റോയൽ മെയിൽ നിരക്കുകൾ കുത്തനെ കൂട്ടി: എൻ.എച്ച്.എസിനും വൻകിട സ്ഥാപനങ്ങൾക്കും കോടികളുടെ അധിക ബാധ്യത!

ലണ്ടൻ: ബ്രിട്ടനിലെ തപാൽ സേവന രംഗത്ത് കടുത്ത സാമ്പത്തിക ആഘാതം സൃഷ്ടിച്ചുകൊണ്ട്, തങ്ങളുടെ ഹോൾസെയിൽ (Wholesale) പോസ്റ്റൽ സേവനങ്ങളുടെ നിരക്കുകൾ റോയൽ മെയിൽ (Royal Mail) മൂന്നിലൊന്നോളം വർദ്ധിപ്പിക്കുന്നു. വിപണന കത്തുകൾ, ബില്ലുകൾ, മെഡിക്കൽ അപ്പോയിന്റ്മെന്റ് അറിയിപ്പുകൾ എന്നിവ അയക്കുന്ന വൻകിട സ്ഥാപനങ്ങൾക്ക് ഒക്ടോബർ 5 മുതൽ ശരാശരി 25 ശതമാനം നിരക്ക് വർദ്ധനവ് ബാധകമാകുമെന്ന് റോയൽ മെയിൽ മുന്നറിയിപ്പ് നൽകി. 2024-ൽ മാത്രം കത്തുകൾ അയക്കാൻ 100 ദശലക്ഷത്തിലധികം പൗണ്ട് ചെലവഴിച്ച എൻ.എച്ച്.എസിന് (NHS) പുതിയ നിരക്ക് വർദ്ധനവ് കോടിക്കണക്കിന് പൗണ്ടിന്റെ അധിക ബാധ്യത വരുത്തിവെക്കും.

ബാങ്കുകൾ, എച്ച്.എം.ആർ.സി (HMRC), എൻ.എച്ച്.എസ് തുടങ്ങിയ സ്ഥാപനങ്ങൾക്കായി തപാൽ ശേഖരിച്ച് വിതരണത്തിന് നൽകുന്ന യുകെ മെയിൽ, വിസിൽ, സിറ്റിപോസ്റ്റ് തുടങ്ങിയ ബൾക്ക് മെയിൽ കമ്പനികളെയാണ് ഈ തീരുമാനം നേരിട്ട് ബാധിക്കുന്നത്. ബ്രിട്ടനിലെ കത്തുകളുടെ വിതരണത്തിൽ ഭൂരിഭാഗവും ഈ വഴിയിലാണ് നടക്കുന്നത്. ഇന്ധനച്ചെലവ്, ജീവനക്കാരുടെ ശമ്പളം, അനുബന്ധ പ്രവർത്തനച്ചെലവുകൾ എന്നിവയിലുണ്ടായ വലിയ വർദ്ധനവാണ് നിരക്ക് കൂട്ടാൻ കമ്പനിയെ പ്രേരിപ്പിച്ചതെന്ന് റോയൽ മെയിൽ അയച്ച കത്തിൽ വ്യക്തമാക്കുന്നു.

ചെക്ക് ശതകോടീശ്വരനായ ഡാനിയൽ ക്രേറ്റിൻസ്കിയുടെ ഉടമസ്ഥതയിലുള്ള റോയൽ മെയിൽ, തപാൽ റഗുലേറ്ററായ ഓഫകോം (Ofcom) നിശ്ചയിച്ച ഡെലിവറി ലക്ഷ്യങ്ങൾ പൂർത്തിയാക്കുന്നതിൽ നിരന്തരം പരാജയപ്പെടുന്നു എന്ന ആരോപണം നിലനിൽക്കെയാണ് പുതിയ നിരക്ക് വർദ്ധനവ്. കൃത്യസമയത്ത് കത്തുകൾ എത്തിക്കാത്തതിനെ തുടർന്ന് 2023 മുതൽ ഓഫകോം കമ്പനിക്ക് 37 ദശലക്ഷം പൗണ്ട് പിഴ ചുമത്തിയിട്ടുണ്ട്.

ഡിജിറ്റൽ യുഗത്തിൽ ജനങ്ങൾ ഇമെയിലുകളിലേക്കും സോഷ്യൽ മീഡിയകളിലേക്കും മാറിയതോടെ കത്തുകളുടെ എണ്ണത്തിൽ വലിയ കുറവുണ്ടായതായി റോയൽ മെയിൽ പറയുന്നു. 2019-20 കാലയളവിൽ പ്രതിവർഷം 6.3 ശതകോടി ഐറ്റങ്ങൾ അയച്ചിരുന്ന സ്ഥാനത്ത് ഇപ്പോൾ അത് 4.2 ശതകോടിയായി കുറഞ്ഞു. കഴിഞ്ഞ നാല് വർഷത്തിനിടെ 800 ദശലക്ഷം പൗണ്ടിന്റെ നഷ്ടമാണ് കമ്പനിക്കുണ്ടായത്. എന്നാൽ, ഈ നിരക്ക് വർദ്ധനവ് അഭൂതപൂർവ്വമാണെന്നും കത്തുകളെ മാത്രം ആശ്രയിക്കുന്ന സ്ഥാപനങ്ങൾക്ക് ഇത് കടുത്ത സാമ്പത്തിക പ്രതിസന്ധി സൃഷ്ടിക്കുമെന്നും മെയിൽ യൂസേഴ്സ് അസോസിയേഷൻ പ്രതികരിച്ചു.