യുഎസിലെ വൻ എണ്ണച്ചോർച്ച; കീസ്റ്റോൺ പൈപ്പ്‌ലൈൻ കമ്പനിക്ക് 225 കോടി രൂപ പിഴ.

കാൻസാസ് സിറ്റി: അമേരിക്കയിലെ കാൻസാസിൽ 2022 ഡിസംബറിലുണ്ടായ വൻ എണ്ണച്ചോർച്ചയുമായി ബന്ധപ്പെട്ട് കീസ്റ്റോൺ പൈപ്പ്‌ലൈൻ കമ്പനിക്ക് കോടിക്കണക്കിന് രൂപയുടെ പിഴ. യുഎസ് പരിസ്ഥിതി സംരക്ഷണ ഏജൻസി (EPA), കാൻസാസ് സംസ്ഥാന ഭരണകൂടം എന്നിവരുമായി ഒപ്പുവെച്ച നിയമപരമായ ഒത്തുതീർപ്പ് പ്രകാരം പൈപ്പ്‌ലൈൻ ഓപ്പറേറ്ററായ ‘സൗത്ത് ബോ’ (South Bow) 2.69 കോടി ഡോളർ (ഏകദേശം 225 കോടിയിലധികം രൂപ) സിവിൽ പിഴയായി നൽകണം. ഭാവിയിൽ ഇത്തരം അപകടങ്ങൾ ഒഴിവാക്കാനുള്ള മുൻകരുതലുകൾക്കായി 4 കോടി ഡോളർ കൂടി കമ്പനി ചെലവഴിക്കേണ്ടിവരും.

കാൻസാസ് സിറ്റിയിൽ നിന്നും ഏകദേശം 241 കിലോമീറ്റർ അകലെയുള്ള വാഷിംഗ്ടൺ കൗണ്ടിയിലെ കാർഷിക മേഖലയിലൂടെ കടന്നുപോകുന്ന തോട്ടിലേക്കാണ് അന്ന് 13,000 ബാരലോളം കനത്ത അസംസ്‌കൃത എണ്ണ ഒഴുകിയെത്തിയത്. ഒളിമ്പിക് വലിപ്പത്തിലുള്ള ഒരു നീന്തൽക്കുളം നിറയ്ക്കാൻ ആവശ്യമായത്ര എണ്ണയാണ് അന്ന് ചോർന്നത്. കഴിഞ്ഞ ഒൻപത് വർഷത്തിനിടെ യുഎസിലുണ്ടായ ഏറ്റവും വലിയ കരയധിഷ്ഠിത എണ്ണച്ചോർച്ചയായിരുന്നു ഇത്.

അപകടത്തെത്തുടർന്ന് പ്രദേശത്തെ ജലാശയങ്ങളും ഭൂമിയും പൂർണ്ണമായി നശിക്കുകയും ജീവജാലങ്ങൾക്ക് ജീവിക്കാൻ കഴിയാത്ത അവസ്ഥയാവുകയും ചെയ്തിരുന്നു. തോട്ടിലെ വെള്ളത്തെ ആശ്രയിച്ചിരുന്ന വംശനാശഭീഷണി നേരിടുന്ന ഒരിനം വവ്വാലുകൾ ഉൾപ്പെടെ 2,700-ലധികം മൃഗങ്ങളാണ് എണ്ണച്ചോർച്ചയിൽ ചാവുകയോ പരിക്കേൽക്കുകയോ ചെയ്തത്. എന്നാൽ പൈപ്പ്‌ലൈൻ നിർമ്മാണ സമയത്ത് ഉണ്ടായ അപാകതകൾ മൂലം പൈപ്പിന്റെ വളവിൽ അമിത സമ്മർദ്ദം ഉണ്ടായതാണ് തകർച്ചയ്ക്ക് കാരണമായതെന്നാണ് പിന്നീട് പുറത്തുവന്ന എഞ്ചിനീയറിംഗ് റിപ്പോർട്ടിൽ വ്യക്തമാക്കുന്നത്.

കാനഡയിൽ നിന്നുള്ള കനത്ത ടാർ സാൻഡ്സ് ഓയിൽ ഇല്ലിനോയിസ്, ഒക്ലഹോമ, ടെക്സസ് തുടങ്ങിയ യുഎസ് സംസ്ഥാനങ്ങളിലെ റിഫൈനറികളിലേക്ക് എത്തിക്കുന്നതാണ് 4,327 കിലോമീറ്റർ നീളമുള്ള കീസ്റ്റോൺ പൈപ്പ്‌ലൈൻ ശൃംഖല. പരിസ്ഥിതി മലിനീകരണവുമായി ബന്ധപ്പെട്ട തർക്കങ്ങളെ തുടർന്ന് 2021-ൽ ജോ ബൈഡൻ സർക്കാർ തടഞ്ഞുവെച്ചിരുന്ന കീസ്റ്റോൺ എക്സ്എൽ (Keystone XL) പദ്ധതിയുടെ ചെറിയൊരു പതിപ്പായ പുതിയ പൈപ്പ്‌ലൈൻ നിർമ്മാണത്തിന് ഈ വർഷം ഏപ്രിലിൽ പ്രസിഡന്റ് ഡൊണാൾഡ് ട്രംപ് അനുമതി നൽകിയിരുന്നു. ഇതിനിടയിലാണ് പഴയ എണ്ണച്ചോർച്ചയ്ക്ക് കമ്പനി വലിയ തുക പിഴയൊടുക്കേണ്ടി വരുന്നത്.