നികുതി അടയ്ക്കുന്ന രീതി മാറുന്നു; മൂന്ന് മാസം കൂടുമ്പോൾ കണക്ക് കാണിക്കണം! യുകെയിലെ ലക്ഷക്കണക്കിന് ആളുകൾക്ക് ‘ഡിജിറ്റൽ’ കുരുക്ക്.

യുകെയിൽ വമ്പൻ നികുതി പരിഷ്കാരം വരുന്നു; ലക്ഷക്കണക്കിന് ആളുകൾക്ക് കുരുക്കാകും; നിയമം ലംഘിച്ചാൽ വൻ പിഴ.

ലണ്ടൻ: ബ്രിട്ടനിലെ നികുതിദായകർക്ക് വലിയ തിരിച്ചടിയാകുന്ന പുതിയ പരിഷ്കാരങ്ങളുമായി എച്ച്എം റെവന്യൂ & കസ്റ്റംസ് (HMRC). ‘മേക്കിംഗ് ടാക്സ് ഡിജിറ്റൽ ഫോർ ഇൻകം ടാക്സ്’ (MTD for ITSA) എന്ന പേരിൽ നടപ്പിലാക്കുന്ന ഈ പദ്ധതി ഈ സ്പ്രിംഗ് സീസൺ മുതൽ പ്രാബല്യത്തിൽ വരും. സ്വയം തൊഴിൽ ചെയ്യുന്നവർ (Self-employed), പ്രോപ്പർട്ടി ഉടമകൾ എന്നിവരെയാണ് ഈ മാറ്റം പ്രധാനമായും ബാധിക്കുക.

എന്താണ് പുതിയ പരിഷ്കാരം?

നിലവിൽ വർഷത്തിൽ ഒരിക്കൽ സെൽഫ് അസസ്‌മെന്റ് ടാക്സ് റിട്ടേൺ സമർപ്പിക്കുന്ന രീതിയാണ് യുകെയിലുള്ളത്. എന്നാൽ പുതിയ നിയമം അനുസരിച്ച് നികുതിദായകർ തങ്ങളുടെ വരുമാനവും ചെലവും ഡിജിറ്റലായി ഓരോ മൂന്ന് മാസം കൂടുമ്പോഴും (Quarterly Updates) റിപ്പോർട്ട് ചെയ്യേണ്ടി വരും.

പ്രധാന മാറ്റങ്ങൾ ഇവയാണ്:

• ത്രൈമാസ റിപ്പോർട്ടിംഗ്: വർഷത്തിൽ ഒരു തവണ എന്നതിന് പകരം നിശ്ചിത വരുമാനമുള്ളവർ ഓരോ പാദത്തിലും വരുമാന വിവരങ്ങൾ അപ്‌ലോഡ് ചെയ്യണം. വാല്യൂ ആഡഡ് ടാക്സ് (VAT) രജിസ്ട്രേഷനുള്ളവർ വർഷത്തിൽ 9 തവണ വരെ ടാക്സ് ഫയൽ ചെയ്യേണ്ട സാഹചര്യം വന്നേക്കാം.

• തേർഡ് പാർട്ടി സോഫ്റ്റ്‌വെയർ: എച്ച്എംആർസിയുടെ പുതിയ സംവിധാനവുമായി പൊരുത്തപ്പെടുന്ന പ്രത്യേക സോഫ്റ്റ്‌വെയറുകൾ ഇതിനായി ഉപയോഗിക്കണം. ഇതിന് പ്രതിമാസം 35 പൗണ്ട് വരെ ചിലവ് വന്നേക്കാം.

• പെനാൽറ്റി പോയിന്റ് സിസ്റ്റം: കൃത്യസമയത്ത് റിപ്പോർട്ട് സമർപ്പിക്കാത്തവർക്കായി പുതിയ പെനാൽറ്റി പോയിന്റ് സംവിധാനം വരികയാണ്. നിശ്ചിത പോയിന്റുകൾ കടന്നാൽ വൻതുക പിഴയായി നൽകേണ്ടി വരും.

ആരെയാണ് ബാധിക്കുക?

ഏപ്രിൽ 6 മുതൽ പ്രാബല്യത്തിൽ വരുന്ന ആദ്യ ഘട്ടം 8.64 ലക്ഷം പേരെ നേരിട്ട് ബാധിക്കും. അടുത്ത രണ്ട് വർഷത്തിനുള്ളിൽ ഏകദേശം 30 ലക്ഷം ആളുകൾ ഈ പരിധിക്കുള്ളിൽ വരും.

• ലാൻഡ്‌ലോർഡുകൾ (Landlords)

• ഫോട്ടോഗ്രാഫർമാർ, കൺസൾട്ടന്റുമാർ തുടങ്ങിയ ഫ്രീലാൻസർമാർ

• ചെറുകിട കച്ചവടക്കാർ

• സ്വയം തൊഴിൽ ചെയ്യുന്നവർ

വിദഗ്ധരുടെ മുന്നറിയിപ്പ്

2015-ൽ പ്രഖ്യാപിച്ച ഈ പദ്ധതി ഒരു ദശകത്തിന് ശേഷമാണ് നടപ്പിലാക്കുന്നത്. എന്നാൽ ഇത്രയും വലിയൊരു മാറ്റത്തെക്കുറിച്ച് സാധാരണക്കാരായ നികുതിദായകർക്ക് ഇപ്പോഴും വ്യക്തമായ ധാരണയില്ലെന്നത് വലിയ പ്രതിസന്ധിക്ക് കാരണമാകും. വിവരങ്ങൾ കൃത്യമായി അറിഞ്ഞില്ലെങ്കിൽ അറിവില്ലായ്മ കാരണം ലക്ഷക്കണക്കിന് ആളുകൾ പിഴയടയ്ക്കേണ്ടി വരുമെന്ന് ടാക്സ് വിദഗ്ധർ മുന്നറിയിപ്പ് നൽകുന്നു.

വരുമാനത്തിന്റെ തോത് അനുസരിച്ച് ആർക്കൊക്കെയാണ് ഈ നിയമം ബാധകമാവുക എന്ന കാര്യത്തിൽ വരും ദിവസങ്ങളിൽ കൂടുതൽ വ്യക്തത വരും.