യുകെയിൽ വ്യോമഗതാഗതത്തിൽ വീണ്ടും വൻ പ്രതിസന്ധി; നാട്സ് സാങ്കേതിക തകരാറിനെ തുടർന്ന് വിമാന സർവീസുകൾ തടസ്സപ്പെട്ടു!

ലണ്ടൻ: സ്കോട്ട്ലൻഡ്, വടക്കൻ അയർലൻഡ്, വടക്കൻ ഇംഗ്ലണ്ട് എന്നിവിടങ്ങളിൽ നാഷണൽ എയർ ട്രാഫിക് സർവീസസിന് (Nats) വീണ്ടും സാങ്കേതിക തകരാർ സംഭവിച്ചതിനെ തുടർന്ന് വിമാന സർവീസുകൾ താറുമാറായി. രണ്ടാഴ്ചയ്ക്കിടെയുണ്ടാകുന്ന രണ്ടാമത്തെ വലിയ തകരാറാണിത്. സ്കോട്ട്ലൻഡിലെ പ്രെസ്റ്റ്വിക് കൺട്രോൾ സെന്ററിലുണ്ടായ തകരാറിനെ തുടർന്ന് നിരവധി വിമാനങ്ങൾ വൈകുകയും പത്തിലധികം സർവീസുകൾ റദ്ദാക്കുകയും ചെയ്തു.

ബ്രിട്ടീഷ് എയർവേയ്സ്, ഈസിജെറ്റ്, റയാൻഎയർ തുടങ്ങിയ പ്രമുഖ എയർലൈനുകളെല്ലാം സർവീസുകളെ ബാധിച്ചതായി സ്ഥിരീകരിച്ചു. ലക്ഷക്കണക്കിന് യാത്രക്കാരെ ദുരിതത്തിലാക്കിയ ഈ സംഭവത്തിൽ കമ്പനിക്കെതിരെ ശക്തമായ വിമർശനവുമായി വിവിധ എയർലൈൻ കമ്പനികൾ രംഗത്തെത്തിയിട്ടുണ്ട്. രണ്ടാഴ്ച മുൻപ് സമാനമായ രീതിയിൽ വലിയ തകരാറുണ്ടായിരുന്നെന്നും, സുരക്ഷാ മുൻകരുതലുകൾ സ്വീകരിച്ചതായി അവകാശപ്പെട്ട് ദിവസങ്ങൾക്കുള്ളിൽ വീണ്ടും പിഴവുണ്ടായത് ഗുരുതരമാണെന്നും എയർലൈനുകൾ കുറ്റപ്പെടുത്തുന്നു.

എഞ്ചിനീയർമാർ പ്രശ്നം പരിഹരിച്ചതായും സിസ്റ്റം സാധാരണ നിലയിലേക്ക് മടങ്ങിവരികയാണെന്നും ഗതാഗത സെക്രട്ടറി ഹൈഡി അലക്സാണ്ടർ വ്യക്തമാക്കി. എങ്കിലും സർവീസുകൾ പൂർണ്ണമായി പുനഃസ്ഥാപിക്കാൻ സമയമെടുക്കുമെന്നും യാത്രക്കാർ വിമാനത്താവളത്തിലേക്ക് തിരിക്കുന്നതിന് മുൻപ് ഫ്ലൈറ്റ് സ്റ്റാറ്റസ് പരിശോധിക്കണമെന്നും അധികൃതർ നിർദ്ദേശം നൽകിയിട്ടുണ്ട്.

തുടർച്ചയായി ഉണ്ടാകുന്ന ഇത്തരം സാങ്കേതിക തകരാറുകൾ നാട്സ് സംവിധാനത്തിന്റെ സുരക്ഷയെയും കാര്യക്ഷമതയെയും ചോദ്യം ചെയ്യുന്നതാണെന്ന് വ്യോമയാന വിദഗ്ധരും കമ്പനികളും ചൂണ്ടിക്കാണിക്കുന്നു. ഉത്തരവാദികളായവർക്കെതിരെ കർശന നടപടി വേണമെന്ന ആവശ്യവും ശക്തമായിട്ടുണ്ട്.