ബ്രെക്സിറ്റിന് ശേഷം യൂറോപ്പുമായി വീണ്ടും അടുക്കാൻ ബ്രിട്ടൻ; സ്റ്റാമറുടെ നീക്കം ‘രഹസ്യ അജണ്ട’യെന്ന് പ്രതിപക്ഷം.

ലണ്ടൻ: യൂറോപ്യൻ യൂണിയൻ (EU) നിയമങ്ങളുമായി കൂടുതൽ സഹകരിച്ചു പ്രവർത്തിക്കാനുള്ള നീക്കത്തെ ന്യായീകരിച്ച് ബ്രിട്ടീഷ് പ്രധാനമന്ത്രി കീർ സ്റ്റാമർ. അന്താരാഷ്ട്ര തലത്തിൽ നിലനിൽക്കുന്ന അനിശ്ചിതത്വങ്ങളും സാമ്പത്തിക പ്രതിസന്ധികളും കണക്കിലെടുത്ത് യൂറോപ്പുമായി അടുത്ത ബന്ധം പുലർത്തുന്നത് ബ്രിട്ടൻ്റെ ദേശീയ താൽപ്പര്യമാണെന്ന് അദ്ദേഹം വ്യക്തമാക്കി.

ഇറാൻ യുദ്ധം ഉൾപ്പെടെയുള്ള ആഗോള സംഘർഷങ്ങളുടെ പശ്ചാത്തലത്തിൽ പ്രതിരോധം, സുരക്ഷ, ഊർജ്ജം, സാമ്പത്തികം എന്നീ മേഖലകളിൽ യൂറോപ്പുമായി ചേന്നുനിൽക്കേണ്ടത് അനിവാര്യമാണെന്നും സ്റ്റാമർ ബിബിസിയോട് പറഞ്ഞു. ഭക്ഷണം, പാനീയങ്ങൾ എന്നിവയുടെ വ്യാപാരം സുഗമമാക്കുന്നതിനായി കൊണ്ടുവരുന്ന പുതിയ ബില്ലിലൂടെ യൂറോപ്യൻ യൂണിയന്റെ ചില നിയമങ്ങൾ പാർലമെൻ്റിലെ വിശദമായ ചർച്ചകളില്ലാതെ തന്നെ നടപ്പിലാക്കാൻ സർക്കാരിന് സാധിക്കും.

എന്നാൽ ഇത് ജനാധിപത്യ വിരുദ്ധമാണെന്നും ‘രഹസ്യമായ സംയോജന’മാണെന്നും ആരോപിച്ച് കൺസർവേറ്റീവ് പാർട്ടിയും റിഫോം യുകെ നേതാവ് നൈജൽ ഫാരേജും രംഗത്തെത്തി. ബ്രിട്ടനെ വീണ്ടും യൂറോപ്യൻ യൂണിയന്റെ നിയന്ത്രണത്തിലാക്കാനുള്ള ശ്രമമാണിതെന്ന് അവർ ആരോപിച്ചു. എന്നാൽ, പാർലമെൻ്റ് നിയമം പാസാക്കിയാൽ മാത്രമേ മാറ്റങ്ങൾ സംഭവിക്കൂ എന്ന് സ്റ്റാമർ മറുപടി നൽകി.

പത്ത് വർഷം മുമ്പ് നടന്ന ബ്രെക്സിറ്റ് ഹിതപരിശോധനയുടെ പഴയ തർക്കങ്ങളിൽ കുടുങ്ങിക്കിടക്കാതെ മുന്നോട്ട് നോക്കേണ്ട സമയമാണിതെന്ന് പ്രധാനമന്ത്രി ഓർമ്മിപ്പിച്ചു. വ്യാപാര തടസ്സങ്ങൾ കുറയ്ക്കുന്നതിലൂടെ ഭക്ഷ്യവസ്തുക്കളുടെ വില കുറയ്ക്കാനും ബ്രിട്ടീഷ് സമ്പദ്‌വ്യവസ്ഥയെ ശക്തിപ്പെടുത്താനും ഈ നീക്കം സഹായിക്കുമെന്നാണ് സർക്കാർ വാദം. പുതിയ കരാറുകൾ വഴി ഉൽപ്പാദനക്ഷമത വർദ്ധിപ്പിക്കാനും ഇറാൻ സംഘർഷം മൂലമുണ്ടാകുന്ന സാമ്പത്തിക ആഘാതം കുറയ്ക്കാനും സാധിക്കുമെന്ന് സർക്കാർ വൃത്തങ്ങൾ വിശ്വസിക്കുന്നു. എന്നാൽ, ബ്രിട്ടൻ്റെ സ്വയംഭരണാധികാരത്തിന്മേലുള്ള കടന്നുകയറ്റമാണിതെന്ന ആരോപണത്തിൽ ഉറച്ചുനിൽക്കുകയാണ് പ്രതിപക്ഷം.