ലണ്ടനിൽ വീണ്ടും വിദ്വേഷ ആക്രമണം: ആംബുലൻസുകൾക്ക് പിന്നാലെ ചാരിറ്റി സ്ഥാപനത്തിനും തീയിട്ടു.

ലണ്ടൻ : ലണ്ടനിലെ ഹെൻഡനിൽ (Hendon) പ്രവർത്തിക്കുന്ന ‘ജൂയിഷ് ഫ്യൂച്ചേഴ്സ്’ (Jewish Futures) എന്ന വിദ്യാഭ്യാസ ചാരിറ്റി സ്ഥാപനത്തിന് നേരെ നടന്ന തീവെപ്പ് സംഭവത്തിൽ കൗണ്ടർ ടെററിസം പോലീസ് അന്വേഷണം ഊർജ്ജിതമാക്കി. വെള്ളിയാഴ്ച രാത്രി 10:30-ഓടെ മൂന്ന് കുപ്പികളിലായി ദ്രാവകം നിറച്ച പ്ലാസ്റ്റിക് കവറുമായി എത്തിയ ഒരാൾ കടയ്ക്ക് തീയിടാൻ ശ്രമിക്കുകയായിരുന്നു.

എന്നാൽ കുപ്പികൾ പൂർണ്ണമായി കത്താത്തതിനെ തുടർന്ന് ഇയാൾ സ്ഥലത്തുനിന്ന് ഓടിരക്ഷപ്പെട്ടു. കടയുടെ മുൻഭാഗത്തിന് നിസ്സാര കേടുപാടുകൾ സംഭവിച്ചെങ്കിലും ആർക്കും പരിക്കേറ്റിട്ടില്ല. ഇത് ഭീകരാക്രമണമാണെന്ന് ഔദ്യോഗികമായി സ്ഥിരീകരിച്ചിട്ടില്ലെങ്കിലും, കഴിഞ്ഞ മാസം ഗോൾഡേഴ്സ് ഗ്രീനിലെ (Golders Green) ഹത്സോള ആംബുലൻസുകൾക്ക് തീയിട്ട സംഭവവുമായും സിനഗോഗിന് നേരെ നടന്ന ആക്രമണവുമായും ഇതിന് സാമ്യമുള്ളതിനാലാണ് അന്വേഷണം ഭീകരവിരുദ്ധ സേനയ്ക്ക് കൈമാറിയത്.

ഇറാൻ ബന്ധമുള്ള ഒരു ഇസ്‌ലാമിസ്റ്റ് ഗ്രൂപ്പ് ഈ ആക്രമണങ്ങളുടെ ഉത്തരവാദിത്തം ഏറ്റെടുത്ത് ടെലിഗ്രാമിലൂടെ രംഗത്തെത്തിയിട്ടുണ്ട്. എന്നാൽ ഈ അവകാശവാദങ്ങൾ പോലീസ് ഇതുവരെ സ്ഥിരീകരിച്ചിട്ടില്ല. ലണ്ടനിലെ വിവിധ കമ്മ്യൂണിറ്റികൾക്കെതിരെ നടക്കുന്ന ഇത്തരം വിദ്വേഷകരമായ പ്രവൃത്തികൾക്കെതിരെ ശക്തമായ നടപടി സ്വീകരിക്കുമെന്ന് കൗണ്ടർ ടെററിസം കമാൻഡർ ഹെലൻ ഫ്ലാനഗൻ അറിയിച്ചു.

നിലവിൽ പ്രദേശത്ത് പോലീസ് സുരക്ഷയും പട്രോളിംഗും ശക്തമാക്കിയിട്ടുണ്ട്. കുറ്റവാളികളെ കണ്ടെത്താനായി സിസിടിവി ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം നടത്തിവരികയാണ്.