റഷ്യയുടെ കണ്ണുരുട്ടൽ, പാശ്ചാത്യ മോഹം; അർമേനിയ ഇന്ന് ജനവിധി എഴുതുന്നു.

യെരവാൻ: യൂറോപ്യൻ യൂണിയനിലേക്ക് അടുക്കണോ അതോ പരമ്പരാഗത സഖ്യകക്ഷിയായ റഷ്യയിലേക്ക് മടങ്ങണോ എന്ന് നിശ്ചയിക്കുന്ന നിർണായക പൊതുതിരഞ്ഞെടുപ്പിൽ അർമേനിയ ഇന്ന് വോട്ട് രേഖപ്പെടുത്തുന്നു. നിലവിലെ പ്രധാനമന്ത്രി നികോൾ പാഷിന്യാൻ പാശ്ചാത്യ അനുകൂല നിലപാടുകളുമായി വീണ്ടും ജനവിധി തേടുമ്പോൾ, റഷ്യൻ അനുകൂല പ്രതിപക്ഷ പാർട്ടികൾ അദ്ദേഹത്തിന് ശക്തമായ വെല്ലുവിളിയാണ് ഉയർത്തുന്നത്.

പാഷിന്യാൻ ഭരണത്തിൻ കീഴിൽ അർമേനിയ യൂറോപ്യൻ യൂണിയനുമായി അടുക്കുന്നതിൽ കടുത്ത അതൃപ്തിയിലാണ് മോസ്കോ. വോട്ടെടുപ്പിന് തൊട്ടുമുൻപുള്ള ആഴ്ചകളിൽ അർമേനിയയിൽ നിന്നുള്ള പഴങ്ങൾ, പച്ചക്കറികൾ, വൈൻ തുടങ്ങിയവയുടെ ഇറക്കുമതി നിരോധിച്ച് റഷ്യ സാമ്പത്തിക സമ്മർദ്ദം ശക്തമാക്കിയിരുന്നു. യുക്രെയ്ൻ തകർച്ചയുടെ തുടക്കം യൂറോപ്യൻ യൂണിയനിൽ ചേരാനുള്ള അവരുടെ ശ്രമങ്ങളോടെയായിരുന്നു എന്ന് റഷ്യൻ പ്രസിഡന്റ് വ്ലാഡിമിർ പുടിൻ അർമേനിയയ്ക്ക് പരസ്യ മുന്നറിയിപ്പും നൽകിയിട്ടുണ്ട്.

2023-ൽ അയൽരാജ്യമായ അസർബൈജാൻ സൈനിക നടപടിയിലൂടെ നഗോർണോ-കരാബാഖ് പ്രദേശം പിടിച്ചെടുത്തതാണ് പാഷിന്യാന് രാജ്യത്തിനകത്ത് തിരിച്ചടിയായത്. ഇതിനെത്തുടർന്ന് അദ്ദേഹത്തിന്റെ ജനപ്രീതി വലിയ തോതിൽ ഇടിഞ്ഞു. എങ്കിലും, അഴിമതി നിറഞ്ഞ പഴയ ഭരണകൂടങ്ങളുടെ തിരിച്ചുവരവ് ആഗ്രഹിക്കാത്ത വോട്ടർമാരിലാണ് പാഷിന്യാന്റെ പ്രതീക്ഷ. വോട്ടിംഗ് പുരോഗമിക്കുമ്പോൾ റഷ്യയുടെ സാമ്പത്തിക ഉപരോധങ്ങളെ മറികടക്കാൻ അർമേനിയയ്ക്ക് യൂറോപ്യൻ യൂണിയൻ 50 മില്യൺ യൂറോയുടെ അടിയന്തര സഹായം പ്രഖ്യാപിച്ചിട്ടുണ്ട്.