ലിറ്റിൽ മിക്സ് (Little Mix) എന്ന പ്രശസ്ത സംഗീത ബാൻഡിലെ മുൻ അംഗം ജെസി നെൽസന്റെ (Jesy Nelson) കാർ മോഷണം പോയി.
ലണ്ടൻ :ലിറ്റിൽ മിക്സ് (Little Mix) എന്ന പ്രശസ്ത സംഗീത ബാൻഡിലെ മുൻ അംഗം ജെസി നെൽസന്റെ (Jesy Nelson) കാർ മോഷണം പോയി. എസ്സെക്സിലെ ബ്രെന്റ്വുഡിലുള്ള തന്റെ വീടിന്റെ മുന്നിൽ പാർക്ക് ചെയ്തിരുന്ന ബ്ലാക്ക് ലാൻഡ് റോവർ ഡിഫെൻഡറാണ് ഞായറാഴ്ച പുലർച്ചെ മൂന്ന് മണിയോടെ മോഷ്ടിക്കപ്പെട്ടത്.
തന്റെ ഇരട്ടക്കുട്ടികളുടെ ജീവൻ രക്ഷിക്കാൻ അത്യാവശ്യമായ മെഡിക്കൽ ഉപകരണങ്ങൾ കാറിനുള്ളിൽ ഉണ്ടായിരുന്നുവെന്നും അവ തിരികെ ലഭിക്കാൻ സഹായിക്കണമെന്നും ഗായിക ഇൻസ്റ്റാഗ്രാമിലൂടെ അഭ്യർത്ഥിച്ചു. കാറിനെക്കുറിച്ച് വിവരം നൽകുന്നവർക്ക് 10,000 പൗണ്ട് (ഏകദേശം 10 ലക്ഷത്തിലധികം രൂപ) പ്രതിഫലവും അവർ വാഗ്ദാനം ചെയ്തിട്ടുണ്ട്.
ജെസി നെൽസന്റെ 11 മാസം പ്രായമുള്ള ഇരട്ടക്കുട്ടികളായ ഓഷ്യൻ ജെയ്ഡ്, സ്റ്റോറി മൺറോ എന്നിവർക്ക് ‘സ്പൈനൽ മസ്കുലർ അട്രോഫി ടൈപ്പ് 1’ (SMA1) എന്ന ഗുരുതരമായ ജനിതക രോഗമാണുള്ളത്. പേശികളുടെ ബലക്ഷയത്തിനും തളർവാതത്തിനുമൊക്കെ കാരണമാകുന്ന ഈ രോഗാവസ്ഥ കുട്ടികളുടെ ചലനശേഷിയെ ബാധിക്കുന്നതാണ്.
കൃത്യമായ ചികിത്സ ലഭിച്ചില്ലെങ്കിൽ കുട്ടികളുടെ ജീവൻ തന്നെ അപകടത്തിലാകുന്ന അവസ്ഥയാണിതെന്ന് 34-കാരിയായ താരം മുമ്പ് വ്യക്തമാക്കിയിരുന്നു. കുട്ടികളുടെ പരിചരണത്തിന് ആശുപത്രിയിൽ നിന്ന് നൽകിയ അത്യാവശ്യ ഉപകരണങ്ങളാണ് കാറിനൊപ്പം നഷ്ടപ്പെട്ടത്. വാഹനത്തെക്കുറിച്ച് എന്തെങ്കിലും വിവരം ലഭിക്കുന്നവർ പോലീസിനെയോ തന്നെ നേരിട്ടോ അറിയിക്കണമെന്നും ജെസി അഭ്യർത്ഥിച്ചു.
