പ്രതിരോധ ബജറ്റ് ഉയർത്താൻ ബ്രിട്ടൻ; ഹീറ്റ് പമ്പ് സബ്‌സിഡികൾ വെട്ടിക്കുറയ്ക്കാൻ നീക്കം.
ലണ്ടൻ : പ്രതിരോധ മേഖലയിലെ ചെലവുകൾ വർദ്ധിപ്പിക്കുന്നതിന് ആവശ്യമായ തുക കണ്ടെത്തുന്നതിനായി ഹീറ്റ് പമ്പുകൾക്കുള്ള സബ്‌സിഡി വെട്ടിക്കുറയ്ക്കാൻ ഒരുങ്ങി ബ്രിട്ടീഷ് സർക്കാർ. ഇതിന്റെ ഭാഗമായി എനർജി സെക്രട്ടറി മിയാറ്റ ഫാംബുല്ലെയോട് (Miatta Fahnbulleh) തങ്ങളുടെ ബജറ്റിൽ നിന്ന് 200 കോടിയിലധികം പൗണ്ട് കണ്ടെത്തുവാൻ ആവശ്യപ്പെട്ടിട്ടുണ്ട്. ഇതിൽ ഭൂരിഭാഗവും ഇംഗ്ലണ്ടിലും വെയ്ൽസിലും നടപ്പിലാക്കി വരുന്ന ബോയിലർ അപ്‌ഗ്രേഡ് സ്കീമിൽ (Boiler Upgrade Scheme) നിന്നായിരിക്കും വെട്ടിക്കുറയ്ക്കുക.
വീടുകളിലെ പഴയ ഗ്യാസ് ബോയിലറുകൾക്ക് പകരം പരിസ്ഥിതി സൗഹൃദമായ ഇലക്ട്രിക് ഹീറ്റ് പമ്പുകൾ ഘടിപ്പിക്കുന്നതിന് നിലവിൽ 9,000 പൗണ്ട് വരെയാണ് ഗ്രാന്റായി നൽകുന്നത്. എന്നാൽ ഈ ആനുകൂല്യം ഭൂരിഭാഗവും ഇടത്തരം കുടുംബങ്ങളാണ് ഉപയോഗപ്പെടുത്തുന്നതെന്നാണ് ട്രഷറി അധികൃതരുടെ വിലയിരുത്തൽ. പദ്ധതി പൂർണ്ണമായി നിർത്തിവെക്കില്ലെങ്കിലും 270 കോടി പൗണ്ടിന്റെ ബജറ്റിൽ നിന്ന് കോടിക്കണക്കിന് പൗണ്ട് കുറയ്ക്കാനാണ് സർക്കാരിന്റെ നീക്കം.
സർക്കാരിന്റെ ഈ നീക്കത്തിനെതിരെ വ്യവസായ പ്രമുഖരും പരിസ്ഥിതി പ്രവർത്തകരും രംഗത്തെത്തിയിട്ടുണ്ട്. ബ്രിട്ടനിലെ വളർന്നുവരുന്ന ഹീറ്റ് പമ്പ് വ്യവസായത്തിന് ഇത് കനത്ത തിരിച്ചടിയാകുമെന്നും, കാലാവസ്ഥാ വ്യതിയാനത്തിനെതിരെയുള്ള പോരാട്ടത്തെ പ്രതികൂലമായി ബാധിക്കുമെന്നും ആക്ടിവിസ്റ്റുകൾ മുന്നറിയിപ്പ് നൽകുന്നു. എന്നാൽ ദേശീയ സുരക്ഷ ഉറപ്പാക്കുന്നതിന് വേണ്ടിയുള്ള പ്രതിരോധ നിക്ഷേപങ്ങൾക്കാണ് സർക്കാർ മുൻഗണന നൽകുന്നതെന്ന് അധികൃതർ വ്യക്തമാക്കി.
കഴിഞ്ഞ കുറച്ചുകാലമായി പ്രതിരോധ ചെലവുകൾ 1,500 കോടി പൗണ്ടായി ഉയർത്താനുള്ള ശ്രമങ്ങൾ സർക്കാരിന്റെ ഭാഗത്തുനിന്നുണ്ടാകുന്നുണ്ട്. ഇതിനായി വിവിധ വകുപ്പുകളിൽ നിന്നും തുക കണ്ടെത്താനുള്ള ആലോചനയിലാണ് മന്ത്രിമാർ. വരും മാസങ്ങളിൽ ഇത് സംബന്ധിച്ച അന്തിമ പ്രഖ്യാപനമുണ്ടാകുമെന്നാണ് കരുതപ്പെടുന്നത്.
