ഭീകരവിരുദ്ധ പോരാട്ടത്തിൽ യുഎസിന് ജാഗ്രതക്കുറവ്; 9/11 ആക്രമണത്തിന് 25 വർഷത്തിന് ശേഷം മുന്നറിയിപ്പുമായി വിദഗ്ധർ.
വാഷിംഗ്ടൺ: 9/11 ഭീകരാക്രമണത്തിന്റെ 25-ാം വാർഷിക വേളയിൽ, ഭീകരവിരുദ്ധ പ്രവർത്തനങ്ങളിൽ അമേരിക്കയുടെ നിഷ്ക്രിയത്വവും വിഭവങ്ങളുടെ ദൗർലഭ്യവും വലിയ ഭീഷണിയാകുന്നുവെന്ന് മുൻ സുരക്ഷാ ഉദ്യോഗസ്ഥരുടെയും വിദഗ്ധരുടെയും മുന്നറിയിപ്പ്. റഷ്യ, ചൈന തുടങ്ങിയ വൻശക്തികളിൽ നിന്നുള്ള ഭീഷണികളിലേക്ക് മുൻഗണന മാറിയതും ബജറ്റ് വെട്ടിക്കുറച്ചതും പരിചയസമ്പന്നരായ ഉദ്യോഗസ്ഥരുടെ കൊഴിഞ്ഞുപോക്കുമാണ് യുഎസിനെ വീണ്ടും ആശങ്കയിലാക്കുന്നത്. 2001-ലെ ദുരന്തത്തിന് വഴിവെച്ച അതേ സാഹചര്യങ്ങളിലേക്ക് രാജ്യം തിരിച്ചെത്തുകയാണോ എന്ന് സുരക്ഷാ വിദഗ്ധർ സംശയം പ്രകടിപ്പിക്കുന്നു.
ട്രംപ് ഭരണകൂടം സ്വീകരിക്കുന്ന രാഷ്ട്രീയ ഇടപെടലുകളും അനാവശ്യ നിയമനങ്ങളും സുരക്ഷാ ഏജൻസികളുടെ വീര്യത്തെ ബാധിച്ചതായി റിപ്പോർട്ടുകൾ വ്യക്തമാക്കുന്നു. മെക്സിക്കൻ മയക്കുമരുന്ന് കാർട്ടലുകളെ ഭീകര സംഘടനകളായി പ്രഖ്യാപിച്ച് അവക്കെതിരെ വിഭവങ്ങൾ വഴിതിരിച്ചുവിട്ടത് യഥാർത്ഥ ഭീകരവിരുദ്ധ പോരാട്ടങ്ങളുടെ വ്യാപ്തി കുറച്ചു. കൂടാതെ തങ്ങളുടെ രാഷ്ട്രീയ അജണ്ടകൾക്കനുസരിച്ച് സുരക്ഷാ നയങ്ങൾ രൂപീകരിക്കുന്നത് അൽഖാഇദ, ഐസിസ് തുടങ്ങിയ സംഘടനകൾക്കെതിരെയുള്ള ജാഗ്രത കുറയാൻ കാരണമാകുന്നുണ്ട്.
സുരക്ഷാ മേഖലയിൽ അനുഭവ സമ്പന്നരായ ഉദ്യോഗസ്ഥരുടെ കുറവും തീവ്രവാദ ആശയങ്ങൾ തടയാനായി തുടങ്ങിയ പദ്ധതികൾ നിർത്തലാക്കിയതും പ്രതിസന്ധി ഇരട്ടിയാക്കി. കഴിഞ്ഞ രണ്ട് പതിറ്റാണ്ടിലേറെയായി ആഗോള ഭീകരവിരുദ്ധ പോരാട്ടത്തിൽ സജീവമായിരുന്നെങ്കിലും, അടുത്തിടെയുണ്ടായ മാറ്റങ്ങൾ ഇൻ്റലിജൻസ് സംവിധാനങ്ങളെ ദുർബലപ്പെടുത്തിയതായി വിലയിരുത്തപ്പെടുന്നു. കഴിഞ്ഞ ചില വർഷങ്ങളായി വിദേശ ഭീകരസംഘടനകളുടെ ആക്രമണങ്ങൾ നേരിട്ട് ഉണ്ടായിട്ടില്ലെങ്കിലും അവർ തങ്ങളുടെ തന്ത്രങ്ങൾ മാറ്റിയേക്കാമെന്നും വിദഗ്ധർ ചൂണ്ടിക്കാണിക്കുന്നു.
നിലവിൽ ചൈനയും റഷ്യയുമായുള്ള ഭൗമരാഷ്ട്രീയ മത്സരങ്ങൾക്ക് പ്രാധാന്യം നൽകേണ്ടി വരുമ്പോൾ, ഭീകരവാദത്തിൽ നിന്നുള്ള അപകടസാധ്യതകൾ അമേരിക്കയ്ക്ക് പൂർണ്ണമായി ഒഴിവാക്കാനാകില്ല. 2001-ന് മുൻപുണ്ടായതിന് സമാനമായി രഹസ്യാന്വേഷണ മുന്നറിയിപ്പുകൾ അവഗണിക്കുന്ന പ്രവണത തിരിച്ചടിയാകുമെന്ന് വെസ്റ്റ് പോയിന്റിലെ സെന്റർ ഡയറക്ടർ ഡൺ റാസ്ലർ മുന്നറിയിപ്പ് നൽകുന്നു. മാറിവരുന്ന ഭീഷണികളെ കൃത്യമായി മനസ്സിലാക്കി പ്രതിരോധിക്കാൻ തയാറായില്ലെങ്കിൽ രാജ്യം വീണ്ടും വലിയ സുരക്ഷാ വെല്ലുവിളികൾ നേരിടേണ്ടി വരും.
