മാധ്യമ കുത്തകകൾക്കെതിരെ വരാനിരിക്കുന്നത് രാഷ്ട്രീയ സുനാമി; ട്രംപ് അനുമതി നൽകിയ കോർപ്പറേറ്റ് ലയനങ്ങൾ ഭാവിയിൽ റദ്ദാക്കുമെന്ന് എലിസബത്ത് വാറൻ.

വാഷിംഗ്ടൺ ഡിസി: ട്രംപ് ഭരണകൂടം അനുമതി നൽകിയ വൻകിട കോർപ്പറേറ്റ് ലയനങ്ങൾ ഭാവിയിൽ അധികാരത്തിൽ വരുന്ന പുതിയ സർക്കാർ റദ്ദാക്കുമെന്ന മുന്നറിയിപ്പുമായി ഡെമോക്രാറ്റിക് സെനറ്റർ എലിസബത്ത് വാറൻ. അമേരിക്കയിലെ ഏറ്റവും വലിയ രണ്ട് പ്രമുഖ വാർത്താ മാധ്യമങ്ങളെ പ്രസിഡന്റിനെ അനുകൂലിക്കുന്ന ഒരു കുടുംബത്തിന്റെ നിയന്ത്രണത്തിലാക്കുന്ന കരാർ ഉൾപ്പെടെയുള്ളവ ഇതിൽ പെടും. വൻകിട കോർപ്പറേറ്റുകൾക്കെതിരെ ജനങ്ങൾക്കിടയിൽ ഉയർന്നുവരുന്ന ശക്തമായ രാഷ്ട്രീയ പ്രതിഷേധങ്ങളുടെ പശ്ചാത്തലത്തിലാണ് ഈ ലയനങ്ങൾ നടക്കുന്നതെന്നും, അടുത്ത പ്രസിഡന്റ് തെരഞ്ഞെടുപ്പ് നടക്കുന്ന 2028-ഓടെ തങ്ങൾക്ക് തെറ്റുപറ്റിയെന്ന് ഈ കമ്പനികൾക്ക് ബോധ്യപ്പെടുമെന്നും വാറൻ അഭിമുഖത്തിൽ വ്യക്തമാക്കി.

സിഎൻഎൻ (CNN), എച്ച്ബിഒ (HBO) എന്നിവയുടെ മാതൃ കമ്പനിയായ വാർണർ ബ്രദേഴ്സ് ഡിസ്കവറിയും, സിബിഎസ് ന്യൂസ് (CBS News) ഉൾപ്പെടുന്ന പാരാമൗണ്ട് സ്കൈഡാൻസും തമ്മിലുള്ള 111 ബില്യൺ ഡോളറിന്റെ ലയനത്തിന് ഈയിടെ യുഎസ് നീതിന്യായ വകുപ്പ് അനുമതി നൽകിയിരുന്നു. ഡൊണാൾഡ് ട്രംപിന്റെ അടുത്ത സുഹൃത്തായ ലാറി എലിസണും മകൻ ഡേവിഡും ചേർന്ന് നിയന്ത്രിക്കുന്ന ഈ പുതിയ സഖ്യം സിഎൻഎന്നിന്റെ വാർത്തകളെ ട്രംപിന് അനുകൂലമായി മാറ്റിയേക്കുമെന്ന ആശങ്ക ശക്തമാണ്.

മാധ്യമ രംഗത്തെ ഈ വൻ ലയനം വാർത്തകളുടെ നിഷ്പക്ഷതയെ പൂർണ്ണമായി തകർക്കുമെന്നും മാനേജ്‌മെന്റിന് താല്പര്യമുള്ള വാർത്തകൾ മാത്രം ജനങ്ങളിലേക്ക് എത്തുന്ന അവസ്ഥയുണ്ടാക്കുമെന്നും വാറൻ വിമർശിച്ചു. ഈ ലയനത്തിനെതിരെ സംസ്ഥാന അറ്റോർണി ജനറൽമാർ നിയമനടപടികൾക്ക് പദ്ധതിയിടുന്നുണ്ട്. മാധ്യമ മേഖലയ്ക്ക് പുറമെ നിപ്പോൺ സ്റ്റീൽ യുഎസ് സ്റ്റീൽ ഏറ്റെടുത്തതും, കാപ്പിറ്റൽ വൺ – ഡിസ്കവർ ഫിനാൻഷ്യൽ ലയനവുമുൾപ്പെടെ നിരവധി വൻകിട കരാറുകൾക്ക് ട്രംപ് ഭരണകൂടം അനുമതി നൽകിയിട്ടുണ്ട്.

 വരാനിരിക്കുന്ന ഇടക്കാല തെരഞ്ഞെടുപ്പിൽ സെനറ്റിലും പ്രതിനിധി സഭയിലും ഭൂരിപക്ഷം നേടാൻ സാധിച്ചാൽ ട്രംപിന്റെ ഈ ലയന നയങ്ങൾക്കെതിരെ ശക്തമായി പ്രതികരിക്കാൻ ഡെമോക്രാറ്റുകൾക്ക് അവസരം ലഭിക്കും. ട്രംപ് വൈറ്റ് ഹൗസിൽ ഉള്ളിടത്തോളം നിയമനിർമ്മാണം കടുപ്പമേറിയതാണെങ്കിലും, പീന്നീട് നിയമലംഘനം എന്ന് കണ്ടെത്തിയാൽ മുൻകാല ലയനങ്ങൾ പോലും റദ്ദാക്കാൻ (retroactive breakups) ആന്റിട്രസ്റ്റ് നിയമത്തിൽ വ്യവസ്ഥയുണ്ടെന്ന് വാറൻ ഓർമ്മിപ്പിച്ചു