മരണമണി മുഴങ്ങാൻ നിമിഷങ്ങൾ ബാക്കി; ലോകത്തെ ഞെട്ടിച്ച് ട്രംപിന്റെ ‘യു-ടേൺ’, ഇറാനിൽ വെടിനിർത്തൽ!

നാടകീയ നീക്കം; യുഎസ്-ഇറാൻ സംഘർഷത്തിന് താൽക്കാലിക ആശ്വാസം: ഹോർമുസ് കടലിടുക്ക് തുറക്കും

ഇറാനിലെ വൈദ്യുതി നിലയങ്ങളും പാലങ്ങളും ഉൾപ്പെടെയുള്ള അടിസ്ഥാന സൗകര്യങ്ങൾ ബോംബിട്ട് തകർക്കുമെന്നായിരുന്നു ട്രംപിന്റെ ഭീഷണി. “ഒരു നാഗരികത മുഴുവൻ ഇന്ന് രാത്രി മരിക്കും” എന്ന ട്രംപിന്റെ സോഷ്യൽ മീഡിയ പോസ്റ്റിന് പിന്നാലെ ബി-52 ബോംബർ വിമാനങ്ങൾ ഇറാൻ ലക്ഷ്യമാക്കി നീങ്ങിയത് വലിയ ആശങ്കയുണ്ടാക്കിയിരുന്നു. എന്നാൽ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫിന്റെ അവസാന നിമിഷത്തെ ഇടപെടൽ വലിയൊരു ദുരന്തം ഒഴിവാക്കുകയായിരുന്നു. ഈ രണ്ടാഴ്ചത്തെ കാലയളവിൽ ടെഹ്‌റാൻ സമർപ്പിച്ച പത്തു നിർദ്ദേശങ്ങളിൽ തുടർചർച്ചകൾ നടത്താനും മേഖലയിൽ ശാശ്വത സമാധാനം കൊണ്ടുവരാനുമാണ് നിലവിലെ തീരുമാനം.

വെടിനിർത്തലിനോട് സഹകരിക്കുമെന്ന് ഇസ്രായേലും വ്യക്തമാക്കിയിട്ടുണ്ട്. ഹോർമുസ് കടലിടുക്കിലെ ഉപരോധം നീങ്ങുന്നതോടെ ഇസ്രായേൽ ആക്രമണങ്ങൾ നിർത്തിവെക്കും. അതേസമയം, സാധാരണക്കാരുടെ ജീവിതത്തെ ബാധിക്കുന്ന അടിസ്ഥാന സൗകര്യങ്ങൾ തകർക്കുമെന്ന ട്രംപിന്റെ മുൻ നിലപാടിനെതിരെ യുഎൻ സെക്രട്ടറി ജനറലും മാർപ്പാപ്പയും ഉൾപ്പെടെയുള്ളവർ ശക്തമായ വിമർശനം ഉന്നയിച്ചിരുന്നു. കഴിഞ്ഞ അഞ്ച് ആഴ്ചയായി തുടരുന്ന യുദ്ധത്തിൽ ഇറാനിലെ പല പ്രധാന പാലങ്ങളും സബ്സ്റ്റേഷനുകളും ഇതിനോടകം തകർക്കപ്പെട്ടിട്ടുണ്ട്. ഈ പുതിയ വെടിനിർത്തൽ ധാരണ മേഖലയിൽ സമാധാനം തിരിച്ചുകൊണ്ടുവരാൻ സഹായിക്കുമെന്നാണ് ലോകരാഷ്ട്രങ്ങളുടെ പ്രതീക്ഷ