നൈജൽ ഫരാജിന്റെ വളർച്ച യുകെയുടെ തകർച്ചയ്ക്ക് കാരണമായേക്കാം; അയർലൻഡിലും വെയ്ൽസിലും ആശങ്ക പുകയുന്നു.
ലണ്ടൻ: യുകെയിൽ തീവ്ര വലതുപക്ഷ പാർട്ടിയായ ‘റിഫോം യുകെ’യുടെയും അതിന്റെ നേതാവ് നൈജൽ ഫരാജിന്റെയും രാഷ്ട്രീയ വളർച്ച, ബ്രിട്ടന്റെ തന്നെ തകർച്ചയ്ക്ക് കാരണമായേക്കുമെന്ന് അയർലൻഡ്, സ്കോട്ട്ലൻഡ്, വെയ്ൽസ് തുടങ്ങിയ രാജ്യങ്ങളിലെ രാഷ്ട്രീയ നേതൃത്വങ്ങളുടെ മുന്നറിയിപ്പ്. അടുത്ത പൊതുതിരഞ്ഞെടുപ്പിൽ ഫരാജ് പ്രധാനമന്ത്രിയാകുകയോ ശക്തനായ പ്രതിപക്ഷ നേതാവാകുകയോ ചെയ്താൽ യുണൈറ്റഡ് കിംഗ്ഡത്തിൽ (UK) വൻ ഭരണഘടനാ പ്രതിസന്ധിയുണ്ടാകുമെന്ന് ഇരുവിഭാഗവും ഭയപ്പെടുന്നു.
ഇംഗ്ലീഷ് ദേശീയവാദികൾ വടക്കൻ അയർലൻഡിന്റെ സാമ്പത്തിക ബാധ്യതകളെക്കുറിച്ച് ചോദ്യങ്ങൾ ഉയർത്തിയാൽ അത് വലിയ രാഷ്ട്രീയ പ്രശ്നമായി മാറുമെന്ന് സോഷ്യൽ ഡെമോക്രാറ്റിക് ആൻഡ് ലേബർ പാർട്ടി (SDLP) നേതാവ് ക്ലെയർ ഹന്ന പറഞ്ഞു. ബ്രെക്സിറ്റ് ഒരു പാഠമാണെന്നും നൈജൽ ഫരാജ് പ്രതിഭാസം താൽക്കാലികമല്ലെന്നും വ്യക്തമാക്കിയ അവർ, ലണ്ടനിൽ നിന്നുള്ള അപ്രതീക്ഷിത തീരുമാനങ്ങൾക്കായി കാത്തുനിൽക്കാതെ സ്വന്തം ഭരണഘടനാ ഭാവി സുരക്ഷിതമാക്കാൻ തയ്യാറെടുക്കണമെന്ന് അയർലൻഡിനോട് ആവശ്യപ്പെട്ടു.
യൂറോപ്യൻ മനുഷ്യാവകാശ കൺവെൻഷനിൽ (ECHR) നിന്നും പിന്മാറുമെന്നും ഗുഡ് ഫ്രൈഡേ സമാധാന കരാറിൽ പുനർചർച്ച നടത്തുമെന്നുമുള്ള ഫരാജിന്റെ പ്രഖ്യാപനങ്ങൾ വടക്കൻ അയർലൻഡിൽ വലിയ ചർച്ചയായിട്ടുണ്ട്. അതിർത്തി കടന്നുള്ള വഞ്ചനകളെയും വിദേശ കടന്നുകയറ്റങ്ങളെയും ചെറുക്കാൻ ലണ്ടനുമായി മുൻകൂട്ടി ചർച്ചകൾ നടത്തി നിയമപരമായ അടിത്തറ ഉറപ്പാക്കണമെന്ന് സിൻ ഫെയ്ൻ (Sinn Féin) പാർട്ടി അയർലൻഡിനോട് ആവശ്യപ്പെടുന്നു.
യുകെ ഒരു വികേന്ദ്രീകൃത ജനാധിപത്യ കൂട്ടായ്മയാണെന്നും എന്നാൽ ഫരാജിന്റെ കീഴിൽ രാജ്യം തീവ്രമായി മാറിയാൽ ഘടകകക്ഷികൾക്ക് മറ്റ് വഴികൾ നോക്കേണ്ടി വരുമെന്നും വെയ്ൽസ് മുൻ ഫസ്റ്റ് മിനിസ്റ്റർ മാർക്ക് ഡ്രേക്ക്ഫോർഡ് അഭിപ്രായപ്പെട്ടു. യുകെയിൽ നിന്നും സ്കോട്ട്ലൻഡും വടക്കൻ അയർലൻഡും വേർപെട്ടുപോയാൽ വെയ്ൽസ് ഒറ്റപ്പെട്ടുപോകുമെന്നും, അങ്ങനെയെങ്കിൽ നോർഡിക് കൗൺസിൽ മാതൃകയിൽ അയർലൻഡും സ്കോട്ട്ലൻഡുമായി ചേർന്ന് ഒരു പുതിയ ‘കെൽറ്റിക് യൂണിയൻ’ രൂപീകരിക്കുന്നതിനെക്കുറിച്ച് ചിന്തിക്കേണ്ടി വരുമെന്നും അദ്ദേഹം കൂട്ടിച്ചേർത്തു. വെയ്ൽസ് ജനത യുകെ വിടാൻ ആഗ്രഹിക്കുന്നതിനേക്കാൾ, നിലവിലുള്ള യുകെ വെയ്ൽസിനെ ഉപേക്ഷിക്കുന്ന അവസ്ഥയാണ് വരാൻ പോകുന്നതെന്നും അദ്ദേഹം ആശങ്കപ്പെട്ടു.
