ബ്രിട്ടീഷ് ഹോസ്പിറ്റാലിറ്റി മേഖലയിൽ പ്രതീക്ഷയുടെ തരംഗം, പക്ഷേ നികുതി ഇളവില്ലെങ്കിൽ പ്രതിസന്ധി രൂക്ഷമാകുമെന്ന് മുന്നറിയിപ്പ്

ലണ്ടൻ: ബ്രിട്ടനിൽ പ്രധാനമന്ത്രി ആന്റി ബർൺഹാം ഹോസ്പിറ്റാലിറ്റി മേഖലയ്ക്കായി പ്രഖ്യാപിച്ച പുതിയ നയങ്ങളെത്തുടർന്ന് പബ്ബുകൾ, ബാറുകൾ, ഹോട്ടലുകൾ എന്നിവയിൽ പ്രതീക്ഷയുടെ “ബർൺഹാം ബൗൺസ്” (Burnham bounce) ദൃശ്യമാകുന്നതായി പുതിയ സർവേ വ്യക്തമാക്കുന്നു. പ്രധാനമന്ത്രിയായി ചുമതലയേറ്റ ശേഷം പബ്ബുകൾ, ക്ലബ്ബുകൾ, ലൈവ് മ്യൂസിക് വേദികൾ എന്നിവയ്ക്കുള്ള ബിസിനസ്സ് നിരക്കുകളിൽ (Business rates) ഇളവുകൾ പ്രഖ്യാപിച്ചതാണ് മേഖലയ്ക്ക് വലിയ ആശ്വാസമായത്. ഇതോടെ ഹോസ്പിറ്റാലിറ്റി, ബ്രൂയിംഗ് മേഖലയിൽ പ്രവർത്തിക്കുന്ന 37 ശതമാനം സ്ഥാപനങ്ങളും പുതിയ സർക്കാർ തങ്ങൾക്ക് അനുകൂലമായിരിക്കുമെന്ന പ്രതീക്ഷ പങ്കുവെച്ചു.

നികുതി ഇളവുകൾ പ്രഖ്യാപിക്കുന്നതിന് മുൻപ് 18 ശതമാനം സ്ഥാപനങ്ങൾ മാത്രമാണ് സർക്കാരിൽ പ്രതീക്ഷ പ്രകടിപ്പിച്ചിരുന്നത്. ഇതിന്റെ ഇരട്ടിയിലധികം വർധനവാണ് നിലവിൽ രേഖപ്പെടുത്തിയിരിക്കുന്നത്. വ്യവസായ സംഘടനകൾ ഇതിനെ “ബർൺഹാം ബൗൺസ്” എന്നാണ് വിശേഷിപ്പിക്കുന്നത്.

ബ്രിട്ടീഷ് ബിയർ & പബ്സ് അസോസിയേഷൻ, യുകെ ഹോസ്പിറ്റാലിറ്റി, ബ്രിട്ടീഷ് ഇൻസ്റ്റിറ്റ്യൂട്ട് ഓഫ് ഇൻകീപ്പിംഗ്, ഹോസ്പിറ്റാലിറ്റി ഉൾസ്റ്റർ എന്നീ പ്രമുഖ സംഘടനകൾ നടത്തിയ സർവേയിൽ പങ്കെടുത്ത 75 ശതമാനം ആളുകളും നിലവിലെ ഉയർന്ന നികുതി ഭാരമാണ് തങ്ങളുടെ വളർച്ചയ്ക്ക് ഏറ്റവും വലിയ തടസ്സമെന്ന് ചൂണ്ടിക്കാട്ടി. രാഷ്ട്രീയ അനിശ്ചിതത്വമാണ് (37%) രണ്ടാമത്തെ വലിയ തടസ്സമായി ഉയർന്നുവന്നത്.

പ്രത്യേകിച്ച്, മൂല്യവർധിത നികുതി (VAT) 20 ശതമാനത്തിൽ നിന്ന് 10 ശതമാനമായി കുറയ്ക്കണമെന്ന ആവശ്യവുമായി 3.3 ലക്ഷത്തിലധികം ആളുകൾ ഒപ്പിട്ട ഹർജി സർക്കാരിന് സമർപ്പിച്ചിട്ടുണ്ട്. ഇത് യൂറോപ്യൻ രാജ്യങ്ങളിലെ നികുതി നിരക്കുകൾക്ക് സമാനമായി വ്യവസായത്തിന് ആശ്വാസം നൽകുമെന്നാണ് വാദം. എന്നാൽ, ഇത്തരമൊരു ഭീമമായ നികുതി ഇളവ് ഖജനാവിന് 1000 കോടി പൗണ്ടിലധികം (10bn) നഷ്ടമുണ്ടാക്കുമെന്നും ഇത് വലിയ ലാഭം ഉണ്ടാക്കുന്ന വൻകിട ബഹുരാഷ്ട്ര ശൃംഖലകൾക്ക് മാത്രമാണ് കൂടുതൽ ഗുണം ചെയ്യുകയെന്നും വിമർശകർ ചൂണ്ടിക്കാണിക്കുന്നു.