യു.എസും ഇസ്രായേലും ആക്രമിച്ചാൽ ഗൾഫിലെ എഐ, എണ്ണ കേന്ദ്രങ്ങൾ തകർക്കുമെന്ന് ഇറാന്റെ മുന്നറിയിപ്പ്.
തെഹ്റാൻ: അമേരിക്കയും ഇസ്രായേലും വീണ്ടും സൈനിക ആക്രമണത്തിന് മുതിർന്നാൽ ഗൾഫ് മേഖലയിലെ ഏഴ് രാജ്യങ്ങളിലായുള്ള എണ്ണ ഉൽപ്പാദന കേന്ദ്രങ്ങൾ, നിർമ്മിത ബുദ്ധി (AI) സൗകര്യങ്ങൾ, ഡാറ്റാ സെന്ററുകൾ, സമുദ്രാന്തര കേബിളുകൾ എന്നിവ ലക്ഷ്യമിട്ട് പ്രത്യാക്രമണം നടത്തുമെന്ന് ഇറാന്റെ മുന്നറിയിപ്പ്. ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്സെൻ റെസായിയാണ് ഈ കാര്യം വ്യക്തമാക്കിയിരിക്കുന്നത്.
ഇറാന്റെ സാമ്പത്തിക മേഖല ആക്രമിക്കപ്പെടുമ്പോൾ, ശത്രുക്കൾക്ക് തുണയാകുന്ന സാമ്പത്തിക-സാങ്കേതിക ശൃംഖലകളെ സുരക്ഷിതമായി തുടരാൻ അനുവദിക്കില്ലെന്ന് മൊഹ്സെൻ റെസായി വ്യക്തമാക്കി. യു.എസുമായി ബന്ധപ്പെട്ട കോടിക്കണക്കിന് ഡോളറിന്റെ എഐ സ്ഥാപനങ്ങളും ഡാറ്റാ സെന്ററുകളുമാണ് ഇറാന്റെ ലക്ഷ്യപ്പട്ടികയിലുള്ളത്.
മേഖലയിൽ യുദ്ധഭീതി ശക്തമായ പശ്ചാത്തലത്തിൽ സ്ഥിതിഗതികൾ ചർച്ച ചെയ്യുന്നതിനായി യൂറോപ്യൻ രാജ്യങ്ങളിലെ വിദേശകാര്യ മന്ത്രിമാരും തുർക്കി, സൗദി അറേബ്യ, പാകിസ്താൻ, ഈജിപ്ത് പ്രതിനിധികളും വെള്ളിയാഴ്ച ഇസ്താംബൂളിൽ അടിയന്തര യോഗം ചേരും. നയതന്ത്ര ചർച്ചകൾ സ്തംഭിച്ചതോടെ അമേരിക്ക മിഡിൽ ഈസ്റ്റിൽ വിമാനവാഹിനിക്കപ്പലുകളും സൈനിക സന്നാഹങ്ങളും വർദ്ധിപ്പിച്ചു വരികയാണ്.
ഹോർമുസ് കടലിടുക്കിലൂടെ നീങ്ങിയ നാല് വാണിജ്യ കപ്പലുകൾ ആക്രമിച്ചതായും മൂന്ന് കപ്പലുകൾ മൈൻ സ്ഫോടനത്തിൽ പെട്ടതായും ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) അവകാശപ്പെട്ടു. സംഘർഷ സാധ്യത കടുത്തതോടെ ക്രൂഡ് ഓയിൽ വില ബാരലിന് 113.4 ഡോളറിലേക്ക് ഉയർന്നു. ഉപരോധം പിൻവലിച്ചാൽ ഏഴ് ദിവസത്തിനകം ഹോർമുസ് ഉപരോധം അവസാനിപ്പിക്കാമെന്ന് ഇറാൻ നിർദ്ദേശിച്ചിട്ടുണ്ടെങ്കിലും വ്യവസ്ഥകൾ പൂർണ്ണമായും അംഗീകരിക്കാൻ യു.എസ് തയ്യാറായിട്ടില്ല.
