ലണ്ടൻ പോലീസിൽ കൂടുതൽ കറുത്തവർഗ്ഗക്കാരെയും ഏഷ്യക്കാരെയും നിയമിക്കും; ‘സംസ്കാര യുദ്ധങ്ങളിൽ’ ഭയമില്ലെന്ന് മെറ്റ് ചീഫ്!
ലണ്ടൻ : ലണ്ടനിലെ വിവിധ വംശീയ വിഭാഗങ്ങളുടെ വിശ്വാസം ആർജ്ജിക്കുന്നതിനായി മെട്രോപൊളിറ്റൻ പോലീസിൽ കൂടുതൽ കറുത്തവർഗ്ഗക്കാരെയും ഏഷ്യൻ വംശജരെയും ഉദ്യോഗസ്ഥരായി നിയമിക്കുമെന്ന് സേനാ മേധാവി സർ മാർക്ക് റൗളി വ്യക്തമാക്കി. ഡൈവേഴ്‌സിറ്റി (വൈവിധ്യവൽക്കരണം) സംബന്ധിച്ച് രാജ്യത്ത് നടക്കുന്ന സംസ്കാര യുദ്ധങ്ങളിൽ (culture wars) നിന്ന് പിന്നോട്ടില്ലെന്ന് പ്രഖ്യാപിച്ച അദ്ദേഹം, ഇതൊരു രാഷ്ട്രീയ നിലപാടല്ലെന്നും പ്രവർത്തനപരമായ അനിവാര്യതയാണെന്നും കൂട്ടിച്ചേർത്തു. ദി ഗാർഡിയനിൽ എഴുതിയ ലേഖനത്തിലാണ് യുകെയിലെ ഏറ്റവും മുതിർന്ന പോലീസ് ഉദ്യോഗസ്ഥനായ അദ്ദേഹം തന്റെ നിലപാട് വ്യക്തമാക്കിയത്.
ലണ്ടൻ ജനസംഖ്യയുടെ 46 ശതമാനവും വംശീയ ന്യൂനപക്ഷ വിഭാഗങ്ങളിൽ പെട്ടവരാണെങ്കിലും മെട്രോപൊളിറ്റൻ പോലീസിൽ ഇവരുടെ പ്രാതിനിധ്യം വെറും 18 ശതമാനം മാത്രമാണ്. പ്രത്യേകിച്ച് കറുത്തവർഗ്ഗക്കാരായ ഉദ്യോഗസ്ഥർ 3.7 ശതമാനം മാത്രമാണുള്ളത്. നഗരത്തിലെ എല്ലാ വിഭാഗം ജനങ്ങളിൽ നിന്നും ഉദ്യോഗസ്ഥരെ കണ്ടെത്തിയില്ലെങ്കിൽ പോലീസിന് കാര്യക്ഷമമായി പ്രവർത്തിക്കാൻ കഴിയില്ലെന്നും, വംശീയ വൈവിധ്യമുള്ള ഒരു സേനയ്ക്ക് മാത്രമേ കുറ്റകൃത്യങ്ങൾ തടയാനും ഇരകളെ സംരക്ഷിക്കാനും സാധിക്കൂ എന്നും റൗളി ചൂണ്ടിക്കാണിച്ചു.
തൊഴിൽ സേനയിൽ വൈവിധ്യം കൊണ്ടുവരുന്നത് പോലീസിന്റെ നിലവാരം കുറയ്ക്കുമെന്ന വലതുപക്ഷ കക്ഷികളുടെ ആരോപണങ്ങളെ അദ്ദേഹം പൂർണ്ണമായും തള്ളിപ്പറഞ്ഞു. ചരിത്രപരമായി ചില വിഭാഗങ്ങൾക്ക് പോലീസിൽ ചേരുന്നതിന് തടസ്സങ്ങളുണ്ടായിരുന്നുവെന്നും അവ നീക്കം ചെയ്യുന്നത് മുൻഗണന നൽകലല്ല, മറിച്ച് നീതി ഉറപ്പാക്കലാണെന്നും അദ്ദേഹം പറഞ്ഞു. വൈവിധ്യവൽക്കരണ വിഷയത്തിൽ പൊതു-സ്വകാര്യ മേഖലയിലെ പല നേതാക്കളും ഭയം കാരണം മിണ്ടാതിരിക്കുകയാണെന്നും ഇത്തരം ‘വിഷലിപ്തമായ’ വിചാരണകൾക്ക് മുന്നിൽ തലകുനിക്കില്ലെന്നും അദ്ദേഹം വ്യക്തമാക്കി.
സേനയിലെ വംശീയ വിവേചനവും അപര്യാപ്തമായ പ്രാതിനിധ്യവും സംബന്ധിച്ച് ഇടതുപക്ഷ കക്ഷികളിൽ നിന്നും മുൻ ആഫ്രോ-കരീബിയൻ പോലീസ് ഉദ്യോഗസ്ഥരിൽ നിന്നും വിമർശനങ്ങൾ ഉയരുന്ന പശ്ചാത്തലത്തിലാണ് ഈ പുതിയ റിക്രൂട്ട്മെന്റ് ക്യാമ്പയിൻ. മുൻകാലങ്ങളിലെ വീഴ്ചകൾ പരിഹരിച്ച് പൊതുജനവിശ്വാസം വീണ്ടെടുക്കാൻ ഈ പുതിയ നീക്കം സഹായിക്കുമെന്നാണ് മെട്രോപൊളിറ്റൻ പോലീസ് കരുതുന്നത്. എന്നാൽ പ്രായോഗിക തലത്തിൽ ഇത് എത്രത്തോളം വിജയകരമാകുമെന്നത് കണ്ടറിയേണ്ടിയിരിക്കുന്നു.
