ഫ്ലോറിഡയിൽ 74 കാരനായ തടവുകാരന്റെ വധശിക്ഷ നടപ്പിലാക്കി; യുഎസിൽ പ്രായമേറിയ തടവുകാരുടെ ശിക്ഷാ നടപടികൾ ചർച്ചയാകുന്നു.

സ്റ്റാർക്ക് (ഫ്ലോറിഡ): ഫ്ലോറിഡയുടെ ചരിത്രത്തിലെ ഏറ്റവും പ്രായം കൂടിയ തടവുകാരിലൊരാളായ 74 കാരൻ ഡെന്നിസ് സോച്ചറിന്റെ വധശിക്ഷ നടപ്പിലാക്കി. ചൊവ്വാഴ്ച വൈകിട്ട് 6.16-ന് സ്റ്റാർക്കിന് സമീപമുള്ള ഫ്ലോറിഡ സ്റ്റേറ്റ് ജയിലിൽ വെച്ച് മാരകമായ വിഷക്കൂട്ടുൾപ്പെടെയുള്ള മൂന്ന് മരുന്നുകൾ കുത്തിവെച്ചാണ് മരണം സ്ഥിരീകരിച്ചത്. 1982 ജനുവരി 1-ന് പുതുവത്സര പാർട്ടി കഴിഞ്ഞ് മടങ്ങുകയായിരുന്ന 18 കാരിയായ പട്രീഷ്യ ഗിഫോർഡ് എന്ന പെൺകുട്ടിയെ തട്ടിക്കൊണ്ടുപോയി ശ്വാസം മുട്ടിച്ച് കൊലപ്പെടുത്തിയ കേസിലാണ് ഇയാൾ ശിക്ഷിക്കപ്പെട്ടത്.

അമേരിക്കയിൽ ഈ വർഷം ഏറ്റവും കൂടുതൽ വധശിക്ഷകൾ നടപ്പിലാക്കിയ സംസ്ഥാനമാണ് ഫ്ലോറിഡ. രാജ്യത്ത് ഈ വർഷം നടന്ന 16 വധശിക്ഷകളിൽ 10-ഉം ഫ്ലോറിഡയിലാണ് നടന്നത്. ഇതിൽ ഒരു മാസത്തിനിടയിൽ വധശിക്ഷയ്ക്ക് വിധിക്കപ്പെട്ട മൂന്ന് പ്രായമായ തടവുകാരിൽ ഒരാളാണ് സോച്ചർ. കഴിഞ്ഞ ജൂൺ 25-ന് ഭാര്യയെ കൊലപ്പെടുത്തിയ കേസിൽ 74 വയസ്സുകാരനായ ഡസ്റ്റി റേ സ്പെൻസറെ ഇവിടെ വധിച്ചിരുന്നു. കൂടാതെ, ഇതേ മാസം 28-ന് ഡൊമിനിക് ആന്റണി ഒച്ചിചോൺ എന്ന 80 വയസ്സുകാരന്റെ വധശിക്ഷയും നിശ്ചയിച്ചിട്ടുണ്ട്. ഇത് ഫ്ലോറിഡയിൽ വധിക്കപ്പെടുന്ന ഏറ്റവും പ്രായം കൂടിയ വ്യക്തിയായിരിക്കും.

സോച്ചറിന്റെ മരണം കുടുംബത്തിന് ആശ്വാസം നൽകുന്നതാണെങ്കിലും, കൊല്ലപ്പെട്ട പട്രീഷ്യയുടെ മൃതദേഹം ഇതുവരെ കണ്ടെത്താനാകാത്തത് വലിയ സങ്കടമായി തുടരുന്നതായി സഹോദരി മാരിയോൺ ഗിഫോർഡ് പറഞ്ഞു. പട്രീഷ്യ ജീവിച്ചതിനേക്കാൾ ഇരട്ടിയിലധികം കാലം സോച്ചർ ജയിലിൽ കഴിഞ്ഞുവെന്നും അവൾക്ക് അർഹമായ അന്ത്യവിശ്രമം നൽകാൻ പോലും സോച്ചർ ക്രൂരമായി അനുവദിച്ചില്ലെന്നും അവർ കുറ്റപ്പെടുത്തി.

അമേരിക്കയിൽ വധശിക്ഷ കാത്തു കഴിയുന്ന തടവുകാരുടെ പ്രായം വർദ്ധിച്ചുവരുന്നത് സംബന്ധിച്ച ചർച്ചകൾക്ക് ഈ സംഭവങ്ങൾ വീണ്ടും തുടക്കമിട്ടിട്ടുണ്ട്. യുഎസ് സുപ്രീം കോടതി സോച്ചറിന്റെ അവസാന അപ്പീലും തള്ളിയതോടെയാണ് ശിക്ഷ നടപ്പാക്കിയത്. വരാനിരിക്കുന്ന 80 കാരന്റെ ശിക്ഷ കൂടി നടപ്പിലായാൽ, ആധുനിക യുഎസ് ചരിത്രത്തിൽ വധിക്കപ്പെടുന്ന ഏറ്റവും പ്രായം കൂടിയ രണ്ടാമത്തെ തടവുകാരനായി അദ്ദേഹം മാറും. 2018-ൽ അലബാമയിൽ വധിക്കപ്പെട്ട 83 കാരനായ വാൾട്ടർ മൂഡി ജൂനിയറാണ് യുഎസിൽ ഇതുവരെ വധിക്കപ്പെട്ട ഏറ്റവും പ്രായം കൂടിയ തടവുകാരൻ.