ലണ്ടനിൽ വൻ സുരക്ഷാവീഴ്ച: അതിക്രമത്തിൽ നിന്ന് രക്ഷനേടാനെത്തിയ യുവതിയുടെ റൂം കീ അക്രമിക്ക് കൈമാറി പ്രമുഖ ഹോട്ടൽ ശൃംഖല

ലണ്ടൻ: ഗാർഹിക പീഡനത്തിൽ നിന്ന് രക്ഷനേടാൻ ഹോട്ടലിൽ അഭയം തേടിയ യുവതിക്ക് ജീവനക്കാരുടെ അനാസ്ഥ കാരണം ദാരുണമായ അനുഭവം. ലണ്ടനിലെ പ്രമുഖ ഹോട്ടൽ ശൃംഖലയായ ‘ട്രാവെലൊഡ്ജ്’ (Travelodge) യുവതി താമസിച്ചിരുന്ന മുറിയുടെ താക്കോൽ അക്രമിക്ക് കൈമാറുകയായിരുന്നു. തുടർന്ന് മുറിയിലെത്തിയ ഇയാൾ യുവതിയെ ശാരീരികമായി ആക്രമിച്ചു.

ഭയത്തിൽ നിന്നും തുടർച്ചയായ പീഡനങ്ങളിൽ നിന്നും മാറി കുറച്ചുസമയം സ്വസ്ഥമായി കഴിയാനാണ് ഒക്ടോബറിൽ യുവതി ലണ്ടനിലെ ട്രാവെലൊഡ്ജ് ഹോട്ടലിൽ മുറിയെടുത്തത്. എന്നാൽ പിന്തുടർന്നെത്തിയ ഉപദ്രവകാരി, തൻ്റെ കാമുകിക്ക് മുറിക്കുള്ളിൽ അപസ്മാരം വന്നിരിക്കുകയാണെന്ന് ജീവനക്കാരെ വിശ്വസിപ്പിക്കുകയായിരുന്നു. റൂം നമ്പർ വ്യക്തമാക്കിയ ജീവനക്കാർ ഇയാൾക്ക് താക്കോലും നൽകി.

തുടർന്ന് മുറിയിലെത്തിയ ഇയാൾ വാതിൽ ചവിട്ടിത്തുറന്ന് യുവതിയെ ക്രൂരമായി ആക്രമിക്കുകയും ഫോൺ തട്ടിയെടുക്കാൻ ശ്രമിക്കുകയും ചെയ്തു. സുരക്ഷിത താവളമെന്ന് കരുതിയ ഇടത്തുണ്ടായ ഈ അനുഭവം വലിയ ഭീതി ഉണ്ടാക്കിയതായി യുവതി ബിബിസിയോട് പറഞ്ഞു. 2022-ലും സമാനമായ രീതിയിൽ ട്രാവെലൊഡ്ജ് ജീവനക്കാർ അപരിചിതന് റൂം കീ കൈമാറിയതിനെ തുടർന്ന് മറ്റൊരു യുവതി ലൈംഗികമായി ആക്രമിക്കപ്പെട്ടിരുന്നു.

സംഭവം വൻ വിവാദമായതോടെ ഹോട്ടൽ മാനേജ്‌മെന്റ് യുവതിയോട് ഖേദം പ്രകടിപ്പിച്ചു. സുരക്ഷാ മാനദണ്ഡങ്ങൾ പാലിക്കുന്നതിൽ വലിയ വീഴ്ച സംഭവിച്ചതായി സമ്മതിച്ച അധികൃതർ, സുരക്ഷാ നയങ്ങൾ പുനഃപരിശോധിക്കാൻ സ്വതന്ത്ര അന്വേഷണ കമ്മീഷനെ നിയമിച്ചതായും ജീവനക്കാർക്ക് കൂടുതൽ പരിശീലനം നൽകിയതായും വ്യക്തമാക്കി.