മക്കളെ ക്രൂരമായി കൊലപ്പെടുത്തിയ നഴ്സിന്റെ വിചാരണ തുടരുന്നു: മനസ്സാക്ഷിയെ ഞെട്ടിച്ച സംഭവങ്ങൾ കോടതിയിൽ വിവരിച്ച് പോലീസ്!
വാഷിംഗ്ടൺ : 2023 ജനുവരിയിൽ അമേരിക്കയിലെ മസാച്യുസെറ്റ്സിലുള്ള സ്വന്തം വീടിന്റെ രണ്ടാം നിലയിലെ ജനലിൽ നിന്ന് ചാടിയ ലിൻഡ്സെ ക്ലാൻസി എന്ന മുൻ നഴ്സിന്റെ കൊലപാതക വിചാരണയിൽ ഞെട്ടിക്കുന്ന വെളിപ്പെടുത്തലുകളുമായി പോലീസും രക്ഷാപ്രവർത്തകരും. തങ്ങളുടെ മൂന്ന് കുഞ്ഞുങ്ങളും മരിച്ചുകിടക്കുന്നത് കണ്ട് ഭർത്താവ് പാട്രിക് ക്ലാൻസി നടത്തിയ അടിയന്തര സഹായ അഭ്യർത്ഥനയും വീടിന്റെ ബേസ്മെന്റിൽ കണ്ട ദാരുണമായ കാഴ്ചകളും ഉദ്യോഗസ്ഥർ കോടതിയിൽ വിശദീകരിച്ചു. വ്യായാമത്തിന് ഉപയോഗിക്കുന്ന ബാൻഡുകൾ ഉപയോഗിച്ചാണ് ലിൻഡ്സെ മൂന്ന് മക്കളെയും ശ്വാസം മുട്ടിച്ച് കൊലപ്പെടുത്തിയത്.
മൂന്ന് വയസ്സുള്ള ഡോസൺ, അഞ്ച് വയസ്സുള്ള കോറ, എട്ട് മാസം പ്രായമുള്ള കല്ലൻ എന്നീ കുഞ്ഞുങ്ങളാണ് ദാരുണമായി കൊല്ലപ്പെട്ടത്. പ്രസവാനന്തര മാനസിക വൈകല്യമായ ‘പോസ്റ്റ്പാർട്ടം സൈക്കോസിസ്’ (Postpartum Psychosis) മൂലമാണ് താൻ ഇത് ചെയ്തതെന്നും, കുഞ്ഞുങ്ങളെ കൊന്ന് സ്വന്തം ജീവനൊടുക്കാൻ മനസ്സിൽ ആരോ കൽപ്പിച്ചതിനാലാണ് ഇങ്ങനെ ചെയ്തതെന്നുമാണ് ലിൻഡ്സെയുടെ അഭിഭാഷകന്റെ വാദം. എന്നാൽ മസാച്യുസെറ്റ്സ് ജനറൽ ഹോസ്പിറ്റലിലെ മുൻ നഴ്സായ ലിൻഡ്സെ ബോധപൂർവ്വം ചെയ്ത കൊലപാതകമാണിതെന്നും അതിന് ക്രിമിനൽ ഉത്തരവാദിത്തം ഏൽക്കണമെന്നുമാണ് പ്രോസിക്യൂഷൻ വാദിക്കുന്നത്.
ദുരന്തദിവസം ലിൻഡ്സെ പറഞ്ഞതനുസരിച്ച് പുറത്തുപോയി തിരികെ വന്ന ഭർത്താവാണ് കുട്ടികളെ ബേസ്മെന്റിൽ മരിച്ച നിലയിൽ കണ്ടെത്തിയത്. രണ്ടാമത്തെ നിലയിൽ നിന്ന് ചാടിയതിനെ തുടർന്ന് അരയ്ക്ക് താഴേക്ക് തളർന്ന ലിൻഡ്സെയും ഭർത്താവും തമ്മിൽ സംഭവത്തിന് ശേഷം ആദ്യമായാണ് കോടതിയിൽ വെച്ച് കണ്ടുമുട്ടുന്നത്. തനിക്ക് മാനസികാസ്വാസ്ഥ്യമുള്ള ഭാര്യയോട് ക്ഷമ തോന്നുന്നുവെന്നാണ് ഭർത്താവ് മുൻപ് നൽകിയ അഭിമുഖങ്ങളിൽ പറഞ്ഞത്. എന്നാൽ കുട്ടികളെ രക്ഷിക്കാൻ സാധിക്കാത്തതിന്റെ ആഘാതത്തിലാണ് കുടുംബമെന്ന് സാക്ഷികൾ വ്യക്തമാക്കി.
കുറ്റക്കാരിയാണെന്ന് തെളിഞ്ഞാൽ ലിൻഡ്സെയ്ക്ക് ജീവപര്യന്തം തടവുശിക്ഷ ലഭിക്കും. എന്നാൽ മാനസികാരോഗ്യം തകരാറിലായതിനാലാണ് കുറ്റകൃത്യം നടന്നതെന്ന വാദം അംഗീകരിക്കപ്പെട്ടാൽ പ്രതിയെ സർക്കാർ മാനസികാരോഗ്യ കേന്ദ്രത്തിലേക്ക് മാറ്റും. പ്രസവത്തിന് ശേഷം വിഷാദരോഗത്തിനുള്ള മരുന്നുകൾ കഴിച്ചിരുന്ന ലിൻഡ്സെയുടെ രോഗാവസ്ഥ കൃത്യമായി നിർണ്ണയിക്കാനോ ചികിത്സിക്കാനോ ഡോക്ടർമാർക്ക് സാധിച്ചില്ലെന്ന് ആരോപിച്ച് കുടുംബം ആശുപത്രികൾക്കെതിരെ നിയമനടപടി സ്വീകരിച്ചിട്ടുണ്ട്.
