നുവെന്ന ആരോപണം ശക്തമായതോടെ, വരുന്ന തെരഞ്ഞെടുപ്പുകളിൽ പാർട്ടിക്ക് തിരിച്ചടിയാകുമെന്നാണ് വിലയിരുത്തപ്പെടുന്നത്.
