യുകെ ലേബർ പാർട്ടിയിൽ വൻ ഭിന്നത! പ്രധാനമന്ത്രിക്കെതിരെ പരസ്യമായി രംഗത്തിറങ്ങി ആൻഡി ബേൺഹാം.
ലണ്ടൻ: യുകെയിലെ ചെറുകിട ബിസിനസ്സ് മേഖലയെ സഹായിക്കാൻ ലക്ഷ്യമിട്ട് ബിസിനസ്സ് നികുതികളിൽ (Business Rates) വൻ ഇളവുകൾ പ്രഖ്യാപിച്ച് ഗ്രേറ്റർ മാഞ്ചസ്റ്റർ മേയർ ആൻഡി ബേൺഹാം രംഗത്ത്. പ്രധാനമന്ത്രി കീർ സ്റ്റാറർ നയിക്കുന്ന ലേബർ പാർട്ടി സർക്കാരിന്റെ നിലവിലെ സാമ്പത്തിക നയങ്ങളെ പരസ്യമായി വിമർശിച്ചുകൊണ്ടാണ് ബേൺഹാമിന്റെ പുതിയ പ്രഖ്യാപനം. ലേബർ പാർട്ടിക്ക് ചെറുകിട ബിസിനസുകളുടെ കാര്യത്തിൽ തെറ്റുപറ്റിയെന്ന് അദ്ദേഹം തുറന്നടിച്ചു.
മേക്കർഫീൽഡ് പാർലമെന്റ് ഉപതിരഞ്ഞെടുപ്പ് പ്രചാരണത്തിന്റെ ഭാഗമായി പുറത്തിറക്കിയ പുതിയ നയരേഖയിലാണ് ബേൺഹാം ഈ നിർദ്ദേശങ്ങൾ മുന്നോട്ടുവെച്ചത്. പബ്ബുകൾ, ക്ലബ്ബുകൾ, മ്യൂസിക് വെന്യൂകൾ എന്നിവയ്ക്കുള്ള ബിസിനസ്സ് നികുതിയിൽ അടുത്ത വർഷം മുതൽ 20 ശതമാനം കുറവ് വരുത്താൻ അദ്ദേഹം ശുപാർശ ചെയ്യുന്നു. കൂടാതെ ചെറുകിട, സ്വതന്ത്ര ഹോസ്പിറ്റാലിറ്റി-റീട്ടെയിൽ സ്ഥാപനങ്ങൾക്കുള്ള നികുതി പരിധി 2017-ന് ശേഷം ആദ്യമായി ഉയർത്തി ഒട്ടുമിക്ക കുടുംബ സംരംഭങ്ങളെയും നികുതി ബാധ്യതയിൽ നിന്ന് പൂർണ്ണമായി ഒഴിവാക്കുമെന്നും അദ്ദേഹം വ്യക്തമാക്കി.
ഓൺലൈൻ ഭീമന്മാരായ ആമസോൺ പോലുള്ള വൻകിട കമ്പനികളുടെ വെയർഹൗസുകൾക്ക് ഉയർന്ന നികുതി ചുമത്തിയും, ഹൈ സ്ട്രീറ്റുകളിൽ ദീർഘകാലമായി അടഞ്ഞുകിടക്കുന്ന കെട്ടിടങ്ങളുടെ ഉടമകളെ ലക്ഷ്യമിട്ടും ഈ പദ്ധതിക്ക് ആവശ്യമായ പണം കണ്ടെത്തുമെന്നാണ് ബേൺഹാമിന്റെ നിർദ്ദേശം. പബ്ബുകൾക്ക് 15 ശതമാനം ഇളവ് നൽകുമെന്ന ട്രഷറിയുടെ നിലവിലെ പദ്ധതിയെക്കാൾ ഒരുപടി മുന്നിലാണ് ബേൺഹാമിന്റെ ഈ പുതിയ പ്രഖ്യാപനം.
ജൂൺ 18-ന് നടക്കുന്ന മേക്കർഫീൽഡ് ഉപതിരഞ്ഞെടുപ്പിൽ വിജയിച്ച് പാർലമെന്റിലേക്ക് തിരിച്ചെത്താൻ ശ്രമിക്കുന്ന ആൻഡി ബേൺഹാം, ലേബർ പാർട്ടിയുടെ നേതൃസ്ഥാനത്തേക്ക് കീർ സ്റ്റാററെ വെല്ലുവിളിക്കുമെന്ന സൂചനകളും ശക്തമാക്കിയിട്ടുണ്ട്. ബിബിസിയുടെ ക്വസ്റ്റ്യൻ ടൈം പരിപാടിയിൽ സംസാരിക്കവെ, ലേബർ പാർട്ടിയിൽ നേതൃമാറ്റത്തിനായുള്ള മത്സരം ഉണ്ടായാൽ താൻ അതിൽ തീർച്ചയായും പങ്കെടുക്കുമെന്ന് അദ്ദേഹം പരസ്യമായി സ്ഥിരീകരിച്ചു.
