പാർട്ടി ഫണ്ട് നൽകുന്ന ശതകോടീശ്വരന്റെ ബിസിനസ്സ് താല്പര്യങ്ങൾ സംരക്ഷിക്കാൻ ബാങ്ക് ഓഫ് ഇംഗ്ലണ്ടിന്റെ ‘ബ്രിറ്റ്കോയിൻ’ പദ്ധതിക്കെതിരെ റിഫോം യുകെ നേതാവ് നൈജൽ ഫരാജ് പരസ്യ യുദ്ധത്തിന്.

ലണ്ടൻ: റിഫോം യുകെ (Reform UK) പാർട്ടിക്ക് വൻതോതിൽ സാമ്പത്തിക സഹായം നൽകുന്ന ശതകോടീശ്വരന് വൻ നഷ്ടമുണ്ടാക്കിയേക്കാവുന്ന ബാങ്ക് ഓഫ് ഇംഗ്ലണ്ടിന്റെ ക്രിപ്‌റ്റോകറൻസി പദ്ധതിയെ തടയാൻ പാർട്ടി നേതാവ് നൈജൽ ഫരാജ് (Nigel Farage) തീവ്രശ്രമം നടത്തുന്നതായി റിപ്പോർട്ട്. തായ്‌ലൻഡ് ആസ്ഥാനമായി പ്രവർത്തിക്കുന്ന ക്രിപ്റ്റോ വ്യവസായി ക്രിസ്റ്റഫർ ഹാർബോൺ (Christopher Harborne) പാർട്ടിക്ക് നൽകിയ ദശലക്ഷക്കണക്കിന് പൗണ്ടിന്റെ ധനസഹായത്തിന് പകരമായി ഒന്നും ആവശ്യപ്പെട്ടിട്ടില്ലെന്നാണ് ഫരാജ് അവകാശപ്പെടുന്നത്.

ബ്രിറ്റ്കോയിൻ (Britcoin) എന്നറിയപ്പെടുന്ന ഈ ഔദ്യോഗിക ഡിജിറ്റൽ കറൻസി പദ്ധതിയോടുള്ള ഫരാജിന്റെ എതിർപ്പ് എത്രത്തോളം ശക്തമാണെന്നതിന്റെ തെളിവുകൾ കഴിഞ്ഞ സെപ്റ്റംബറിലെ ഒരു യോഗത്തിൽ നിന്ന് വ്യക്തമാണ്. ഡിജിറ്റൽ പൗണ്ട് നടപ്പിലാക്കുന്നത് തടയാൻ താൻ ജയിലിൽ പോകാൻ പോലും തയ്യാറാണെന്നാണ് ക്രിപ്റ്റോ അനുകൂലികളുടെ ഒരു പരിപാടിയിൽ ഫരാജ് പരസ്യമായി പ്രഖ്യാപിച്ചത്. ഹാർബോൺ നൽകിയ 25 മില്യൺ പൗണ്ട് ധനസഹായമാണ് റിഫോം യുകെ പാർട്ടിയുടെ ആകെ ഫണ്ടിന്റെ മൂന്നിൽ രണ്ട് ഭാഗവും. ലോകത്തിലെ ഏറ്റവും കൂടുതൽ വ്യാപാരം ചെയ്യപ്പെടുന്ന ക്രിപ്‌റ്റോകറൻസിയായ ‘ടെതർ’ (Tether) കമ്പനിയുടെ പ്രധാന ഓഹരി ഉടമകളിൽ ഒരാളാണ് ഹാർബോൺ.

ബാങ്ക് ഓഫ് ഇംഗ്ലണ്ട് ഗവർണർ ആൻഡ്രൂ ബെയ്‌ലി ബ്രിറ്റ്കോയിൻ പദ്ധതിയുമായി മുന്നോട്ട് പോയാൽ, ടെതർ പോലുള്ള സ്വകാര്യ സ്റ്റേബിൾകോയിനുകളുടെ ആവശ്യം വിപണിയിൽ ഗണ്യമായി കുറയുമെന്ന് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു. ഇത് ഹാർബോണിന് പ്രതിവർഷം ലഭിക്കുന്ന ശതകോടികളിൽ വൻ ഇടിവുണ്ടാക്കിയേക്കാം.

അതേസമയം, ടെതറിനെ പ്രതിനിധീകരിക്കുന്ന ഡിജിറ്റൽ കറൻസീസ് ഗവേണൻസ് ഗ്രൂപ്പ് (DCGG), ബാങ്ക് ഓഫ് ഇംഗ്ലണ്ടിന്റെ പുതിയ നീക്കം സ്വകാര്യ ക്രിപ്റ്റോ വിപണിയുടെ വളർച്ചയെ തടസ്സപ്പെടുത്തുമെന്ന് നേരത്തെ തന്നെ ആശങ്ക പ്രകടിപ്പിച്ചിരുന്നു. കള്ളപ്പണം വെളുപ്പിക്കലിനും അന്താരാഷ്ട്ര തലത്തിലുള്ള തട്ടിപ്പുകൾക്കും വ്യാപകമായി ഉപയോഗിക്കപ്പെടുന്നു എന്ന ആരോപണം നേരിടുന്ന ഒന്നാണ് ടെതർ കോയിനുകൾ. ഈ വിവാദങ്ങളോട് പ്രതികരിക്കാൻ ഹാർബോൺ തയ്യാറായിട്ടില്ലെങ്കിലും, വാർത്തകൾ വെറും കെട്ടിച്ചമച്ചതാണെന്നും രാജ്യത്തെ രക്ഷിക്കുക മാത്രമാണ് ഫരാജിന്റെ ലക്ഷ്യമെന്നുമാണ് റിഫോം യുകെ വക്താവ് വ്യക്തമാക്കുന്നത്.