ബ്രിട്ടീഷ് കൊളോണിയൽ കാലത്തെ അടിമകളുടെ ചരിത്ര രേഖകൾ ഓൺലൈനിൽ; ലക്ഷക്കണക്കിന് കുടുംബങ്ങൾക്ക് പൂർവ്വികരെ കണ്ടെത്താം.

ലണ്ടൻ: മുൻ ബ്രിട്ടീഷ് കൊളോണിയൽ കോളനികളിലെ അടിമകളുടെ വിവരങ്ങൾ അടങ്ങിയ നാല് ദശലക്ഷത്തോളം ചരിത്ര രേഖകൾ ആദ്യമായി ഓൺലൈനിൽ ലഭ്യമാക്കി. ജനിതകശാസ്ത്ര കമ്പനിയായ ‘ആൻസെസ്ട്രി’ (Ancestry), യൂണിവേഴ്സിറ്റി കോളേജ് ലണ്ടനിലെ (UCL) സെന്റർ ഫോർ ദി സ്റ്റഡി ഓഫ് ദി ലെഗസിസ് ഓഫ് ബ്രിട്ടീഷ് സ്ലേവറിയുമായി സഹകരിച്ചാണ് ഈ ചരിത്രരേഖകൾ ഡിജിറ്റൈസ് ചെയ്ത് പരിശോധനയ്ക്കായി ഒരുക്കിയത്. ആഫ്രിക്കൻ-കരീബിയൻ വംശജരായ ലക്ഷക്കണക്കിന് ആളുകൾക്ക് തങ്ങളുടെ കുടുംബ ചരിത്രം കണ്ടെത്താൻ ഈ ഡിജിറ്റൽ ശേഖരം സഹായകരമാകും.

ബഹാമാസ്, ബാർബഡോസ്, ജമൈക്ക, മൗറീഷ്യസ്, ദക്ഷിണാഫ്രിക്ക, ട്രിനിഡാഡ് തുടങ്ങിയ മുൻ ബ്രിട്ടീഷ് കൊണോണിയൽ പ്രദേശങ്ങളിലെ 1813-നും 1840-നും ഇടയിലുള്ള കാലഘട്ടത്തിലെ വിവരങ്ങളാണ് ‘ഫോർമർ ബ്രിട്ടീഷ് കോളോണീസ് എൻസ്‌ലേവ്‌മെന്റ് രജിസ്‌റ്റേഴ്‌സ്’ എന്ന ഈ ശേഖരത്തിലുള്ളത്. അടിമക്കച്ചവടം നിരോധിച്ചതിന് ശേഷം ബ്രിട്ടീഷ് സർക്കാരാണ് ഈ രജിസ്റ്ററുകൾ തയ്യാറാക്കിയത്. അടിമകളുടെ പേര്, വയസ്സ്, ശരീരപ്രകൃതി, കുടുംബബന്ധങ്ങൾ, ജനനം, മരണം, ഉടമസ്ഥത മാറ്റങ്ങൾ തുടങ്ങിയ കൃത്യമായ വിവരങ്ങൾ ഇതിൽ രേഖപ്പെടുത്തിയിട്ടുണ്ട്.

ആദ്യം അടിമകളെ സ്വത്തായി കണക്കാക്കാൻ തയ്യാറാക്കിയ ഈ രേഖകൾ, ഇന്ന് അവരുടെ പിൻമുറക്കാർക്ക് സ്വന്തം വേരുകൾ കണ്ടെത്താനുള്ള പ്രധാന ഉപാധിയായി മാറിയിരിക്കുകയാണെന്ന് ചരിത്രകാരന്മാർ വ്യക്തമാക്കുന്നു. ലണ്ടനിലെ നാഷണൽ ആർക്കൈവ്സിൽ നേരിട്ടെത്താതെ തന്നെ, ഓൺലൈൻ വഴി പേരുകൾ തിരഞ്ഞ് പൂർവ്വികരെ കണ്ടെത്താൻ ഈ സൗകര്യം സഹായിക്കും. ആഫ്രിക്കൻ ഡയസ്പോറയിൽ പെട്ട ലോകമെമ്പാടുമുള്ള ആളുകൾക്ക് പരസ്പരം ബന്ധപ്പെടാനും തങ്ങളുടെ പാരമ്പര്യം മനസ്സിലാക്കാനും ഇത് പുതിയ വഴികൾ തുറക്കുമെന്ന് വിദഗ്ധർ അഭിപ്രായപ്പെടുന്നു.

ജമൈക്ക ഉൾപ്പെടെയുള്ള രാജ്യങ്ങളിലെ കുടുംബങ്ങളുടെ ആറ് തലമുറകൾ വരെയുള്ള വിവരങ്ങൾ ഈ രേഖകളുടെ സഹായത്തോടെ കണ്ടെത്താൻ കഴിഞ്ഞിട്ടുണ്ട്. വളരെ സൂക്ഷ്മമായ പരിശോധനകൾ ആവശ്യമുള്ള ഈ പ്രവർത്തനം ചരിത്രഗവേഷണ രംഗത്ത് വലിയ മാറ്റങ്ങൾ സൃഷ്ടിക്കുമെന്നാണ് പ്രതീക്ഷിക്കുന്നത്. ആൻസെസ്ട്രി അക്കൗണ്ട് നിർമ്മിക്കുന്ന ആർക്കും ഈ വിവരങ്ങൾ സൗജന്യമായി തിരയാവുന്നതാണ്.