യുഎസ്-ഇറാൻ യുദ്ധം കടുക്കുന്നു; ജോർദാനിലെ ആക്രമണത്തിൽ കാണാതായ മൂന്നാമത്തെ യുഎസ് സൈനികനും കൊല്ലപ്പെട്ടു, ആകെ മരണം 18 ആയി.

വാഷിംഗ്ടൺ: ജോർദാനിലെ യുഎസ് സൈനിക കേന്ദ്രത്തിന് നേരെ വെള്ളിയാഴ്ച നടന്ന ഇറാൻ മിസൈൽ-ഡ്രോൺ ആക്രമണത്തിൽ കാണാതായ മൂന്നാമത്തെ യുഎസ് സൈനികൻ കൊല്ലപ്പെട്ടതായി പെന്റഗൺ സ്ഥിരീകരിച്ചു. ന്യൂയോർക്ക് സ്വദേശിയായ സർജന്റ് ആഞ്ചൽ എസ്. രാംപെർസാദ് (28) ആണ് കൊല്ലപ്പെട്ടതെന്ന് സൈന്യം തിരിച്ചറിഞ്ഞു. ഇതോടെ പോരാട്ടം ആരംഭിച്ചതിന് ശേഷം കൊല്ലപ്പെട്ട ആകെ യുഎസ് സൈനികരുടെ എണ്ണം 18 ആയി ഉയർന്നു. നേരത്തെ ഹവായ് സ്വദേശിയായ ടൈലർ ജെയിംസ് ഫീഹാൻ (25), ടെക്സാസ് സ്വദേശിനി ഇസബെല്ല ഗോൺസാലസ് (19) എന്നിവരാണ് ഇതേ ആക്രമണത്തിൽ കൊല്ലപ്പെട്ടത്.

ജോർദാനിലെ ആക്രമണത്തിന് ശേഷം നടത്തിയ തിരച്ചിലിൽ കണ്ടെത്തിയ അവശിഷ്ടങ്ങൾ രാംപെർസാദിന്റേതാണെന്ന് പെന്റഗൺ സ്ഥിരീകരിക്കുകയായിരുന്നു. ഗോൺസാലസ് പ്രവർത്തിച്ചിരുന്ന ജർമ്മനിയിലെ പത്താം ആർമി എയർ ആന്റ് മിസൈൽ ഡിഫൻസ് കമാൻഡിന്റെ ഭാഗമായിരുന്നു രാംപെർസാദും. ഇസ്ലാമിക് സ്റ്റേറ്റിനെതിരെയുള്ള യുഎസ് മിഷന്റെ ഭാഗമായാണ് ഇവർ മേഖലയിൽ സേവനമനുഷ്ഠിച്ചിരുന്നത്. ഇതിനുപുറമെ, ഇറാഖിൽ ഇറാനിയൻ ഡ്രോൺ ബോംബ് നിർവീര്യമാക്കുന്നതിനിടെ കൊല്ലപ്പെട്ട മറ്റൊരു സൈനികൻ നോർത്ത് കരോലിന സ്വദേശിയായ സർജന്റ് മൈക്കൽ ഇമ്മാനുവൽ സ്വിന്റൺ (30) ആണെന്നും തിരിച്ചറിഞ്ഞിട്ടുണ്ട്.

യുഎസും ഇറാനും തമ്മിലുള്ള പ്രത്യാക്രമണം തുടർച്ചയായ പത്താം ദിവസത്തിലേക്ക് കടന്നതോടെ ഗൾഫ് മേഖല കടുത്ത ഭീതിയിലാണ്. ആക്രമണങ്ങളിൽ ഇരുകൂട്ടരും മേഖലയിലെ പ്രധാന സിവിലിയൻ അടിസ്ഥാനസൗകര്യങ്ങൾ തകർത്തതായി റിപ്പോർട്ടുണ്ട്. കഴിഞ്ഞ മൂന്ന് ആഴ്ചയ്ക്കുള്ളിൽ യുഎസ് നടത്തിയ വ്യോമാക്രമണങ്ങളിൽ മാത്രം കുറഞ്ഞത് 50 പേർ കൊല്ലപ്പെടുകയും 500-ലധികം പേർക്ക് പരിക്കേൽക്കുകയും ചെയ്തതായി ഇറാനിയൻ അധികൃതർ അവകാശപ്പെടുന്നു.

ഗൾഫ് രാജ്യങ്ങൾ, ഇസ്രായേൽ, ലെബനൻ എന്നിവിടങ്ങളിലെ വിദേശ തൊഴിലാളികളും കപ്പൽ ജീവനക്കാരും ഈ സംഘർഷത്തിൽ കൊല്ലപ്പെട്ടിട്ടുണ്ട്. മേഖലയിലുടനീളം യുഎസ് സൈനികർ നിലയുറപ്പിച്ചിരിക്കുന്നതിനാൽ ഇറാന്റെ പ്രത്യാക്രമണം വരും ദിവസങ്ങളിലും തുടരുമെന്നാണ് ഭയം. നയതന്ത്ര തലത്തിലുള്ള ശ്രമങ്ങളൊന്നും വിജയിക്കാത്തതിനാൽ യുഎസ്-ഇറാൻ യുദ്ധം പൂർണ്ണ തോതിലേക്ക് കടക്കുകയാണെന്ന ആശങ്ക ശക്തമാകുന്നു.