യുകെയെ പിടിച്ചുലച്ച് സാമ്പത്തിക പ്രതിസന്ധി; മേയ് മാസത്തിൽ കടമെടുത്തത് 23.3 ശതകോടി പൗണ്ട്!

ലണ്ടൻ : ഇറാൻ യുദ്ധത്തെത്തുടർന്നുണ്ടായ സാമ്പത്തിക പ്രതിസന്ധികൾക്കിടയിൽ, മേയ് മാസത്തിൽ യുകെ പ്രതീക്ഷിച്ചതിലും ഉയർന്ന തുകയായ 23.3 ശതകോടി പൗണ്ട് കടമെടുത്തതായി റിപ്പോർട്ട്. ലേബർ പാർട്ടി നേതൃത്വം ഏറ്റെടുക്കാനൊരുങ്ങുന്ന ആൻഡി ബേൺഹാമിന് (Andy Burnham) മുന്നിലുള്ള കടുത്ത സാമ്പത്തിക വെല്ലുവിളികളാണ് ഇത് ചൂണ്ടിക്കാണിക്കുന്നത്.

മേക്കർഫീൽഡ് ഉപതെരഞ്ഞെടുപ്പിൽ ബേൺഹാം വിജയിച്ചതിന് തൊട്ടുപിന്നാലെയാണ് ഓഫീസ് ഫോർ നാഷണൽ സ്റ്റാറ്റിസ്റ്റിക്സ് (ONS) ഈ വിവരങ്ങൾ പുറത്തുവിട്ടത്. ചരിത്രത്തിൽ ഒരു മേയ് മാസത്തിൽ രേഖപ്പെടുത്തുന്ന ഏറ്റവും ഉയർന്ന രണ്ടാമത്തെ പൊതുമേഖലാ കടമെടുപ്പാണിത്.

​മിഡിൽ ഈസ്റ്റ് സംഘർഷങ്ങളോട് സാമ്പത്തിക വിപണി പ്രതികരിച്ചതിനെത്തുടർന്ന് പലിശ നിരക്കുകൾ ഉയർന്നതാണ് ഈ വർദ്ധനവിന് കാരണം. ഓഫീസ് ഫോർ ബജറ്റ് റെസ്പോൺസിബിലിറ്റി (OBR) മാർച്ചിൽ പ്രവചിച്ചതിനേക്കാൾ 5.6 ശതകോടി പൗണ്ട് അധികമാണിത്. സാമ്പത്തിക വിദഗ്ദ്ധർ 18.5 ശതകോടി പൗണ്ടിന്റെ കടമെടുപ്പ് മാത്രമാണ് പ്രതീക്ഷിച്ചിരുന്നത്. പുതിയ സാമ്പത്തിക വർഷത്തിന്റെ ആദ്യ രണ്ട് മാസങ്ങളിലെ ആകെ കടമെടുപ്പ് 46.3 ശതകോടി പൗണ്ടിലെത്തി.

ഇത് കഴിഞ്ഞ വർഷത്തെ അപേക്ഷിച്ച് 8.9 ശതകോടി പൗണ്ട് കൂടുതലാണ്. കടം, പൊതുസേവനങ്ങൾ, നിക്ഷേപങ്ങൾ, ആനുകൂല്യങ്ങൾ എന്നിവയ്ക്കായുള്ള ചിലവുകൾ വർദ്ധിച്ചതാണ് നികുതി വരുമാനത്തേക്കാൾ കടമെടുപ്പ് കൂട്ടാൻ കാരണമായതെന്ന് ONS വ്യക്തമാക്കുന്നു. ഉപതെരഞ്ഞെടുപ്പ് വിജയത്തോടെ ബേൺഹാം പാർട്ടി നേതൃത്വത്തിനായി കെയർ സ്റ്റാർമറെ വെല്ലുവിളിക്കുമെന്നാണ് സൂചന. ഈ സാഹചര്യം ചാൻസലർ റേച്ചൽ റീവ്സിനും വലിയ സമ്മർദ്ദമുണ്ടാക്കുന്നുണ്ട്.