ലേബർ ഗവൺമെന്റ് തിടുക്കത്തിൽ തീരുമാനങ്ങളെടുക്കരുത്; യുകെയിൽ ആൻഡി ബേൺഹാമിന് കടുത്ത മുന്നറിയിപ്പുമായി സിബിഐ മേധാവി.

ലണ്ടൻ: ബ്രിട്ടനിൽ പുതിയ പ്രധാനമന്ത്രിയായി ആൻഡി ബേൺഹാം ചുമതലയേൽക്കാനിരിക്കെ, നികുതിയെയും പൊതുചെലവുകളെയും ചൊല്ലി ബിസിനസ്സ് മേഖലയിൽ ആശങ്കയുണ്ടാക്കുന്ന പ്രസ്താവനകൾ ഒഴിവാക്കണമെന്ന് കോൺഫെഡറേഷൻ ഓഫ് ബ്രിട്ടീഷ് ഇൻഡസ്ട്രി (CBI) ചീഫ് എക്സിക്യൂട്ടീവ് റെയ്ൻ ന്യൂട്ടൺ-സ്മിത്ത്. മുൻകാലങ്ങളിലെപ്പോലെ ബജറ്റിന് മുന്നോടിയായുള്ള ഊഹാപോഹങ്ങളുടെ ഒരു ‘വേനൽക്കാലം’ ആവർത്തിച്ചാൽ അത് വ്യവസായ മേഖലയെ ദോഷകരമായി ബാധിക്കും.

ഗ്രേറ്റർ മാഞ്ചസ്റ്റർ മേയർ എന്ന നിലയിൽ ബേൺഹാം സ്വീകരിച്ച ബിസിനസ്സ് സൗഹൃദ നയങ്ങളെ സിബിഐ മേധാവി പ്രശംസിച്ചു. എന്നാൽ പൊതുമേഖലാ സ്ഥാപനങ്ങളെ ഗവൺമെന്റ് പൂർണ്ണമായി ഏറ്റെടുക്കുന്ന (Renationalization) രീതിയിലുള്ള ചില ലേബർ പാർട്ടി നേതാക്കളുടെ തീവ്ര നിലപാടുകളോട് അവർ വിയോജിപ്പ് പ്രകടിപ്പിച്ചു..

ജനങ്ങളുടെ ജീവിതച്ചെലവ് പ്രതിസന്ധി പരിഹരിക്കുന്നതിനൊപ്പം തന്നെ വ്യവസായ സ്ഥാപനങ്ങളുടെ ചെലവുകൾ കുറയ്ക്കാനും ഗവൺമെന്റ് അടിയന്തിരമായി ഇടപെടണം. യുകെയിലെ ബിസിനസ്സ് സ്ഥാപനങ്ങളുടെ വൈദ്യുതി നിരക്ക് ജി7 (G7) രാജ്യങ്ങളുടെ ശരാശരിയേക്കാൾ 45 ശതമാനം കൂടുതലാണെന്നത് വ്യവസായങ്ങളുടെ മത്സരശേഷിയെ ബാധിക്കുന്നുണ്ട്. ശുദ്ധമായ ഊർജ്ജത്തിലേക്കുള്ള മാറ്റത്തിന്റെ ഭാഗമായി കമ്പനികൾക്ക് മേൽ ചുമത്തുന്ന അധിക നികുതികൾ ഒഴിവാക്കണം.

ലൈംഗികാരോപണ വിവാദങ്ങളെത്തുടർന്ന് കടുത്ത പ്രതിസന്ധിയിലായ സിബിഐയുടെ പ്രതിച്ഛായ വീണ്ടെടുക്കാൻ കഴിഞ്ഞ രണ്ട് വർഷമായി നടത്തിയ ശ്രമങ്ങൾ വിജയകരമാണെന്ന് 51 കാരിയായ റെയ്ൻ ന്യൂട്ടൺ-സ്മിത്ത് പറഞ്ഞു. 2023-ൽ ഉയർന്നുവന്ന പരാതികളെത്തുടർന്ന് പല പ്രമുഖ കമ്പനികളും സംഘടന വിട്ടിരുന്നു. എന്നാൽ നിലവിൽ സംഘടനയുടെ പ്രവർത്തന സംസ്കാരത്തിൽ വലിയ മാറ്റങ്ങൾ വരുത്തിയിട്ടുണ്ടെന്നും പുതിയ അംഗങ്ങളുടെ എണ്ണത്തിലും വരുമാനത്തിലും മികച്ച വളർച്ച രേഖപ്പെടുത്തുന്നുണ്ടെന്നും അവർ കൂട്ടിച്ചേർത്തു.