ബ്രിട്ടനിലെ ക്രിസ്ത്യൻ ദേശീയത പള്ളിയിൽ പോകാത്തവരുടെ കൈകളിൽ: തിയോസ് പഠന റിപ്പോർട്ട്.

ലണ്ടൻ: ബ്രിട്ടനിൽ ക്രിസ്ത്യൻ ദേശീയത (Christian Nationalism) വെച്ചുപുലർത്തുന്നവരിൽ ഭൂരിഭാഗവും പതിവായി പള്ളിയിൽ പോകാത്തവരും, രാജ്യത്തിന്റെ ക്രിസ്ത്യൻ പാരമ്പര്യം സംരക്ഷിക്കുന്നതിൽ മാത്രം ശ്രദ്ധ കേന്ദ്രീകരിക്കുന്നവരുമാണെന്ന് പുതിയ പഠനം വെളിപ്പെടുത്തുന്നു. ബ്രിട്ടനിലെ തിയോസ് (Theos) എന്ന ചിന്താസഭ (Thinktank) ക്രിസ്തുമതത്തോടും ബ്രിട്ടീഷ് ദേശീയതയോടുമുള്ള ആളുകളുടെ സമീപനത്തെക്കുറിച്ച് നടത്തിയ സർവേയിലാണ് ഈ കണ്ടെത്തലുള്ളത്.

സർവേയിൽ പങ്കെടുത്തവരെ അഞ്ച് വിഭാഗങ്ങളായി തിരിച്ചതിൽ, ‘ഐഡന്റിറ്റി ഇന്റഗ്രേഷനിസ്റ്റുകൾ’ എന്ന് ഗവേഷകർ വിശേഷിപ്പിച്ച ക്രിസ്ത്യൻ ദേശീയതാ കാഴ്ചപ്പാടുള്ള വിഭാഗം ആകെ ജനസംഖ്യയുടെ 11 ശതമാനം മാത്രമാണ്. ഈ വിഭാഗത്തിൽപെട്ട 81% ആളുകൾ ക്രിസ്തുമത വിശ്വാസികളാണെന്ന് അവകാശപ്പെടുന്നുണ്ടെങ്കിലും, 13% പേർ മാത്രമാണ് ആഴ്ചയിലൊരിക്കൽ പള്ളിയിൽ പോകുന്നത്. കുടിയേറ്റത്തോടും ഇസ്ലാം മതത്തോടും കടുത്ത എതിർപ്പ് പുലർത്തുന്നവരാണ് ഇവർ. അതിൽ 19% പേർ മാത്രമാണ് അഭയാർത്ഥികളെ സ്വാഗതം ചെയ്യുന്നത് ക്രിസ്തീയ മൂല്യങ്ങളുടെ ഭാഗമാണെന്ന് വിശ്വസിക്കുന്നത്.

അതേസമയം, ‘ബിലീഫ് ഇന്റഗ്രേഷനിസ്റ്റുകൾ’ (13%) എന്നറിയപ്പെടുന്ന യഥാർത്ഥ വിശ്വാസികളായ വിഭാഗത്തിൽ 31% പേർ ആഴ്ച തോറും പള്ളിയിൽ പോകുന്നവരും 48% പേർ അഭയാർത്ഥികളെ പിന്തുണയ്ക്കുന്നവരുമാണ്. ഇവരിൽ കേവലം 18% പേർ മാത്രമാണ് ക്രിസ്ത്യൻ പാരമ്പര്യം സംരക്ഷിക്കുന്നത് വിശ്വാസത്തിന്റെ ഭാഗമാണെന്ന് കരുതുന്നത്. ക്രിസ്ത്യൻ ദേശീയവാദികളിൽ ഇത് 90% ആണ്. ക്രൈസ്തവ പ്രതീകങ്ങൾ ഉപയോഗിച്ച് നടത്തുന്ന പ്രതിഷേധങ്ങൾ മതപരമായ ഉണർവിന്റെ പ്രതിഫലനമല്ലെന്നും, മറിച്ച് കുടിയേറ്റത്തോടും സാംസ്കാരിക മാറ്റങ്ങളോടുമുള്ള ഭയം മൂലം ക്രിസ്തുമതത്തെ ഒരു ദേശീയ അടയാളമായി ഉയർത്തിക്കാട്ടുന്നതാണെന്നും റിപ്പോർട്ട് വ്യക്തമാക്കുന്നു.

ക്രിസ്തുമതം എന്നത് വെറുമൊരു ദേശീയ ഐഡന്റിറ്റിയല്ലെന്നും, അതിൽ മനുഷ്യത്വപരമായ മൂല്യങ്ങളും ഈശ്വരവിശ്വാസവുമാണ് പ്രധാനം എന്നും സഭാ നേതാക്കൾ പ്രതികരിച്ചു. ക്രിസ്ത്യൻ ദേശീയവാദം ഉയർത്തുന്നവർ കുരിശും വഹിച്ച് പ്രകടനങ്ങൾ നടത്താൻ താല്പര്യം കാണിക്കുന്നുണ്ടെങ്കിലും, യേശുവിന്റെ യഥാർത്ഥ ഉപദേശങ്ങൾ പിന്തുടരുന്നതിൽ പിന്നാക്കമാണെന്ന് ലിഡ്സിലെ ബിഷപ്പ് അരുൺ അറോറ വ്യക്തമാക്കി.