യാത്രാ പരിധി നീക്കി ഡബ്ലിൻ എയർപോർട്ട് നിയമം പ്രാബല്യത്തിൽ; ഇന്ത്യയിൽ നിന്നടക്കം കൂടുതൽ നേരിട്ടുള്ള വിമാന സർവീസുകൾക്ക് വഴിതുറക്കും.

ഡബ്ലിൻ: ഡബ്ലിൻ വിമാനത്താവളത്തിൽ നിന്നുള്ള യാത്രക്കാരുടെ വാർഷിക എണ്ണത്തിന് ഏർപ്പെടുത്തിയിരുന്ന കർശന നിയന്ത്രണം നീക്കി. പ്രതിവർഷം 32 മില്യൺ യാത്രികർ എന്ന പരിധി പിൻവലിക്കാൻ ഗതാഗത മന്ത്രിക്ക് അധികാരം നൽകുന്ന പുതിയ നിയമത്തിൽ അയർലൻഡ് പ്രസിഡന്റ് കാതറിൻ കൊണോളി ഒപ്പുവെച്ചു. ഇതോടെ ഇന്ത്യയിൽ നിന്നുള്ളതടക്കമുള്ള കൂടുതൽ അന്താരാഷ്ട്ര ഡയറക്ട് സർവീസുകൾ ഡബ്ലിനിലേക്ക് ഉടൻ ആരംഭിച്ചേക്കുമെന്നാണ് സൂചന.

വിമാനത്താവളത്തിന് ചുറ്റുമുള്ള റോഡുകളിലെ അമിത ഗതാഗതക്കുരുക്ക് കുറയ്ക്കുകയെന്ന ലക്ഷ്യത്തോടെ 2007 മുതലാണ് ഡബ്ലിൻ എയർപോർട്ടിൽ യാത്രക്കാർക്ക് പരിധി ഏർപ്പെടുത്തിയത്. അന്തരീക്ഷ-ശബ്ദ മലിനീകരണങ്ങൾ ചൂണ്ടിക്കാട്ടി ചില തദ്ദേശവാസികളും പരിസ്ഥിതി പ്രവർത്തകരും ഇപ്പോഴും ഈ നിയന്ത്രണത്തെ അനുകൂലിക്കുന്നുണ്ട്. ഐറിഷ് പാർലമെന്റ് പാസാക്കിയ ചരിത്രപ്രധാനമായ ഈ പുതിയ നിയമം അയർലൻഡിന്റെ വ്യോമയാന മേഖലയ്ക്ക് വലിയ ഉണർവ് നൽകുമെന്നാണ് പ്രതീക്ഷിക്കുന്നത്.

യാത്രക്കാരുടെ എണ്ണത്തിൽ പരിധി നിലനിർത്തുന്നത് രാജ്യത്തിന്റെ സാമ്പത്തിക വളർച്ചയെ ദോഷകരമായി ബാധിക്കുമെന്ന് ഐറിഷ്, യൂറോപ്യൻ, അമേരിക്കൻ എയർലൈനുകൾ ഉൾപ്പെടെയുള്ള വ്യോമയാന കമ്പനികൾ ശക്തമായി വാദിച്ചിരുന്നു. മുൻപ് 2024-ൽ ഹൈക്കോടതി ഈ നിയന്ത്രണം താൽക്കാലികമായി നിർത്തിവെക്കുകയും ചെയ്തിരുന്നു.

യാത്രാ പരിധി പൂർണ്ണമായി പിൻവലിക്കുന്നതിനുള്ള നടപടികളുമായി എത്രയും വേഗം മുന്നോട്ട് പോകുമെന്നും നിയമത്തിൽ പറഞ്ഞിരിക്കുന്ന കര്‍ശനമായ സമയപരിധിക്കുള്ളില്‍ ആവശ്യമായ എല്ലാ പാരിസ്ഥിതിക വിലയിരുത്തലുകളും പൂർത്തിയാക്കുമെന്നും മന്ത്രി അറിയിച്ചു. രാത്രികാല സർവീസുകളുടെ എണ്ണം വർദ്ധിപ്പിക്കുന്നതിനുള്ള ആസൂത്രണ അനുമതി കഴിഞ്ഞ വർഷം തന്നെ ഡബ്ലിൻ വിമാനത്താവളത്തിന് ലഭിച്ചിരുന്നു.