നവജാത ശിശുക്കൾക്കായി ‘ട്രംപ് അക്കൗണ്ടുകൾ’; പദ്ധതിയെച്ചൊല്ലി സാമ്പത്തിക വിദഗ്ദ്ധരുടെ എതിർപ്പ് കടുക്കുന്നു.

വാഷിംഗ്ടൺ: വരാനിരിക്കുന്ന ഇടക്കാല തെരഞ്ഞെടുപ്പിന് മുന്നോടിയായി, നവജാത ശിശുക്കൾക്കായി ഡൊണാൾഡ് ട്രംപ് പ്രഖ്യാപിച്ച ‘ട്രംപ് അക്കൗണ്ട്’ (Trump Accounts) പദ്ധതി സാമ്പത്തിക വിദഗ്ദ്ധർക്കിടയിൽ വൻ വിമർശനങ്ങൾക്ക് വഴിവെക്കുന്നു. അപേക്ഷിക്കുന്ന എല്ലാ നവജാത ശിശുക്കളുടെയും പേരിൽ സർക്കാർ വകയായി 1,000 ഡോളറിന്റെ പ്രാഥമിക നിക്ഷേപം നടത്തുന്നതാണ് ഈ പദ്ധതി. കുട്ടിക്ക് 18 വയസ്സ് തികയുമ്പോഴേക്കും ഈ തുക ലക്ഷക്കണക്കിന് ഡോളറായി വളരുമെന്നാണ് ട്രം ഭരണകൂടത്തിന്റെ അവകാശവാദം.

എന്നാൽ, സാധാരണക്കാരായ കുടുംബങ്ങളെക്കാൾ സമ്പന്നർക്കാണ് ഈ പദ്ധതി കൊണ്ട് കൂടുതൽ പ്രയോജനമുണ്ടാകുകയെന്ന് സാമ്പത്തിക വിദഗ്ദ്ധർ ചൂണ്ടിക്കാണിക്കുന്നു. പ്രതിവർഷം 5,000 ഡോളർ വരെ കൂടുതൽ നിക്ഷേപിക്കാൻ ശേഷിയുള്ള സമ്പന്ന കുടുംബങ്ങൾക്ക് ഉയർന്ന നികുതി ഇളവുകൾ ലഭിക്കുകയും അവരുടെ അക്കൗണ്ട് വലിയ തുകയായി വളരുകയും ചെയ്യും. പ്രതിവർഷം കൂടുതൽ തുക നിക്ഷേപിക്കാൻ സാധിക്കാത്ത പാവപ്പെട്ട കുടുംബങ്ങളുടെ കുട്ടികൾക്ക് 1,000 ഡോളറിന്റെ പ്രാഥമിക നിക്ഷേപം വലിയ രീതിയിൽ വളരില്ലെന്നും ഇത് ധനികരും ദരിദ്രരും തമ്മിലുള്ള വ്യത്യാസം വർദ്ധിപ്പിക്കുമെന്നും മിഷിഗൺ സർവകലാശാലയിലെ സാമ്പത്തിക ശാസ്ത്ര അധ്യാപകൻ ജസ്റ്റിൻ വുൾഫേഴ്‌സ് ഉൾപ്പെടെയുള്ളവർ വിമർശിക്കുന്നു.

അതേസമയം, വൈറ്റ് ഹൗസ് അധികൃതർ ഈ ആരോപണങ്ങളെ തള്ളിക്കളഞ്ഞു. ഇടത്തരം കുടുംബങ്ങളിലെ കുട്ടികൾക്ക് വളർച്ച കൈവരിക്കാനുള്ള മികച്ച അവസരമാണിതെന്നും തങ്ങളുടെ ലക്ഷ്യം സാമ്പത്തിക സമത്വം കൊണ്ടുവരികയാണെന്നും സർക്കാരിന്റെ വക്താക്കൾ വ്യക്തമാക്കുന്നു. എന്നിരുന്നാലും, സാമൂഹിക സുരക്ഷാ പദ്ധതികളെ തകർക്കാനുള്ള നീക്കമാണിതെന്ന നിരീക്ഷണവും ശക്തമാണ്.