യുകെയിൽ രാഷ്ട്രീയ മാറ്റം: ആൻഡി ബേൺഹാം അടുത്ത പ്രധാനമന്ത്രിയായേക്കും; ലേബർ പാർട്ടിയിൽ പൂർണ്ണ പിന്തുണ.
ലണ്ടൻ: ബ്രിട്ടീഷ് പ്രധാനമന്ത്രി കീർ സ്റ്റാർമർ രാജിവെച്ചതിനെ തുടർന്ന് ലേബർ പാർട്ടിയിൽ പുതിയ നേതൃത്വത്തിനായുള്ള നീക്കങ്ങൾ സജീവമാകുന്നു. പ്രമുഖ നേതാവായ ആൻഡി ബേൺഹാമിനെ (Andy Burnham) പാർട്ടി തലപ്പത്തേക്ക് ഐക്യകണ്ഠേന പിന്തുണയ്ക്കാൻ മുതിർന്ന നേതാക്കൾക്കിടയിൽ ധാരണയായതായി ബിബിസി റിപ്പോർട്ട് ചെയ്തു. മത്സരമില്ലാതെ അദ്ദേഹം ലേബർ പാർട്ടിയുടെ അടുത്ത നേതാവും രാജ്യത്തിന്റെ പ്രധാനമന്ത്രിയുമായി തിരഞ്ഞെടുക്കപ്പെടാനാണ് സാധ്യത.
തിങ്കളാഴ്ച മാഞ്ചസ്റ്ററിൽ നടക്കുന്ന ചടങ്ങിൽ ആൻഡി ബേൺഹാം തന്റെ പുതിയ സാമ്പത്തിക നയം പ്രഖ്യാപിക്കും. ഇതിന് ശേഷമേ താൻ നേതൃസ്ഥാനത്തേക്ക് മത്സരിക്കണമോ എന്ന കാര്യത്തിൽ അന്തിമ തീരുമാനമെടുക്കൂ എന്ന് മുൻ പ്രതിരോധ മന്ത്രി അൽ കാൺസ് വ്യക്തമാക്കി. എന്നാൽ, പാർട്ടിയിൽ മറ്റൊരു മത്സരമുണ്ടാകില്ലെന്നും ബേൺഹാമിനെ ഏകകണ്ഠമായി തിരഞ്ഞെടുക്കാനാണ് എംപിമാർ ആഗ്രഹിക്കുന്നതെന്നും ഡെപ്യൂട്ടി ലീഡർ ലൂസി പവലും ഹൗസിംഗ് സെക്രട്ടറി സ്റ്റീവ് റീഡും സൂചിപ്പിച്ചു.
പുതിയ പ്രധാനമന്ത്രി പദവിയിലെത്തുന്നതിന് മുൻപായി രാജ്യത്ത് ഉടനടി പൊതുതിരഞ്ഞെടുപ്പ് നടത്തണമെന്ന് റിഫോം യുകെ നേതാവ് നൈജൽ ഫരാജ് ആവശ്യപ്പെട്ടു. എന്നാൽ കൺസർവേറ്റീവ് പാർട്ടി ഈ ആവശ്യത്തെ പിന്തുണച്ചിട്ടില്ല. അതേസമയം, പ്രതിപക്ഷത്തിന്റെ വിമർശനങ്ങളെ ലേബർ പാർട്ടി തള്ളി. രാജ്യം ഇപ്പോൾ സാമ്പത്തിക പ്രതിസന്ധിയിലൂടെ കടന്നുപോകുകയാണെന്നും, ജനങ്ങൾ ആഗ്രഹിക്കുന്നത് തർക്കങ്ങളല്ല, മറിച്ച് മാറ്റമാണെന്നും ലൂസി പവൽ വ്യക്തമാക്കി.
പ്രാദേശിക ഭരണകൂടങ്ങൾക്ക് കൂടുതൽ അധികാരം നൽകുന്ന ‘വികേന്ദ്രീകരണ’ നയങ്ങൾക്കായിരിക്കും ബേൺഹാം തന്റെ ഭരണത്തിൽ മുൻഗണന നൽകുകയെന്ന് പാർട്ടി വൃത്തങ്ങൾ അറിയിച്ചു. അതേസമയം ബേൺഹാം തന്റെ സാമ്പത്തിക നയങ്ങളും പ്രതിരോധ പദ്ധതികളും വ്യക്തമാക്കണമെന്ന് കൺസർവേറ്റീവ് പാർട്ടി നേതാവ് കെമി ബേഡനോക്ക് ആവശ്യപ്പെട്ടിട്ടുണ്ട്.
